PaLukas
20 Esiku limwe, sho Jesus a li ta longo aantu motempeli, nota tseyitha onkundana ombwanawa, aayambi aakuluntu, aalongimpango nosho wo aakuluntu yoshigwana oye ya mo, 2 noya ti kuye: “Tu lombwela, okoonkondo dhalye ho longo iinima mbika? Nenge olye e ku pa uuthemba mboka?” 3 Jesus okwe ya yamukula ta ti: “Nangame onda hala wo oku mu pula. Lombwelii ndje. 4 Eninginitho, ndyoka lya ningwa kuJohannes, olya za kuKalunga,* nenge olya za kaantu?”* 5 Opo ihe oya tompathana mokati kawo taya ti: “Ngele otwa ti, ‘okuKalunga,’* nena ota ti, ‘Omolwashike nduno inaamu mu itaala?’ 6 Ihe ngele otwa ti, ‘Okaantu,’ nena aantu ayehe otaye tu dhipaga nomamanya, oshoka oya itaala kutya Johannes okwa li omuhunganeki.” 7 Onkee ano oye mu yamukula ya ti kaye shi kutya olya zi peni. 8 Jesus okwa ti kuyo: “Nangame wo itandi mu lombwele kutya okoonkondo dhalye handi longo iinima mbika.”
9 Opo nduno Jesus okwa tameke okulombwela aantu ethaneko ndika tali ti: “Omulumentu gumwe okwa tsike omandjembele moshikunino she, ta kongele mo aaniilonga* e ta yi kondje yoshilongo uule wethimbo. 10 Sho omandjembele ga tiligana, okwa tumu ko omupiya gwe gumwe kaaniilonga yomoshikunino she, e ke mu talele ko iiyimati yimwe kuyo. Ihe aaniilonga konima sho ye mu dhenge, oye mu shunitha ko e li iikaha yowala. 11 Ihe okwa tumu ko ishewe omupiya gulwe, naangoka oye mu dhenge, noye mu sitha ohoni e taye mu shunitha ko e li iikaha yowala. 12 Natango okwa tumu ko omutitatu, naangoka oye mu monitha oshiponga e taye mu umbu mo moshikunino. 13 Opo ihe mwene gwoshikunino shomandjembele okwa ti: ‘Oshike ndi na okuninga po? Otandi tumu ko omumwandjemati, omuholike. Pamwe otaya ka pulakena kuye.’ 14 Sho aaniilonga yomoshikunino ye mu mono, oya lombwelathana taya ti: ‘Nguka oye omuthigululi. Natu mu dhipageni, opo uuthiga we wu ninge wetu!’ 15 Onkee ano oye mu umbu mo moshikunino, noye mu dhipaga. Mbela mwene gwoshikunino shomandjembele ota ka ninga po nduno shike? 16 Ote ya e ta dhipaga aaniilonga mboka, oshikunino e te shi kongele aaniilonga yalwe.”
Aantu sho ya uvu eyele ndyoka, oya ti: “Shoka inashi ningwa yakwetu!” 17 Ihe okwa tala kuyo, nokwa ti: “Enyolo ndino otali ti nduno ngiini, ndyoka tali ti: ‘Emanya, ndyoka aatungi ya tindi, olyo lya ningi emanya lyomohuke lya simanenena kwaagehe’?* 18 Kehe ngoka ta gwile kemanya ndyoka ota tekauka, nakehe ngoka ta gwilwa kulyo otali mu nyanyagula.”
19 Pethimbo olyo tuu ndyoka, aalongimpango naayambi aakuluntu oya li ya hala okukwata po Jesus, molwaashoka oya dhimbulula kutya oyo a li ta popi meyele ndyoka, ihe oya li ya tila aantu. 20 Opo nduno konima sho ya kala taya konenene Jesus, oya tumu aalumentu yamwe, mboka ye ya futu meholamo, ya iningithe ya fa aayuuki, moku mu pula omapulo, ye mu yule moohapu, ndhoka ta popi, opo ye mu gandje miikaha yaamboka ye na oonkondopangelo noyangoloneya. 21 Opo ihe aalumentu mboka oye mu pula taya ti: “Muhongi, otu shi kutya oho popi noho longo aantu paushili, ngoye ku na okatongo, noho longo aantu oshili kombinga yaKalunga. 22 Mbela osha uka* ngaa tu fute iifendela kOmukesari, nenge inashi uka?” 23 Ihe sho Jesus a dhimbulula omakoto gawo, okwa ti kuyo: 24 “Ulukilii ndje ondenari. Mbela ethano nedhina ndika li li ko olyalye?” Oya ti: “OlyOmukesari.” 25 Okwa ti kuyo: “Onkee ano shOmukesari shi peni Omukesari, ihe shoka shaKalunga shi peni Kalunga.” 26 Kaya li taya vulu oku mu yula moohapu montaneho yaantu, ihe molwaashoka oya li ya kuminwa omayamukulo ge, oya kala ya mwena.
27 Ihe yamwe yomAasadukayi, mboka haya ti kutya kaku na eyumuko, oye ya kuye, noye mu pula taya ti: 28 “Muhongi, Moses okwe tu nyolele a ti: ‘Ngele omulumentu okwa silwa omumwayinamati, ye okwa thiga ko omukulukadhi, noke na aanona, mumwayina oku na okukutha po omukulukadhi gwe, opo a valele mumwayina aanona.’ 29 Opwa li aamwayinamati yaheyali. Gwotango okwa hokana, ihe okwa si kee na aanona. 30 Onkee ano shika osha ningilwa wo omutiyali, 31 nokwa hokanwa po komutitatu. Ayehe yaheyali oya li ye mu hokana, noya si kaaye na aanona. 32 Hugunina, omukulukadhi ngoka naye okwa si. 33 Onkee ano sho aasi taya ka yumudhwa, omukulukadhi ngoka ota ka ninga gwalye, ngele ayehe yaheyali oya li ye mu hokana?”
34 Jesus okwa ti kuyo: “Aantu yomuuyuni mbuka* ohaya hokana, nohaya hokanwa, 35 ihe mboka ya gwana okuyumudhwa kuusi nokuya muuyuni mbwiyaka tawu ya itaya ka hokana, noitaya ka hokanwa. 36 Odhoshili kutya itaya ka sa we nando, oshoka otaya ka kala ongaayengeli megulu. Molwaashoka otaya ka yumudhwa, otaya ka kala oyana yaKalunga. 37 Ihe Moses naye okwa holola nokuli mehokololo kombinga yoshihwa sheno kutya aasi otaya ka yumudhwa, sho a popi kutya Jehova oKalunga kaAbraham, Kalunga kaIsak naKalunga kaJakob.’ 38 Oye Kalunga kaanamwenyo, ihe ke shi Kalunga kaasi, oshoka ayehe okwe ya tala ko* ye na omwenyo.” 39 Opo ihe aalongimpango yamwe oye mu yamukula ya ti: “Muhongi, shoka wa popi oshoshili.” 40 Oshoka kaya li we ye na omukumo gwoku mu pula sha.
41 Jesus naye okwe ya pula wo a ti: “Omolwashike nduno aantu haya ti kutya Kristus Omuna gwaDavid? 42 Oshoka David ye mwene okwa popi membo lyOmapisalomi ta ti: ‘Jehova okwa lombwele Omuwa gwandje a ti: “Kuutumba kolulyo lwandje, 43 sigo nda ningi aatondi yoye oshilyatelo shoompadhi dhoye.’” 44 Ano ngele David okwe mu ithana Omuwa, ongiini nduno e li omwana gwe?”
45 Opo nduno manga aantu ayehe ya li ya pulakena, okwa ti kaalongwa ye: 46 “Kotokeleni aalongimpango, mboka ye hole okweenda ya zala oonguwo oondeendeka, noye hole okupopithwa momukalo gwa ikalekelwa pomahala gomalandithilo, okukuutumba kiipundi yokomeho* moosinagoga, nopiituthi oye hole okukuutumba pomahala, ngoka ga nuninwa aayenda, mboka ya simana, 47 nohaya yugu aaselekadhi iinima yawo,* nohaya galikana omagalikano omaleeleka, opo ya pandike kaantu. Aantu ya tya ngaaka otaya ka mona epangulo edhigu noonkondo.”