PaJohannes

16 “Onde mu lombwele oohapu ndhoka, opo kaamu punduke.* 2 Aantu otaye ke mu konda mo moosinagoga. Ihe nokuli ethimbo otali ya, uuna kehe ngoka te mu dhipaga ta ka dhiladhila kutya ota longele Kalunga iilonga iiyapuki. 3 Ihe otaye ke mu ningila ngaaka, molwaashoka kaye shi Tate nokaye shi ndje. 4 Kakele kaashono, onde mu lombwela iinima mbika, opo ngele ethimbo olya thiki, iinima mbika yi ningwe, mu dhimbulukwe kutya onde yi mu lombwela.

Iinima mbika inandi yi mu lombwela petameko, molwaashoka onda li nane. 5 Ngashingeyi, otandi yi kungoka a tuma ndje, ihe kapu na nando ogumwe gwomune a pula ndje ta ti: ‘Oto yi peni?’ 6 Ihe ngashingeyi, omitima dheni odha nika oluhodhi, molwaashoka nde mu lombwela iinima mbika. 7 Nonando ongawo, otandi mu lombwele oshili kutya oshi lile po uuwanawa weni, sho tandi yi. Oshoka ngele inandi ya, omukwathi ite ke ya kune. Ihe ngele onda yi, otandi ke mu tuma kune. 8 Uuna omukwathi ngoka e ya, ota ka gandja uumbangi wa yela kuuyuni kutya uulunde oshike, uuyuuki oshike nosho wo kutya epangulo oshike: 9 tango okombinga yuulunde, molwaashoka aantu itaya ulike eitaalo mungame. 10 Opo nduno okombinga yuuyuuki, molwaashoka otandi yi kuTate, noitamu ka mona ndje we. 11 Opo ihe okombinga yepangulo, molwaashoka omupangeli gwuuyuni mbuka okwa pangulwa.

12 “Ondi na natango iinima oyindji oku mu lombwela, ihe itamu vulu oku yi uva ko ngashingeyi. 13 Ihe ngele ngoka* e ya, ano ombepo ondjapuki, ngoka ta holola oshili, ote ke mu kwathela, mu uve ko oshili ayihe, oshoka ita ka popya pahalo lye mwene, ihe ota ka popya shoka a uva, note ke mu tseyithila iinima, mbyoka tayi ke ya. 14 Ota ka tumbalekitha ndje, molwaashoka ota ka pewa mumbyoka yandje, note ke yi mu tseyithila. 15 Iinima ayihe, mbyoka Tate e na, oyandje, nomolwaashono nda ti kutya ombepo ondjapuki otayi ka pewa mumbyoka yandje, notayi ke yi mu tseyithila. 16 Uuna pwa piti okathimbo okafupi, itamu ka mona ndje we, ihe natango ngele pwa piti okathimbo okafupi, otamu ka mona ndje ishewe.”

17 Opo ihe aalongwa ye yamwe oya tameke okupulathana taya ti: “Okwa hala okutya shike, sho te tu lombwele ta ti: ‘Uuna pwa piti okathimbo okafupi, itamu ka mona ndje we, ihe natango, ngele pwa piti okathimbo okafupi, otamu ka mona ndje ishewe’ nosho wo kutya ‘molwaashoka otandi yi kuTate’?” 18 Onkee ano oya ti: “Okwa hala okutya shike sho ta ti: ‘okathimbo okafupi’? Katu shi kutya ota popi kombinga yashike.” 19 Jesus okwa ndhindhilike kutya oya hala oku mu pula, onkee ano okwa ti kuyo: “Otamu pulathana, molwaashoka nda ti: ‘Uuna pwa piti okathimbo okafupi, itamu ka mona ndje we, ihe natango, ngele pwa piti okathimbo okafupi, otamu ka mona ndje ishewe’? 20 Oshili tandi mu lombwele, otamu ka lila nokulililila, ihe uuyuni otawu ka nyanyukwa. Otamu ka kala mwa nika oluhodhi, ihe oluhodhi lweni otalu ka shituka enyanyu. 21 Uuna omukiintu ta mono okanona, oha kala e uvite uuwehame woshitheta, oshoka ethimbo lye lyokupulumutha olya thika, ihe uuwehame mboka ohe wu dhimbwa, molwaashoka okwa eta mo omuntu muuyuni. 22 Onkee ano ngashingeyi, nane omwa nika oluhodhi; ihe otandi ke mu mona ishewe, notamu ka kala mwa nyanyukwa, nokapu na nando ogumwe ta ka yona po enyanyu lyeni. 23 Mesiku ndyoka, itamu ka pula ndje nando osha. Oshili tandi mu lombwele, kehe shoka tamu indile Tate, ote shi mu pe medhina lyandje. 24 Sigo oompaka, inamu indila nando osha medhina lyandje. Indileni, notamu pewa, opo mu kale mwa nyanyukwa noonkondo.

25 “Iinima mbika, onde yi mu lombwela momathaneko. Ihe ethimbo otali ya, sho itaandi ka popya we nane momathaneko, ihe otandi ke mu lombwela kombinga yaTate sha ukilila. 26 Mesiku ndyoka, otamu ka indila Tate medhina lyandje; sho nda popi ngawo, inandi hala okutya otandi ke mu indilila ko. 27 Oshoka Tate oku mu hole, molwaashoka omu hole ndje, nomwa itaala kutya ngame omukalelipo gwaKalunga. 28 Onde ya muuyuni, ndi li omukalelipo gwaTate. Ngashingeyi, uuyuni otandi wu thigi po, notandi yi kuTate.”

29 Aalongwa ye oya ti kuye: “Tala, ngashingeyi, oto popi iinima ya yela nawa, sho itoo popi we momathaneko. 30 Ngashingeyi, otu shi kutya owu shi iinima ayihe, nokapu na ngoka a pumbwa oku ku pula sha. Shika osho she tu ningitha, tu itaale kutya owa za kuKalunga.” 31 Jesus okwe ya yamukula ta ti: “Mbela, ngashingeyi, omwa itaala? 32 Taleni, ethimbo otali ya, nolya thika nokuli nale, uuna kehe gumwe gwomune ta ka fadhuka po a uka kaandjawo e tamu thigi ndje po ongame awike. Ihe kandi li ongame awike, molwaashoka Tate oku li pamwe nangame. 33 Iinima mbika, onde yi mu lombwele, opo mu kale mu na ombili omolwandje. Otamu ka adhika komaudhigu muuyuni, ihe kaleni mu na omukumo! Ngame onda sinda uuyuni.”