Yotango kAakorinto
6 Ngele pokati keni nomumwaho opwa holoka oontamanana, mbela oto ka ya kompangu, mu ka pangulwe kwaamboka kaaye shi aayuuki, pehala lyokuya kaayapuki? 2 Nenge kamu shi shi kutya aayapuki otaya ka pangula uuyuni? Nongele uuyuni otawu ka pangulwa kune, mbela itamu vulu okutokola iinima iishona? 3 Mbela kamu shi shi kutya otatu ka pangula aayengeli? Ngele osho, mbela otatu nyengwa ngaa shili okutokola iinima iishona yomonkalamwenyo ndjika? 4 Ihe ngele opu na iinima yakwalukehe ya pumbwa okutokolwa, omolwashike hamu hogolola mboka ya dhinika megongalo oyo ya ninge aatokoli? 5 Otandi popi ngeyi, ndi mú sithe ohoni. Mbela mokati keni kamu na nando omuntu gumwe omunandunge, ta vulu okuutha oohapu, uuna pokati kaamwahe pwa holoka uupyakadhi? 6 Pehala lyaashono, omumwatate oha fala omumwahe kompangu, opo a ka pangulwe kwaamboka kaaye shi ooitaali.
7 Itashi kwatha sha nando, ngele ohamu hokololithathana. Omolwashike owala itaamu etha mu ningwe nayi? Omolwashike itaamu etha owala mu kengelelwe? 8 Pehala lyaashono, ohamu ningile aamwaho uuwinayi, nohamu ya kengelele.
9 Nenge kamu shi shi kutya aantu, mboka ihaaya longo uuyuuki, itaya ka thigulula Uukwaniilwa waKalunga? Inamu pukithwa. Aantu, mboka haya yi momilalo dha nyata,* aalongeli yiikalunga, aahondeli, omashenge naalali nomashenge,* 10 aafuthi, aanalwiho, oonkolwi, aasheki* naayugi itaya ka thigulula Uukwaniilwa waKalunga. 11 Nokuli yamwe yomune osho mwa li mwa tya ngaaka. Ihe ngashingeyi, omwa yogolwa; omwa yapulwa; omwa talika ko mu li aayuuki okupitila medhina lyOmuwa Jesus Kristus, nokekwatho lyombepo yaKalunga ketu.
12 Iinima ayihe onde yi tala ko ya pitikwa pampango, ihe haayihe tayi eta uuwanawa. Iinima ayihe onde yi tala ko ya pitikwa pampango, ihe itandi etha ndi pangelwe nando okusha. 13 Iikulya oyi li po omolwepunda, nepunda oli li po omolwiikulya, ihe Kalunga ayihe ote ke yi hulitha po. Olutu kalu lile po omilalo dha nyata,* ihe olu lile po Omuwa, nOmuwa oku lile po olutu. 14 Ihe Kalunga okwa yumudha Omuwa, note ke tu yumudha wo kuusi ta longitha oonkondo dhe.
15 Mbela kamu shi shi kutya omalutu geni oge li iilyo yaKristus? Mbela nandi kuthe po nduno iilyo yaKristus, noku yi ninga iilyo yolutu lwombwanda? Hasho nando! 16 Mbela kamu shi shi kutya kehe ngoka ta imanga kumwe nombwanda ota ningi olutu lumwe nayo? Oshoka okwa popi a ti: “Yaali otaya ningi omuntu gumwe.” 17 Ihe kehe ngoka e li muukumwe nOmuwa okwa hangana naye pambepo. 18 Indeni ontuku omilalo dha nyata!* Eyono kehe lilwe omuntu ta yono itali gumu olutu lwe, ihe ngoka ta yi momilalo dha nyata ota yono kolutu lwe mwene. 19 Mbela kamu shi shi kutya omalutu geni ogo otempeli yombepo ondjapuki, ndjoka yi li mune, ndjono mwa pewa kuKalunga? Natango, ne kamu shi yeni yene, 20 oshoka omwa landwa ondilo. Onkee ano simanekitheni Kalunga nomalutu geni.