PaMateus

26 Sho Jesus a mana okupopya iinima ayihe mbika, okwa lombwele aalongwa ye, ta ti: 2 “Omu shi shi kutya oku na owala omasiku gaali Opaasa yi thike, nOmuna gwomuntu ota ka gandjwa a alelwe komuti.”

3 Opo nduno aayambi naakuluntu yoshigwana oya gongala mehale lyomuyambi omunene gwedhina Kajafas, 4 noya pangele ompangela pamwe ya kwate po Jesus miineya, ye mu dhipage. 5 Ihe oya lombwelathana taya ti: “Inatu shi ninga poshituthi, opo kaashi ete epiyagano mokati kaantu.”

6 Omanga Jesus a li muBetania, megumbo lyaSimon omunashilundu, 7 omukiintu, e na ohanga yomagadhi gondilo ga nika nawa, okwe ya kuJesus, nokwa tameke oku mu tila omagadhi ngoka momutse, omanga ta li.* 8 Sho aalongwa ye shi mono, kaya li ye shi panda, noya ti: “Omolwashike omagadhi taga hepekwa ngeyi? 9 Oga li taga vulu okulandithwa po kiimaliwa oyindji e tayi pewa oohepele.” 10 Sho Jesus e shi uvu, okwa ti kuyo: “Omolwashike mwa hala okuuvitha nayi omukiintu nguka? Okwa longela ndje oshilonga oshiwanawa. 11 Oshoka oohepele otamu kala nadho aluhe, ihe ngame itamu kala mu na ndje aluhe. 12 Sho a gwayeke ndje omagadhi ga nika nawa, kungawo okwa longekidhile olutu lwandje efumviko. 13 Oshili tandi mu lombwele, kehe mpoka onkundana ombwanawa ndjika tayi ka uvithwa muuyuni awuhe, oshilonga, shika a longo, otashi ka hokololwa, opo a dhimbulukiwe.”

14 Opo nduno gumwe gwomaalongwa 12, ngoka ha ithanwa Judas Iskariot, okwa yi kaayambi aakuluntu, 15 nokwa ti kuyo: “Otamu pe ndje shike ndi gandje Jesus miikaha yeni?” Oye mu uvanekele iimaliwa yiisiliveli 30. 16 Onkee ano okuza esiku ndyoka okwa kala ta kongo ompito tayi opalele, opo a gwaaleke Jesus.

17 Mesiku lyotango lyiikwiila inaayi tulwa efulika, aalongwa oye ya kuJesus, taya ti: “Openi wa hala tu ke ku longekidhile uulalelo wOpaasa?” 18 Okwa ti kuyo: “Indeni moshilando, komulumentu gwontumba e tamu ti kuye, ‘Muhongi ota ti: “Euthwathimbo lyandje oli li popepi. Otandi ka dhanena Opaasa pamwe naalongwa yandje megumbo lyoye.”’” 19 Onkee ano aalongwa oya ningi ngaashi Jesus e ya lombwele, noya longekidha uulalelo wOpaasa.

20 Sho kwa toko, okwa kuutumba poshililo pamwe naalongwa ye 12. 21 Omanga ya li taya li, okwa ti: “Oshili tandi mu lombwele, gumwe gwomune ota ka gwaaleka ndje.” 22 Sho ye shi uvu, oya li ya nika oluhodhi noonkondo, noya tameke oku mu pula koogumwe noogumwe taya ti: “Omuwa, hangame ndishi?” 23 Okwe ya yamukula ta ti: “Ngoka ta elele oshita nangame metiti oye ta ka gwaaleka ndje. 24 Odhoshili kutya Omuna gwomuntu ota ka sa, ngaashi sha nyolwa kombinga ye, ihe yayee, ngoka te ke mu gwaaleka! Oshihwepo omuntu ngoka a kalele inaa valwa.” 25 Judas, ngoka a li e li poku ke mu gwaaleka, okwa yamukula ta ti: “Muhongi,* hangame ndishi?” Jesus okwa ti kuye: “Eeno, ongaashi we shi popi.”

26 Sho ya tsikile okulya, Jesus okwa kutha oshikwiila, nokonima sho a galikana, okwe shi pambula e te shi pe aalongwa ye, ta ti: “Taambeni; lyeni. Oshikwiila shika otashi thaneke olutu lwandje.” 27 Okwa kutha wo oshitenga, nokonima sho a galikana, okwe shi ya pe, ta ti: “Nweni mo amuhe, 28 oshoka omaviinu ngaka otaga thaneke ‘ombinzi yandje yehangano,’ ndjoka tayi ka tilwahi, opo oondjo dhoyendji dhi dhimwe po. 29 Ihe ngame otandi mu lombwele: Okuza nena, itandi ka nwa we nando omaviinu, sigo esiku ndyoka tandi ke ga nwa omape pamwe nane mUukwaniilwa waTate.” 30 Hugunina, sho ya imbi omaimbilo gehambelelo,* oya yi kOndundu yOoholivi.

31 Opo nduno Jesus okwa ti kuyo: “Amuhe otamu ka thiga ndje po* uusiku wonena, oshoka okwa nyolwa: ‘Otandi ka dhenga omusita, noonzi dhomoshigunda otadhi ka halakana.’ 32 Ihe konima ngele nda yumudhwa, otandi ke mu tetekela kuGalilea.” 33 Ihe Petrus okwe mu yamukula ta ti: “Nonando yalwe oye ku thige po, ngame kandi na siku ndi ku thige po!” 34 Jesus okwa ti kuye: “Oshili tandi ku lombwele, uusiku mbuka wonena, manga ekondombolo inaali iga, oto ka idhimbika ndje lutatu.” 35 Petrus okwa ti kuye: “Nonando otashi pula ndi se pamwe nangoye, itandi ku idhimbike nando.” Aalongwa ayehe yalwe nayo oya popi sha faathana.

36 Opo nduno Jesus okwa yi pamwe naalongwa ye kehala hali ithanwa Getsemane, nokwe ya lombwele ta ti: “Kuutumbeni mpaka, manga tandi yi hwiyaka ndi ka galikane.” 37 Okwa yi pamwe naPetrus noyanamati yaSebedeus yaali, nokwa tameke okukala a nika oluhodhi nokwa ziyalala. 38 Okwa ti kuyo: “Onda* nika oluhodhi noonkondo. Kaleni mpaka e tamu kala mwa tonata pamwe nangame.” 39 Sho a hedha ko kashona, okwa inyongamene pevi e ta galikana ta ti: “Tate, ngele otashi vulika, oshitenga shika nashi pitilile ndje po. Ndele ehalo lyandje halyo li na okugwanithwa po, ihe olyoye.”

40 Sho a galukile kuyo, okwe ya adha ya kotha, nokwa ti kuPetrus: “Nane omwa nyengwa okukala mwa tonata uule owala wowili yimwe pamwe nangame? 41 Kaleni mwa tonata nokugalikana aluhe, opo kaamu iyethele momamakelo. Odhoshili kutya ombepo oya hala,* ihe onyama onkundi.” 42 Natango okwa shuna ko oshikando oshitiyali a ka galikane, ta ti: “Tate, ngele oshitenga shika itashi vulu okupitilila ndje po inaandi shi nwa, ehalo lyoye nali gwanithwe.” 43 Sho a galuka, natango okwe ya adha ya kotha, oshoka oya li ya sa oomposi noonkondo. 44 Onkee ano okwe ya thigi po ishewe a ka galikane oshikando oshititatu, ta tumbula natango oohapu dha faathana. 45 Opo nduno okwa galukile kaalongwa ye, nokwa ti kuyo: “Omwa kotha natango, notamu vululukwa pethimbo ngaandika? Taleni, ethimbo olya thika Omuna gwomuntu a gandjwe miikaha yaalunde. 46 Thikameni tu yeni. Taleni, omugwaaleki gwandje oku li pokuthika.” 47 Manga a li ta popi, Judas, gumwe gwomaalongwa 12, okwe ya kuye pamwe nongundu onene yi na omagongamwele noondhimbo, ya tumwa kaayambi nokaakuluntu yoshigwana.

48 Omugwaaleki gwe okwe ya tsu onyala,* ta ti: “Ngoka tandi hupita oye tamu kongo; mu kwatii po.” 49 Opo nduno okwa yi a ukilila kuJesus e ta ti: “Muhongi,* wa tokelwa po!” nokwe mu hupita. 50 Ihe Jesus okwa ti kuye: “Kuume, owe ya okuninga shike mpaka?” Opo nduno oya hedha kuJesus e taye mu kwata po. 51 Ihe tala, gumwe gwomaalongwa yaJesus okwa pweya mo egongamwele lye e ta umpile omupiya gwomuyambi omunene, nokwa tete ko okutsi kwe. 52 Opo ihe Jesus okwa ti kuye: “Shuna egongamwele lyoye molumpangwa, oshoka ayehe mboka taya longitha egongamwele otaya si kegongamwele. 53 Nenge oto dhiladhila kutya itandi vulu okwiindila Tate ngashingeyi a tumine ndje aayengeli omayovi?* 54 Ihe ngele osho nda ningi, omanyolo, ngoka taga popi kutya shika osho shi na okuningwa, otaga ka gwanithwa po ngiini?” 55 Pethimbo opo tuu mpoka, Jesus okwa lombwele ongundu ndjoka ta ti: “Omwe ya okukwata ndje po mu na omagongamwele noondhimbo, mwa fa mwe ya okukwata po omuyugi? Esiku nesiku, onda li handi kala nda kuutumba motempeli tandi longo aantu, ihe inamu kwata ndje po. 56 Ihe ashihe shika osha ningwa, opo shoka sha nyolwa kaahunganeki shi gwanithwe.” Opo nduno aalongwa ayehe oye mu thigi po, noya yi ontuku.

57 Mboka ya kwata po Jesus oye mu fala kuKajafas, omuyambi omunene, hoka aalongimpango naakuluntu yoshigwana ya li ya gongala. 58 Ihe Petrus okwa kala e mu landula e li konima kokule, sigo omehale lyomuyambi omunene. Sho a thiki okwa kuutumba pamwe naapiya yomegumbo, opo a tale shoka tashi ningwa po.

59 Opo nduno aayambi aakuluntu nOmpangu ayihe yopombanda yAajuda oya tsu aantu omaminimini,* opo ya vule oku mu dhipaga. 60 Ihe nonando opwa li aalundili oyendji, ina monika ondjo yasha. Lwanima, yaali yomuyo oye ya komeho, 61 noya ti: “Omulumentu nguka okwa ti, ‘Otandi vulu okukumuna po otempeli yaKalunga e tandi yi tungulula muule womasiku gatatu.’” 62 Opo nduno omuyambi omunene okwa thikama e ta ti kuye: “Ito ti ko sha kwaashoka aalumentu mbaka taya ti?” 63 Ihe Jesus okwa kala owala a mwena. Onkee ano omuyambi omunene okwa ti kuye: “Otandi ku ganitha kuKalunga omunamwenyo wu tu lombwele oshili, ngele ongoye Kristus, Omuna gwaKalunga!” 64 Jesus kwa ti kuye: “Eeno, ongaashi we shi popi. Ihe otandi mu lombwele, okuza ngashingeyi, otamu ka mona Omuna gwomuntu a kuutumba kolulyo lwaKalunga omunankondo, note ya e li miikogo yokegulu.” 65 Opo nduno omuyambi omunene okwa tuula onguwo ye yokombanda, ta ti: “Omulumentu nguka okwa sheke Kalunga! Uumbangi ishewe wuni twa pumbwa? Omwe dhi uvu ne yene, sho ta sheke Kalunga. 66 Ne otamu ti ngiini?” Oya yamukula ya ti: “Okwa ilongela okusa.” 67 Opo ihe oye mu hiyile omayeye moshipala, noye mu dhenge noongonyo. Yalwe oye mu dhenge nomankawa moshipala, 68 taya ti: “Ngoye Kristus, tu lombwela* kutya olye e ku dhenge!”

69 Sho Petrus a li a kuutumba mehale, okakadhona kamwe okapiya oke ya kuye e taka ti: “Nangoye wo owa li naJesus Omugalilea!” 70 Ihe okwe shi ipatana komeho gawo ayehe, ta ti: “Kandi shi kutya oto popi kombinga yashike.” 71 Sho a li a uka komweelo, okakadhona kamwe ishewe oke mu dhimbulula, noka lombwele mboka ya li po, taka ti: “Omulumentu nguka naye okwa li pamwe naJesus Omunasaret.” 72 Natango okwe shi ipatana ta gana ta ti: “Omulumentu ngoka kandi mu shi!” 73 Konima yokathimbo, yamwe mboka ya li ya thikama oye ya e taya ti kuPetrus: “Odhoshili kutya nangoye ogumwe gwomuyo, oshoka okupopya kwoye* otaku shi ulike.” 74 Opo nduno okwa tameke okwiithinga ye mwene nokugana, ta ti: “Omulumentu ngoka kandi mu shi!” Opo ihe nziya, ekondombolo olya igi. 75 Nena Petrus okwa dhimbulukwa oohapu, ndhoka Jesus a popile, ndhoka tadhi ti: “Manga ekondombolo inaali iga, oto ka idhimbika ndje lutatu.” Opo nduno okwa yi pondje, nokwa lili nokulililila.