PaMateus
18 Pethimbo opo tuu mpoka, aalongwa oye ya popepi naJesus e taya ti: “Olye omunene e vule ooyakwawo mUukwaniilwa womegulu?” 2 Onkee ano Jesus okwa ithana okanona kuye e te ka thikameke mokati kawo, 3 nokwa ti: “Oshili tandi mu lombwele, ngele itamu lunduluka* e tamu kala mwa fa aanona, itamu ka ya mo nando mUukwaniilwa womegulu. 4 Onkee ano ngoka ta ifupipike ngaashi okanona haka, oye omunene e vule ooyakwawo mUukwaniilwa womegulu; 5 nakehe ngoka ta taamba ko okanona ngaashi haka medhina lyandje, okwa taamba ndje ko wo. 6 Ihe kehe ngoka ta pundukitha gumwe gwomwaambaka aashona ye na eitaalo mungame, oshi li hwepo a mangelwe emanya lyoshini mothingo, ndyoka hali tanaunwa kokasino e ta umbilwa mefuta.
7 “Yayee, uuyuni mbuka tawu pundukitha aantu! Odhoshili kutya aantu otaya ka pundukitha yalwe, ihe yayee, mboka taye ke ya pundukitha! 8 Onkee ano ngele oshikaha shoye nenge ompadhi yoye otayi ku yonitha, yi teta ko e to yi ekelehi. Oshoka oshi li hwepo oku ka mona omwenyo, wu li oshitiningili nenge oshilema, shi vulithe okuumbilwa momulilo gwaaluhe, wu na iikaha ayihe iyali, nenge oompadhi adhihe mbali. 9 Shimwe ishewe, ngele eho lyoye otali ku yonitha, li tsipula mo e to li ekelehi. Oshoka oshi li hwepo, wu ka mone omwenyo wu na owala eho limwe, shi vulithe okukala wu na omeho goye agehe gaali e to umbilwa muGehenna.* 10 Shilipalekeni kutya itamu tondo gumwe gwomwaambaka aashona, oshoka otandi mu lombwele kutya aayengeli yawo megulu, ohaya kala aluhe ya tala koshipala shaTate, ngoka e li megulu. 11 ——
12 “Ne otamu ti ngiini? Ngele omulumentu oku na oonzi 100, ihe yimwe yomudho e tayi kana, mbela ita thigi ko ndhoka 99 koondundu e ta yi a ka konge yimwe ndjoka ya kana? 13 Oshili tandi mu lombwele, uuna e yi mono, ota ka kala e yi nyanyukilwa noonkondo, shi vulithe ndhiyaka 99 inaadhi kana. 14 Sha faathana, Tate,* ngoka e li megulu, ina hala pu kane nando ogumwe gwomwaambaka aashona.
15 “Shimwe ishewe, ngele omumwaho a yono, inda wu ke mu pukulule mu li po one amuke. Ngele okwa pulakene kungoye, nena owe mu likola. 16 Ihe ngele ina pulakena kungoye, inda ko kuye nagumwe nenge nayaali, oshoka opo uushili woshinima wu kolekwe, opu na okukala oombangi mbali nenge ndatu. 17 Ngele ina hala okupulakena kuyo, shi lombwela egongalo;* nongele ita pulakene kegongalo, mu tala ko ngaashi omuntu gwomiigwana* nosho wo ongomufendelithi.
18 “Oshili tandi mu lombwele, kehe shoka tamu manga kombanda yevi, otashi kala wo sha mangwa nale megulu, naashoka tamu mangulula kombanda yevi, otashi kala wo sha mangululwa nale megulu. 19 Natango otandi mu lombwele oshili kutya uuna yaali yomune kombanda yevi mwa uvathana mu indile Tate gwomegulu oshinima kehe sha simana, ote shi mu pe. 20 Oshoka kehe mpoka pwa gongala yaali nenge yatatu medhina lyandje, otandi kala mokati kawo.”
21 Opo nduno Petrus okwe ya kuye e te mu pula ta ti: “Omuwa, olungapi ndi na okudhimina po mukwetu,* ngoka a yona kungame? Lwiikando iheyali osha gwana?” 22 Jesus okwa ti kuye: “Otandi ku lombwele, halwiikando owala iheyali, ihe olwiikando 77.
23 “Onkee ano Uukwaniilwa womegulu otawu vulu okufaathanithwa nomukwaniilwa ngoka a li a hala aapiya ye ya fute oongunga dhe. 24 Sho ta pewa oongunga dhe, kuye okwa etwa omulumentu, ngoka a li e na oongunga dhe dhiitalenti 10 000.* 25 Ihe molwaashoka ka li ta vulu oku dhi futa, mwene gwe okwa gandja elombwelo, opo ye nomukulukadhi noyana, naashihe shoka ye na, shi landithwe po, opo e dhi fute. 26 Onkee ano omupiya ngoka okwa ihata pevi e te mu tsile oongolo, ta ti: ‘Idhidhimikila ndje, otandi ka futa oongunga dhoye adhihe.’ 27 Molwaashoka mwene gwe okwa li e mu uvitile ohenda, okwa dhimi po oongunga dhe e te mu etha a ye. 28 Ihe omupiya ngoka sho a adha omupiya omukwawo, ngoka e na oongunga dhe dhoondenari 100, okwe mu kwata e ta tameke oku mu ponda, ta ti: ‘Futa oongunga dhandje.’ 29 Onkee ano omupiya omukwawo okwa ihata pevi poompadhi dhe e ta tameke oku mu lilila ta ti: ‘Idhidhimikila ndje, oongunga dhoye otandi ke dhi futa.’ 30 Nonando ongawo, ine mu sila ohenda, ihe okwe mu tulitha mondholongo, sigo oosho a futu oongunga dhe. 31 Sho aapiya ooyakwawo ya mono shoka sha ningwa po, oya uvu nayi noonkondo, noya yi ya ka hokololele mwene gwawo ashihe shoka sha ningwa po. 32 Opo nduno mwene gwe okwe mu ithana e ta ti kuye: ‘Omupiya ngoye omukolokoshi, onda dhimi po oongunga dhoye adhihe sho wa lilile ndje. 33 Owa li wu na okusila omupiya mukweni ohenda, ngaashi nangame nde ku sile ohenda.’ 34 Opo ihe molwaashoka mwene gwe okwa li a geya noonkondo, okwe mu tulitha mondholongo, sigo oosho a futu oongunga dhe adhihe. 35 Tate gwomegulu naye ota ka ungaunga nane momukalo gwa faathana, ngele kehe gumwe gwomune ita dhimine po omumwahe, tashi zi komutima.”