Timoteus gwotango
6 Mboka ye li kohi yondjoko yuupika naya kale ye wete kutya ooyene yawo oya gwana okusimanekwa thiluthilu, opo edhina lyaKalunga nomalongo ge kaaga shekwe nando. 2 Kakele kaashono, mboka ye na ooyene yawo ooitaali inaya kala ye ya dhina, molwaashoka ye li aamwahe. Pehala lyaashono, naye ya longele nuudhiginini, molwaashoka mboka taya mono mo uuwanawa miilonga yawo iiwanawa oye li ooitaali ooyakwawo naamwahe aaholike.
Tsikila okulonga aantu iinima mbyoka, nokugandja omakumagidho ngaka. 3 Ngele opu na gumwe ta longo omalongo galwe, noita tsu kumwe nomalombwelo omawanawa,* ngoka ga za kOmuwa gwetu, Jesus Kristus, nosho wo nomalongo, ngoka ge li metsokumwe nesimanekokalunga, 4 oku na uuntsa wa pitilila, noke na euvoko lyasha. Oku hole oontamanana unene, nokuludhika kombinga yiitya. Iinima mbyono ohayi ningitha omuntu a kale e na efupa, ondumbo, omulundili* nokufekelela yalwe iinima iiwinayi. 5 Shoka osha ningitha mboka ye na omadhiladhilo omawinayi, nokaye uvite ko we oshili, ya dhiladhile kutya esimanekokalunga otali ya ningitha ya likole sha. 6 Esimanekokalunga otali etele shili omuntu uuwanawa owundji, ihe ongele a gwanenwa kwaashoka e na. 7 Oshoka muuyuni inatu ya mo nasha, noitatu zi mo nasha. 8 Onkee ano ngele otu na iikulya* noonguwo,* natu kale twa gwanenwa kiinima mbyoka.
9 Ihe mboka ya halelela okuninga aayamba otaya gwile memakelo nomomwigo, notaya adhika kuuhalu wa nika uugoya, nowa nika oshiponga, mboka hawu fala aantu mehanagulo nomeyonuko. 10 Oshoka ohole yiimaliwa oyo ekota lyuuwinayi woludhi kehe, naasho yamwe ye yi lalakanene, oya etha po eitaalo, noyi iyetele omaudhigu ogendji.
11 Pehala lyaashono, ngoye, omupiya gwaKalunga, inda ontuku iinima mbyoka. Ihe lalakanena uuyuuki, esimanekokalunga, eitaalo, ohole, eidhidhimiko nokukala wu na omwenyo omwaanawa. 12 Kondja ekondjo ewanawa lyeitaalo; dhiginina omwenyo gwaaluhe, ngoka wi ithanenwa, nowa uvitha nawa kombinga yagwo montaneho yoombangi odhindji.
13 Otandi ku pe omalombwelo koshipala shaKalunga, ngoka ha kaleke iinima ayihe nomwenyo, noshaKristus Jesus, ngoka a gandja uumbangi nawa koshipala shaPontius Pilatus, 14 wu vulike kiipango, wu kale kuu na okapethili kasha, nowu kale wu na eihumbato ewanawa, sigo opokuholoka kwOmuwa gwetu, Jesus Kristus, 15 ngoka omunyanyukwi, noye awike Omupangeli e na oonkondo, note ke dhi holola, uuna ethimbo lya thiki. Oye Omukwaniilwa gwaamboka taya pangele ye li aakwaniilwa, noku li Omuwa gwaamboka taya pangele ye li aawa, 16 ngoka oye awike itaa si, noha kala muuyelele, moka itaamu vulu okuyiwa, nokapu na ngoka a mona mo, nenge ta vulu okumona mo. Oye a gwana okusimanekwa, nokupewa oonkondo dhaaluhe. Amen.
17 Kumagidha* mboka aayamba muuyuni mbuka* kaaya kale ye na uuntsa,* nokaaya tule einekelo lyawo momaliko, ngoka taga hulu po, ihe omuKalunga, ngoka he tu pe iinima ayihe, mbyoka hayi tu nyanyudha. 18 Ya lombwela ya longe uuwanawa, ya udhilila iilonga iiwanawa, ya kale haya gandja, haya topolelathana nayalwe, 19 noyi igongelele eliko, ndyoka tali ka ninga ekankameno lyawo ewanawa monakuyiwa, opo ya vule okwiimonena okukalamwenyo kwashili.
20 Timoteus, tonatela shoka wi inekelelwa, ngoye wu yande oohapu kaadhi na oshilonga, ndhoka tadhi nyateke shoka oshiyapuki; yanda wo shoka shi li ompinge noshili, ndjoka haku tiwa ontseyo aniwa. 21 Sho yamwe yi itangele ontseyo ndjoka, oya etha po eitaalo.
Uuwanawahenda waKalunga nawu kale pamwe nane.