Ontiyali kAatessalonika
2 Aamwatate, shi na ko nasha nokukala po kwOmuwa gwetu, Jesus Kristus, nokugongelwa kwetu, tu ka kale pamwe naye, otatu mú indile, 2 kaamu ethe mu piyaganekwe nuupu, nenge mu tilithwe koohapu dha nwethwa mo,* nenge koohapu dhopakana, nenge kontumwafo aniwa ya fa ya za kutse kutya esiku lyaJehova olya thika.
3 Inamu pukithwa nando okomuntu, molwaashoka manga esiku ndyoka inaali ya, tango, otaku ke ya uushunimonima, opo nduno omudhinimpango ota ka hololwa, ano omuna gwehanagulo. 4 Oku li omutondi, nohi inenepeke, a kale e vule ayehe mboka haku tiwa ookalunga aniwa, nenge iinima, mbyoka hayi longelwa* kaantu, opo andola a kale a fa e li motempeli yaKalunga, nokwiiyulika montaneho onga kalunga. 5 Mbela itamu dhimbulukwa kutya sho nda li pamwe nane, onda li handi mú lombwele kombinga yiinima mbika?
6 Ngashingeyi omu shi shi kutya oshike tashi imbi a hololwe, opo a ka hololwe pethimbo lya opala. 7 Odhoshili kutya uukolokoshi we mboka ote wu longo meholamo, ihe otawu kala owala meholamo, sigo oosho ngoka te mu yi moshipala kee po we. 8 Opo nduno omudhinimpango ngoka ota ka hololwa, nota ka hanagulwa po kOmuwa Jesus nomufudho gwomokana ke, nokuhulithwa po thiluthilu pethimbo lyokukala po kwaJesus. 9 Ihe omudhinimpango ngoka, sho ta ka holoka, ota ka pewa oonkondo kuSatana, opo a longe iilongankondo, omandhindhiliko niikumithalonga yiifundja, 10 okwaanuuyuuki kwoludhi kehe nokupukitha mboka taya ka hanagulwa po, shoka shi li egeelo, molwaashoka kaye hole oshili, noinaye yi taamba ko, opo ya vule okuhupithwa; 11 nomolwaashono Kalunga a etha ya pukithwe, noya itaale omalongo giifundja, 12 opo ayehe ya ka pangulwe, molwaashoka inaya itaala oshili, ihe oya hokwa okwaanuuyuuki.
13 Ihe ohatu pandula aluhe Kalunga omolweni, ne aamwatate, mboka mu holike kuJehova, molwaashoka okuza petameko, Kalunga okwe mú hogolola mu ka hupithwe, moku mú yapula nombepo ye, naasho mwa itaala moshili. 14 Okwe mú hogolola mu ka hupithwe okupitila monkundana ombwanawa, ndjoka tatu mú uvithile, opo mu ka tumbalekwe pamwe nOmuwa gwetu, Jesus Kristus. 15 Onkee ano, aamwatate, kaleni mwa kola nokudhiginina iinima, mbyoka mwa longwa, kutya nduno oyo mbyoka mwa longwa pakana, nenge okupitila montumwafo, ndjoka ya za kutse. 16 Kakele kaashono, Omuwa gwetu, Jesus Kristus, ye mwene nosho wo Kalunga, Tate yetu, ngoka e tu hole, nokwe tu pa ehekeleko lyaaluhe netegameno ewanawa omolwuuwanawahenda we, 17 naye mú hekeleke noku mú koleka, opo mu kale aluhe hamu popi nohamu longo shoka oshiwanawa.