Yotango kAakorinto
5 Onda uvu kutya mokati keni omu na omulumentu ha yi momilalo* nomukulukadhi gwahe, ihe omilalo dha nyata* dha tya ngawo ihadhi ningwa nokuli nomokati kaantu yomiigwana. 2 Mbela oshinima shoka omwe shi panda? Mbela pehala lyaashono, kamu na okukala mwa nika oluhodhi, opo omulumentu, ngono ta longo iilonga ya tya ngaaka, a kuthwe mo mokati keni? 3 Nonando kandi li pamwe nane palutu, ondi li pamwe nane pambepo, nonda pangula nale omulumentu, ngoka ta ningi ngawo, nda fa nale ndi li pune. 4 Uuna mwa gongala pamwe medhina lyOmuwa Jesus, nomu shi kutya ondi li pamwe nane pambepo koonkondo dhOmuwa gwetu Jesus, 5 omu na okugandja omulumentu a tya ngaaka kuSatana, opo enwethomo lye ewinayi* li hulithwe po, nombepo yegongalo yi gamenwe mesiku lyOmuwa.
6 Okwiitanga kweni kaku shi okuwanawa. Mbela kamu shi shi kutya efulika eshona otali vulu okufulika* ondombo ayihe? 7 Kuthii mo efulika ekulu mokati keni, opo mu kale mwa fa ondombo ompe inaayi ya efulika. Oshoka Kristus, onzigona yetu yOpaasa, okwa gandjwa e li eyambo. 8 Onkee ano natu tsikileni okudhana oshituthi, hanefulika ekulu, nenge nefulika lyuuwinayi nolyuukolokoshi, ihe onoshikwiila inaashi tulwa efulika, shuuyogoki noshoshili.
9 Montumwafo yandje, onda li nde mú nyolele mu ethe po okweendathana naantu, mboka haya yi momilalo dha nyata.* 10 Shoka inashi hala okutya omu na okwiitopola ko thiluthilu kaantu yomuuyuni mbuka, mbono haya yi momilalo dha nyata,* nenge aanalwiho, nenge aayugi, nenge aalongeli yiikalunga. Oshoka ngele andola osho, ando muuyuni omu na okuza mo. 11 Ihe ngashingeyi, otandi mú nyolele mu ethe po okweendathana nakehe gumwe ngoka ha ithanwa omumwaho, ihe oha yi momilalo dha nyata,* nenge omunalwiho, nenge omulongeli gwiikalunga, nenge omusheki,* nenge onkolwe, nenge omuyugi; inamu lya nokuli nomuntu a tya ngaaka. 12 Mbela oshinakugwanithwa shandje oshokupangula mboka ye li kondje yegongalo? Mbela ne kamu na okupangula mbono ye li meni lyegongalo, 13 omanga Kalunga ta pangula mboka ye li kondje? “Kuthii mo mokati keni omuntu, ngoka ta longo uuwinayi.”