Timoteus omutiyali

3 Ihe kala wu shi shi kutya momasiku gahugunina, otaku ke ya omathimbo omadhigu lela okukaliwa mugo. 2 Oshoka aantu otaya ka kala yi ihole yoyene, ye hole iimaliwa, hayi itanga, aainenepeki, aasheki, ihaaya vulika kaavali yawo, ihaaya pandula, kaaye shi aadhiginini, 3 kaaye na ohole, kaaye na elongelokumwe, aalundili, kaaye na eipangelo, aakwanyanya, kaaye hole uuwanawa, 4 aakengeleledhi, ye na omitse omikukutu, ye na uuntsa wa pitilila, ye hole omainyanyudho, pehala lyokukala ye hole Kalunga, 5 hayi imonikitha ya fa ye na etilokalunga, ihe ohayi idhimbike oonkondo dhalyo; yanda aantu ya tya ngaaka. 6 Mokati kawo otamu ka za aalumentu, mboka taya ka longitha iineya, yi iyakele momagumbo, e taya kwata ko aakiintu, mboka haya vulu okuyulwa nuupu, noya pikwa kuulunde nokomahalo gi ili nogi ili, 7 aakiintu mboka ohayi ilongo aluhe, ihe inaya vula nando okumona ontseyo yi li mondjila kombinga yoshili.

8 Ngaashi owala Jannes naJambres ya li ompinge naMoses, aantu mboka nayo oye li ompinge noshili. Aalumentu ya tya ngawo oye na omadhiladhilo omawinayi lela, noinaya hokiwa kuKalunga, molwaashoka kaye na eitaalo. 9 Shimwe ishewe, itaya ningi nando ehumokomeho lyasha, oshoka uugoya wawo otawu kala wi iwetikile thiluthilu kwaayehe, ngaashi waalumentu mboka yaali. 10 Ihe ngoye owa landula thiluthilu omalongo gandje, omikalo dhandje, elalakano lyandje, eitaalo lyandje, ontalanteni yandje, ohole yandje, eidhidhimiko lyandje, 11 nowa hepekwa nokumona iihuna, ngaashi ngame nda li nda ningilwa muAntiokia, muIkonium nomuListra. Ondi idhidhimikile omahepeko ngaka, nOmuwa okwa hupitha ndje mwaayihe mbika. 12 Odhoshili kutya ayehe mboka ya hala okukala nesimanekokalunga muukumwe naKristus Jesus, otaya ka hepekwa wo. 13 Ihe aakolokoshi naapukithi otaya ka enda taya humu komeho mokulonga uuwinayi; otaya ka pukitha yalwe, notaya ka pukithwa wo.

14 Ihe ngoye tsikila okudhiginina iinima, mbyoka wi ilonga, noye ku tompa wu itaale, oshoka owu shi kutya owe yi longwa kulye, 15 nowu shi shi kutya okuza kuunona woye, owa kala wu shi omanyolo omayapuki, ngoka taga vulu oku ku kwathela wu kale wu na oondunge, opo wu hupithwe omolweitaalo lyoye muKristus Jesus. 16 Omanyolo agehe oga nyolwa mewiliko lyaKalunga, notaga vulu okulonga, okupukulula, okuukitha iinima nokuputudha pauyuuki, 17 opo kehe ngoka ta longele Kalunga a kale a gwana thiluthilu okulonga oshilonga kehe oshiwanawa.