paMarkus
2 Konima yomasiku gontumba, okwa yi ishewe muKapernaum, nehokololo olya taandele kutya oku li megumbo limwe. 2 Onkee ano aantu oyendji oya gongala megumbo ndyoka, nomwa li mwa udha noonkondo, nokuli sigo oposheelo, nokwa tameke oku ya uvithila. 3 Opo nduno oye mu etele omusilombanda a indwa kontala kaalumentu yane. 4 Ihe kaya li taya vulu oku mu fala megumbo kuJesus, molwaashoka omwa li mwa udha noonkondo. Onkee ano oya ulula ombululu pombanda yegumbo, ya ukilila pehala mpoka Jesus a li a thikama, noya kulukitha ontala, hoka omusilombanda a li a lala. 5 Sho Jesus a mono kutya oye na eitaalo, okwa lombwele omusilombanda a ti: “Mumwandje, oondjo dhoye odha dhimwa po.” 6 Pethimbo mpoka, opwa li pu na aalongimpango yamwe, mboka ya li ya kuutumba mpoka, noya li taya ipopile momitima dhawo taya ti: 7 “Omolwashike omulumentu nguka ta popi ngawo? Ota sheke Kalunga. Olye ishewe ha vulu okudhima po oondjo, kee shi owala Kalunga?” 8 Ihe nziya sho Jesus a dhimbulula kutya otaya dhiladhila shike, okwa ti kuyo: “Omolwashike mu na omadhiladhilo ga tya ngawo momitima dheni? 9 Oshinipo oshipu koshikwawo? Okutya komusilombanda, ‘Oondjo dhoye odha dhimwa po,’ nenge okutya, ‘Yambuka po, kutha ontala yoye e to ende’? 10 Ihe opo mu kale mu shi kutya Omuna gwomuntu okwa pewa oonkondopangelo kombanda yevi dhokudhima po oondjo, . . .” okwa lombwele omusilombanda a ti: 11 “Otandi ku lombwele, yambuka po, kutha ontala yoye e to yi kegumbo.” 12 Opo ihe okwa yambuka po, e ta kutha ontala ye nziya nokwa yi pondje ta ende e wetike kaantu ayehe. Onkee ano ayehe oya li ya kumwa noonkondo noya hambelele Kalunga, taya ti: “Inatu mona nando onale oshinima sha tya ngeyi.”
13 Jesus okwa yi ishewe komunkulofuta, nongundu yaantu oya tsikile okuya kuye e ta tameke oku ya longa. 14 Sho a zi pomunkulofuta, okwa mono Levi, omuna gwaAlfeus, a kuutumba pombelewa yiifendela e te mu lombwele ta ti: “Ninga omulanduli gwandje.” Nziya, okwa thikama e te mu landula. 15 Konima yethimbo, sho Jesus a li ta li* megumbo lyaLevi, aafendelithi oyendji naalunde oye ya okulya pamwe naJesus naalongwa ye, opo nduno oyendji yomuyo oya ningi aalanduli ye. 16 Ihe sho aalongimpango, mboka ya li wo Aafarisayi, ya mono Jesus ta li pamwe naalunde nosho wo naafendelithi, oya tameke okulombwela aalongwa ye taya ti: “Tashi ti Omuhongi gweni oha li pamwe naafendelithi naalunde?” 17 Sho Jesus e shi uvu, okwa ti kuyo: “Mboka ye na uundjolowele inaya pumbwa omupangi, ihe oomboka owala taya ehama. Ngame inandi endela aayuuki, ihe aalunde.”
18 Pethimbo mpoka aalongwa yaJohannes nosho wo Aafarisayi oya li haya idhilike iikulya. Onkee ano oye ya kuye e taya ti: “Omolwashike aalongwa yaJohannes noyAafarisayi haya idhilike iikulya, ihe aalongwa yoye ihaya idhilike?” 19 Opo nduno Jesus okwa ti kuyo: “Mbela ookuume kombushiki* oya pumbwa ngaa okwiidhilika iikulya, omanga ombushiki yi li nayo? Inaya pumbwa okwiidhilika iikulya, omanga ombushiki yi li nayo. 20 Ihe esiku otali ya, uuna ombushiki* tayi ka za po puyo, opo nduno taya idhilike iikulya mesiku ndyoka. 21 Kapu na ngoka ha andeke onguwo onkulu noshaando oshipe. Ngele okwe shi ningi, oshaando shoka otashi tuula onguwo ndjoka onkulu, nombululu otayi ningi onene yi vule yonale. 22 Shimwe ishewe, kapu na ngoka ha tula omaviinu omape moompunda oonkulu. Ngele okwe shi ningi, omaviinu otaga tuula oompunda e taga hepa, oompunda e tadhi yonuka. Ihe omaviinu omape ohaga zilwa moompunda oompe.”
23 Sho a li ta taakana momapya mesiku lyEsabati, aalongwa ye oya tameke okupolola iilya. 24 Onkee ano Aafarisayi oya ti kuye: “Tala! Omolwashike taya ningi shoka inaashi pitikwa pampango mEsabati?” 25 Ihe okwa ti kuyo: “Mbela inamu lesha shoka David a ningi, sho a li mompumbwe yiikulya, naasho ye naalumentu mboka ya li naye ya ningile, sho ya li ya sa ondjala? 26 Mbela inamu lesha ehokololo lyomuyambi omukuluntu Abiatar kombinga yaDavid nkene a yi megumbo lyaKalunga e ta li iikwiila yeuliko, nokwe yi pe wo aalumentu, mboka ya li pamwe naye, nonando aayambi owala ye yi pitikilwa?” 27 Opo nduno okwa ti kuyo: “Kalunga okwa toto po Esabati omolwuuwanawa waantu, ihe ina shita aantu omolwEsabati. 28 Onkee ano Omuna gwomuntu oye Omuwa, nokuli nogwEsabati.”