KAagalati
1 Ngame, omuyapostoli Paulus, inandi langekwa po kaantu yontumba, nenge okupitila momuntu gwontumba, ihe onda langekwa po kuJesus Kristus nokuKalunga, He, ngoka e mu yumudha kuusi, 2 notandi nyolele omagongalo gomuGalatia, tandi shi ningi pamwe naamwatate ayehe, mboka ndi li nayo:
3 Uuwanawahenda nombili, ndjoka hayi zi kuKalunga, Tate yetu, nosho wo kOmuwa Jesus Kristus, nayi kale pamwe nane. 4 Okwa igandja omolwoondjo dhetu, opo a vule oku tu hupitha muuyuni mbuka* wa kolokosha, shoka shi li metsokumwe nehalo lyaKalunga, Tate yetu, 5 ngoka e na okusimanekwa aluhe sigo aluhe. Amen.
6 Osha kumitha ndje, sho mwa etha po nziya Kalunga, ngoka e mú ithana okupitila muuwanawahenda waKristus, nomwa taamba ko onkundana yilwe, ndjoka tamu dhiladhila kutya nayo ombwanawa. 7 Itashi ti kutya oku na onkundana ombwanawa yilwe; ihe opu na aantu yontumba taye mú piyaganeke, noya hala okugoyokitha onkundana ombwanawa kombinga yaKristus. 8 Nokuli kutya nduno otse, nenge omuyengeli a za megulu te mú uvithile onkundana ombwanawa yilwe yi ili, kaayi shi ndjoka twe mú uvithile, na thingwe. 9 Ngaashi twe mu lombwela nale, otandi shi popi wo natango kutya: Kehe ngoka te mú uvithile onkundana ombwanawa yilwe yi ili, kaayi shi ndjoka mwa taamba ko nale, na thingwe.
10 Mbela paulelalela, aantu tandi kambadhala okwoopalela nenge oKalunga? Nenge otandi kambadhala okunyanyudha aantu? Ngele otandi kambadhala okunyanyudha aantu, nena kandi shi omupiya gwaKristus. 11 Oshoka aamwatate, onda hala mu tseye kutya onkundana ombwanawa, ndjoka nde mú uvithile, inayi za kaantu; 12 niishewe, inandi yi pewa kaantu noinandi yi longwa komuntu, ihe onde yi hololelwa kuJesus Kristus.
13 Odhoshili kutya omwa uva kombinga yeihumbato lyandje, sho nda li nale melongelokalunga lyOshijuda, ano kutya onda li handi hepeke noonkondo egongalo lyaKalunga, nonda li nda hala oku li hulitha po. 14 Onda li wo lela tandi humu nawa komeho melongelokalunga lyOshijuda ndi vule aantu oyendji yepipi lyandje moshigwana shetu, oshoka onda li handi dhiginine noonkondo oonkuluhedhi dhootate. 15 Ihe Kalunga, ngoka a pitike ndi valwe, nokwa ithana ndje omolwuuwanawahenda we, okwa mono kutya osha opala, 16 a holole Omwana okupitila mungame, opo ndi vule okuuvithila iigwana onkundana ombwanawa kombinga ye. Onkee ngame inandi ya nando okomuntu* gumwe nziya, ndi ke mu pule omayele; 17 inandi ya wo kuJerusalem, kwaamboka ya ninga aayapostoli tango kungame, ihe onda yi kuArabia, opo nduno onda shuna kuDamaskus.
18 Opo ihe konima yomimvo ndatu, onda yi kuJerusalem, ndi ka talele po Kefas,* nonda kala puye uule womasiku 15. 19 Ihe inandi tsakanena ko nando onomuyapostoli gumwe, kakele kaJakob, omumwayina gwOmuwa. 20 Shi na ko nasha naashoka tandi mú nyolele, otandi gana koshipala shaKalunga kutya itandi fundju.
21 Okuza mpono, onda yi koshitopolwa shaSiria noshaKilikia. 22 Ihe omagongalo gomuJudea, ngoka ga li muukumwe naKristus, kaga li ga mona ndje nando onale. 23 Oga li owala haga uvu taku tiwa: “Omulumentu, ngoka a li he tu hepeke, ngashingeyi, ota uvitha onkundana ombwanawa kombinga yeitaalo, ndyoka a li a hala okuhulitha po.” 24 Onkee ano oya tameke okutanga Kalunga omolwandje.