PaMateus
16 Manga Jesus a li hoka, Aafarisayi nAasadukayi oye ya kuye nelalakano lyoku mu makela, noye mu pula e ya ulukile endhindhiliko okuza megulu. 2 Okwe ya yamukula a ti: “Uuna kwa toko, ohamu ti, ‘Onkalo yombepo otayi ka kala ombwanawa, oshoka egulu olya tiligana,’ 3 nopethimbo lyongula, ohamu ti, ‘Nena otaku ka kala kwa talala noku na omvula, oshoka egulu olya tiligana nolya zigakana.’ Ne omu shi okunongonona onkalo yombepo mokutala kegulu, ihe kamu shi okunongonona omandhindhiliko giiningwanima yopethimbo ndika. 4 Epipi ndika ekolokoshi noka li shi edhiginini, otali tsikile okukonga endhindhiliko, ihe itali pewa endhindhiliko lyasha, kakele kendhindhiliko lyaJona.” Sho a popi ngawo, okwe ya thigi po e ta yi.
5 Ano sho aalongwa ya taagulukile handiyaka yefuta, oya dhimbulula kutya oya dhimbwa okweetelela iikwiila. 6 Jesus okwa ti kuyo: “Kaleni mwa kotokela efulika lyAafarisayi nAasadukayi.” 7 Onkee ano oya tameke okulombwelathana taya ti: “Otashi vulika ta popi ngawo, molwaashoka inatu etelela iikwiila.” 8 Sho Jesus e shi uvu, okwa ti: “Omolwashike tamu lombwelathana kutya inamu etelela iikwiila, ne yeitaalo eshona? 9 Nani kamu uvite ko natango shoka nda hala okutya? Nenge itamu dhimbulukwa nkene nda kutitha aalumentu 5 000 niikwiila itano nosho wo kutya iimbamba ingapi mwa gongele iipambu mbyoka ya hupu po? 10 Nenge itamu dhimbulukwa nkene nda kutitha aalumentu 4 000 niikwiila iheyali nosho wo kutya iimbamba ingapi iinene mwa gongele iipambu mbyoka ya hupu po? 11 Ongiini ano nduno kaamu uvite ko kutya kanda li tandi popi kombinga yiikwiila, ihe omu kale mwa kotokela efulika lyAafarisayi nAasadukayi?” 12 Opo nduno oye shi uvu ko kutya ka li ta popi kombinga yokukala ya kotokela efulika lyokutulwa mondombo, ihe okwa li ta popi kombinga yomalongo gAafarisayi nAasadukayi.
13 Sho Jesus e ya moshitopolwa shaKesarea Filippi, okwa pula aalongwa ye ta ti: “Aantu otaya ti Omuna gwomuntu olye?” 14 Oye mu yamukula ya ti: “Yamwe otaya ti oJohannes Omuninginithi, yamwe otaya ti oElia, nayalwe otaya ti oJeremia, nenge gumwe gwomaahunganeki.” 15 Okwa ti kuyo: “Ihe ne otamu ti ongame lye?” 16 Simon Petrus okwa yamukula a ti: “Ongoye Kristus, Omuna gwaKalunga omunamwenyo.” 17 Jesus okwe mu yamukula a ti: “Simon, omuna gwaJona, kala wa nyanyukwa, oshoka shoka ino shi hololelwa konyama nombinzi,* ihe okuTate, ngoka e li megulu. 18 Ngame otandi ku lombwele wo tandi ti: Ongoye Petrus, nokemanya ndika oko tandi tungile egongalo lyandje, nomiyelo dhOmbila* itadhi li sindi. 19 Otandi ku pe iipatululo yUukwaniilwa womegulu, nakehe shoka tamu manga kombanda yevi, otashi kala wo sha mangwa nale megulu, naashoka tamu mangulula kombanda yevi, otashi kala wo sha mangululwa nale megulu.” 20 Opo nduno okwa londodha aalongwa ye kaaya lombwele nando omuntu kutya oye Kristus.
21 Okuza pethimbo ndyoka, Jesus okwa tameke okuyelithila aalongwa ye kutya oku na okuya kuJerusalem e ta ka hepekwa nonyanya kaakuluntu yoshigwana, kaayambi aakuluntu nokaalongimpango, nota ka dhipagwa e ta yumudhwa mesiku etitatu. 22 Opo ihe Petrus okwe mu ithana po e ta tameke oku mu ganda, ta ti: “Omuwa, ino popya iinima ya tya ngaaka; ito ka ningilwa nando iinima mbyoka.” 23 Ihe Jesus okwa punguluka e ta lombwele Petrus ta ti: “Za po pungame, Satana! Ongoye endangalati mondjila yandje, oshoka ito dhiladhila ngaashi Kalunga, ihe ongaashi aantu.”
24 Opo nduno Jesus okwa lombwele aalongwa ye, a ti: “Kehe ngoka a hala okulandula ndje, na ihupule ye mwene, ye ta itsike omuti gwe gwomahepeko* e ta tsikile okulandula ndje. 25 Kehe ngoka ta kambadhala okuhupitha omwenyo gwe, ote ke gu kanitha, nakehe ngoka ta kanitha omwenyo gwe omolwandje, ote ke gu mona. 26 Onkee ano otashi kwatha shike, ngele omuntu ta ilikolele uuyuni awuhe, ihe e ta kanitha omwenyo gwe? Nenge oshike shoka omuntu ta vulu okugandja, opo a kale e na omwenyo? 27 Oshoka Omuna gwomuntu ote ke ya naayengeli ye meadhimo lyaHe, nota ka futa kehe gumwe shi ikolelela kiilonga ye. 28 Oshili tandi mu lombwele, putse mpaka opwa thikama yamwe mboka itaaya ka makela eso nando, sigo oosho tango ya mono Omuna gwomuntu te ya mUukwaniilwa we.”