Iilonga yaayapostoli
12 Lwopethimbo ndyoka, omukwaniilwa Herodes okwa tameke okuhepeka yamwe yomaakwanegongalo. 2 Okwa dhipagitha Jakob, omumwayina gwaJohannes, negongamwele. 3 Sho a mono kutya Aajuda oye shi panda, okwa mangitha po wo Petrus. (Shika osha ningwa pethimbo lyoshituthi shiikwiila inaayi tulwa efulika.) 4 Okwe mu mangitha po e te mu tulitha mondholongo, nokwe mu gandja koongundu ne dhaakwiita dhi mu langele tadhi ningi omalufo. Kehe mongundu omwa li aakwiita yane, nokwa li a hala e mu kuthe mo mondholongo,* nelalakano lyoku mu eta komeho goshigwana konima yOpaasa. 5 Onkee ano Petrus okwa kala mondholongo, ihe egongalo olya kala tali galikana kuKalunga, lya mana mo omolwe.
6 Sho Herodes a li poku mu mangulula mo, uusiku mboka, Petrus okwa li a kotha e li pokati kaakwiita yaali, a mangwa nomalyenge gaali, noposheelo opwa li pu na aalangeli, mboka taya tonatele ondholongo. 7 Ihe tala, omuyengeli gwaJehova okwa holoka, nuuyelele owa minikile mokandunda kondholongo. Omuyengeli okwa pupula Petrus molupati, te mu pendula ta ti: “Penduka, endelela! Opo nduno omalyenge oga gu ko komaako ge. 8 Omuyengeli okwa ti kuye: “Ilongekidha e to zala oongaku dhoye.” Shoka osho a ningi. Hugunina, omuyengeli okwa ti kuye: “Zala onguwo yoye yokombanda e to landula ndje.” 9 Opo nduno okwa yi pondje e ta kala e mu landula, ihe ka li e shi ngele shoka tashi ningwa komuyengeli oshoshili. Okwa li nokuli ta dhiladhila kutya emoniko. 10 Oya pitilile ongundu yotango yaalangeli nontiyali, naasho ya thiki pomweelo gwoshitenda gwokuya moshilando, ogwa iyegulula gwo gwene. Sho ya zi mo, oya ende ya lamba epandaanda limwe, na nziya omuyengeli okwa zi po puye. 11 Opo nduno sho Petrus a ndhindhilike shoka sha ningwa po, okwa ti: “Ngashingeyi, ondi shi shi lela kutya Jehova okwa tumu omuyengeli gwe a hupithe ndje miikaha yaHerodes, nokwaashihe shoka Aajuda ya li ya tegelela ndi ningilwe.”
12 Konima sho e shi dhimbulula mo, okwa yi kegumbo lyaMaria, yina yaJohannes, ngoka ha ithanwa Markus, hoka kwa li ku na aantu yontumba ya gongala, noya li taya galikana. 13 Sho a konkola posheelo shomukala, omukadhona omupiya, gwedhina Rode, okwe ya a tale kutya olye ta konkola. 14 Sho a dhimbulula ewi lyaPetrus, okwa li a nyanyukwa noonkondo, noine mu egulula, ihe okwa matukile megumbo e ta lombwele mboka ye li mo kutya Petrus okwa thikama komukala. 15 Oya ti kuye: “Ngoye oto yi oonkwengu.” Ihe okwa tsikile owala ta ti kutya oPetrus. Oya tameke okupopya taya ti: “Omuyengeli gwe.” 16 Ihe Petrus okwa kala posheelo mpoka ta konkola. Sho ya egulula osheelo, oye mu mono noya li ya kumwa. 17 Ihe Petrus okwe ya udhikile noshikaha she, ya kale ya mwena, nokwe ya lombwele ombahu nokawawa* nkene Jehova e mu pititha mo mondholongo, e ta ti: “Iinima mbika yi lombweleni Jakob nosho wo aamwatate.” Opo ihe okwa zi mo, nokwa yi kehala lilwe.
18 Sho kwa shi, aakwiita oya li ya limbililwa kombinga yaashoka sha ningilwa Petrus. 19 Herodes okwa li ta kongo Petrus a itula mo, ihe sho inee mu mona, okwa pulapula aalangeli, nokwa gandja elombwelo ya geelwe. Opo nduno Herodes okwa zi kuJudea, e ta yi kuKesarea, nokwa kala hoka uule wethimbo.
20 Herodes okwa kala a geela* aantu yomuTiro naSidon. Molwaashoka aantu yomiitopolwa mbyoka oya li haye ya okulanda iikulya koshitopolwa, shoka shi li kohi yepangelo lyaHerodes, oya imanga uukuni kumwe, noya yi e taya pula Blastus, omulumentu, ngoka a li ha tonatele egumbo lyomukwaniilwa, e ya kwathele, ya vule okupopya nomukwaniilwa, yo ya pange ombili naye. 21 Esiku limwe, manga aantu ya gongala, Herodes okwa zala onguwo ye yuukwaniilwa e ta kuutumba koshipundi shokupangula, nokwa popi naantu montaneho yawo. 22 Opo nduno aantu mboka ya li ya gongala, oya tameke okwiigidha taya ti: “Ewi ndika olyaKalunga, ihe kali shi lyomuntu!” 23 Nziya, omuyengeli gwaJehova okwe mu dhenge nuuvu, molwaashoka esimano kali e li pe Kalunga, nokwa tukwa komazinyo e ta si.
24 Ihe oohapu dhaJehova odha taandele apuhe, naantu oyendji oya ningi ooitaali.
25 Konima sho Barnabas naSaulus ya thikitha iikwatha yaamwatate kuJerusalem, oya galuka ko pamwe naJohannes, ngoka wo ha ithanwa Markus.