PaLukas

13 Pethimbo ndyoka opwa li pu na yamwe, mboka ya li ya hokololele Jesus kombinga yAagalilea, mboka Pilatus a dhipaga, manga ya li taya yambele Kalunga omayambo. 2 Okwe ya yamukula a ti: “Mbela otamu dhiladhila kutya okudhipagwa kwAagalilea mboka otaku ulike kutya yo aalunde unene ye vule Aagalilea ayehe yalwe? 3 Hasho nando. Ihe ngame otandi mu lombwele, ngele itamu itedhulula, nane wo amuhe otamu ka hanagulwa po. 4 Nenge otamu dhiladhila kutya aantu 18, mboka ya gwilwa koshungo muSiloa e taya si, aalunde ye vule aantu ayehe yalwe yomuJerusalem? 5 Hasho nando. Ihe ngame otandi mu lombwele, ngele itamu itedhulula, amuhe otamu ka hanagulwa po ngaashi yo.”

6 Opo nduno okwe ya lombwele ethaneko ndika tali ti: “Omulumentu gumwe okwa li e na omukwiyu gwa tsikwa moshikunino she shomandjembele e te ya a likole oonkwiyu, ihe ina adha ko sha. 7 Opo ihe okwa lombwele omulongi gwomoshikunino shomandjembele a ti: ‘Ngashingeyi onde ya ko omimvo ndatu ndi likole oonkwiyu komukwiyu nguka, ihe inandi adha ko sha. Gu ka po! Omolwashike gu na okutsikila owala okumana evi oonkondo?’ 8 Omuniilonga okwe mu yamukula a ti: ‘Mwene gwandje, gu etha gu kale po ishewe uule womvula yimwe, ndi gu fulile omukanka gwe gu dhingoloka e tandi gu tutile uuhoho. 9 Ngele ogwa imi iiyimati monakuyiwa, otashi ka kala oshiwanawa, ihe ngele inagu ima, nagu kewe po.’”

10 Esiku limwe, Jesus okwa li ta longo aantu muyimwe yomoosinagoga, mEsabati. 11 Ihe tala, omwa li mu na omukiintu gumwe e na ombepo ya nyata,* ndjoka ya li ye mu ningitha a kale ta ehama uule womimvo 18. Okwa li a andalala noonkondo, noka li nando ha vulu okuukilila. 12 Sho Jesus a mono omukiintu ngoka, okwe mu lombwele ta ti: “Owa aludhwa kuuvu woye.” 13 Opo ihe okwe mu tenteke iikaha ye e ta ukilile nziya, nokwa tameke okutanga Kalunga. 14 Ihe omukuluntu gwosinagoga, ngoka a li a geela Jesus noonkondo, sho a aludha mEsabati, okwa ti kongundu yaantu: “Opu na omasiku gahamano, moka iilonga yi na okulongwa. Onkee ano ileni mu aludhwe momasiku ngoka, ihe hamesiku lyEsabati.” 15 Ihe Omuwa okwe mu yamukula ta ti: “Aafudhime ne! Mbela kehe gumwe gwomune iha mangulula mo ongombe ye, nenge okasino ke mesiku lyEsabati e te yi fala yi ka nwe? 16 Mbela omukiintu nguka, ngoka e li gumwe gwomoluvalo lwaAbraham, nokwa kala a mangwa kuSatana uule womimvo 18, ke na okumangululwa moomango ndhika mesiku lyEsabati?” 17 Sho Jesus a popi oohapu ndhoka, aapataneki ye ayehe oya tameke okukala ya sa ohoni, ihe ongundu ayihe yaantu oya nyanyukilwa iilonga iikumithi, mbyoka a longo.

18 Onkee ano okwa ti: “Uukwaniilwa waKalunga owa fa shike, notandi vulu oku wu faathanitha nashike? 19 Owa fa omuma yosinapi, ndjoka omulumentu a kutha e te yi kunu moshikunino she, noya koko e tayi ningi omuti, noondhila dhokegulu odha tungile iihandhila yadho kiitayi yagwo.”

20 Opo nduno okwa ti ishewe: “Uukwaniilwa waKalunga otandi vulu oku wu faathanitha nashike? 21 Owa fa efulika, ndyoka omukiintu a kutha e te li lungile mumwe nuusila, wa udha iiyelekitho itatu iinene, sigo ondombo ayihe ya fulu.”

22 Opo ihe sho Jesus a li ta yi kuJerusalem, okwa ende oshilando noshilando nosho wo omukunda nomukunda, ta longo aantu. 23 Opo nduno omulumentu gumwe okwa ti kuye: “Omuwa, mbela mboka taya hupithwa aashona yowala?” Jesus okwa ti kuyo: 24 Kondjeni mwa mana mo mu pite mosheelo shoka sha patekidha, oshoka ngame otandi mu lombwele, oyendji otaya ka kambadhala okuya mo, ihe itaya ka vula. 25 Uuna omunegumbo a thikama e ta pata omweelo, otamu ka thikama kondje tamu konkola komweelo tamu ti: ‘Omuwa, tu egulula.’ Ihe ote ke mu yamukula ta ti: ‘Kandi shi kutya one oolye.’ 26 Opo nduno otamu ka tameka tamu ti: ‘Otwa lileni notwa nwineni pamwe nangoye, nowa longele aantu momapandaanda getu.’ 27 Ihe ote ke mu lombwela ta ti: ‘Kandi shi kutya one oolye. Zii po pungame, aalongi yuukolokoshi amuhe ne!’ 28 Otamu ka lilagana nokwiikokota komayego, sho tamu ka mona Abraham, Isak, Jakob naahunganeki ayehe ye li mUukwaniilwa waKalunga, ihe ne otamu ka umbilwa pondje. 29 Shimwe ishewe, aantu otaya ka za kuuzilo nokuuninginino, kuumbangalantu nokuumbugantu, notaya ka kuutumba poshililo mUukwaniilwa waKalunga. 30 Ihe tala, opu na mboka yahugunina taya ka ninga aatango, nopu na mboka yotango taya ka ninga yahugunina.”

31 Pethimbo olyo tuu ndyoka, Aafarisayi yamwe oye ya kuJesus e taye mu lombwele taya ti: “Za po mpaka, wu ye kulwe, oshoka Herodes okwa hala oku ku dhipaga.” 32 Opo nduno Jesus okwa ti kuyo: “Indeni mu ka lombwele kaandje ngoka tamu ti: ‘Tala, otandi tidha mo oondemoni maantu noku ya aludha nena nongula, notandi mana mesiku etitatu.’ 33 Ihe otandi tsikile okulonga iilonga yandje nena, ngula, nomesiku lya landula ko, oshoka itashi vulika omuhunganeki a dhipagelwe kondje yaJerusalem. 34 Jerusalem, Jerusalem, omudhipagi gwaahunganeki, naamboka wa tuminwa owe ya dhipaga nomamanya. Olundji onda li handi kala nda hala okugongela aamwoye ngaashi ondjuhwa hayi gongele uuyuhwena wayo kohi yomawawa gayo. Ihe kwa li we shi hala. 35 Tala, egumbo lyoye olya ninga eputu. Ngame otandi ku lombwele kutya ito ka mona ndje nando, sigo oosho to ka tya: ‘Ngoka te ya medhina lyaJehova na lalekwe nuuyamba!’”