Yotango kAakorinto
14 Tsikileni okuulika ohole nokulalakanena* omagano gopambepo, unene tuu omagano gokuhunganeka. 2 Oshoka ngoka ta popi momalaka, ita popi naantu, ihe ota popi naKalunga, oshoka kapu na ngoka e uvite ko shoka ta ti, molwaashoka ota popi iiholekwa iiyapuki kekwatho lyombepo. 3 Ihe ngoka ta hunganeke, ota tungu, ota tsu omukumo, nota hekeleke aantu noohapu dhe. 4 Ngoka ta popi momalaka ota itungu ye mwene, ihe ngoka ta hunganeke ota tungu egongalo. 5 Onda hala amuhe mu popye momalaka, ihe onda hala unene mu hunganeke. Oshoka ngoka ta hunganeke oku vule ngoka ta popi momalaka, shila ongele ta fatulula,* opo egongalo li vule okutungwa. 6 Ihe aamwatate, pompito ndjika, ngele onde ya kune tandi popi momalaka, mbela otashi mú etele uuwanawa washike, ngele itandi mu lombwele shoka nda hololelwa kuKalunga, nenge tandi popi nontseyo, nenge tandi hunganeke, nenge tandi mú longo?
7 Shoka osha faathana niinima, mbyoka kaayi na omwenyo, ngaashi iihikomwa, mbyoka hayi kwelengendja, kutya nduno okafiloli, nenge okaharpa. Ngele omuntu ota hiki okafiloli, nenge okaharpa nomutono gumwe owala, oto vulu ngiini okundhindhilika mo omusika, ndjoka ta hiki? 8 Oshoka ngele enkuma olya hikwa inaali yela nawa, olye ta ka ilongekidhila olugodhi? 9 Momukalo gwa faathana, ngele oto popi momalaka, ihe ito popi momukalo gu shi okuuviwa ko nuupu, aantu otaya ka uva ko ngiini shoka to popi? Kungawo, oto ka kala wa fa to popi mombepo. 10 Otashi vulika muuyuni mu na omalaka ogendji gi ili nogi ili, ihe kapu na ndyoka ihaali vulu okuuviwa ko. 11 Oshoka ngele kandi uvite ko eityo lyaashoka tashi popiwa, otandi kala nda fa omukwiilongo kwaangoka ta popi, naangoka ta popi ota kala a fa omukwiilongo kungame. 12 Onkee ano nane molwaashoka omwa halelela omagano gombepo ondjapuki, lalakaneneni okukala mwa udha omagano, ngono taga tungu egongalo.
13 Onkee ano ngoka ha popi momalaka na galikane, a kale ha vulu oku ga fatulula.* 14 Oshoka uuna tandi galikana melaka lilwe, hangame tandi popi, ihe omagano, ngoka nda pewa okupitila mombepo ondjapuki. Onkee ano ihandi kala ndi uvite ko shoka tandi popi. 15 Oshike nduno shi na okuningwa po? Ondi na okugalikana tandi longitha omagano gandje gopambepo, ihe ondi na wo okugalikana iinima yi uvitiwe ko. Ondi na okwiimba omaimbilohambelelo tandi longitha omagano gopambepo, ihe ondi na wo okwiimba omaimbilohambelelo ge uvitiwe ko. 16 Ngele hasho, uuna to hambelele to longitha omagano goye gopambepo, ngoka wu li naye ota vulu ngiini okutya “Amen,” sho to gandja omapandulo goye, ngele ke uvite ko shoka to ti? 17 Odhoshili kutya ngoye oto gandja omapandulo momukalo omwaanawa, ihe gulwe itashi mu tungu sha. 18 Otandi pandula Kalunga, sho handi popi omalaka ogendji ndi mu vule amuhe. 19 Kakele kaashono, oshihwepo okupopya iitya itano megongalo yi uvitiwe ko, opo ndi vule wo okulonga yalwe, shi vulithe okupopya iitya omayovi omulongo momalaka.
20 Aamwatate, inamu kala hamu dhiladhila ngaashi uunona, ihe kaleni hamu dhiladhila ngaashi aakuluntu, nokukala mwa fa aanona, ngele tashi ya pokulonga uuwinayi. 21 MOmpango omwa nyolwa taku ti: “Jehova ota ti: ‘Otandi ka popya naantu mbaka momalaka omakwiilongo, notandi ka longitha aantu, mboka kaaye shi, ihe nonando ongawo, itaya ka pulakena kungame.’” 22 Onkee ano omalaka oge li uumbangi kwaamboka kaaye shi ooitaali, ya itaale, ihe hakulonga ooitaali, omanga omahunganeko kage shi gaamboka kaaye shi ooitaali, ihe ogooitaali. 23 Onkee ano ngele egongalo olya gongala pehala limwe, naayehe otaya popi momalaka, ihe omuntu gulwe, nenge ngoka kee shi omwiitaali okwe ya mo, mbela ita ka tya kutya kamu li nawa momitse? 24 Ihe ngele amuhe otamu hunganeke, naangoka kee shi omwiitaali, nenge omuntu gulwe okwe ya mo, amuhe otamu ke mu pukulula, noku mu konakona nawa. 25 Iiholekwa yomomutima gwe otayi ya puuyelele, nota ka inyongamena pevi, nokugalikana Kalunga ta ti: “Kalunga oku li shili mokati keni.”
26 Aamwatate, oshike nduno shi na okuningwa po? Uuna mwa gongala pamwe, gumwe na imbe omapisalomi, namukwawo na longe aantu, gumwe na popye iinima, mbyoka a hololelwa kuKalunga, gumwe na popye momalaka, nagulwe na fatulule. Iinima ayihe nayi ningwe nelalakano lyokutungathana. 27 Ngele gumwe ta popi momalaka, na popye ngaa ge li gaali, nenge gatatu, ye gumwe ta fatulula.* 28 Ihe ngele kapu na ngoka ta fatulula,* na kale a mwena megongalo e ta ipopile momutima gwe mwene nosho wo naKalunga. 29 Aahunganeki yaali, nenge yatatu naya popye, yo yalwe taya tala kutya eityo olini. 30 Ihe ngele gulwe okwa hololelwa sha kuKalunga, manga a kuutumba mpoka, ngoka a adhika ta popi na mwene. 31 Oshoka omuntu owala gumwe ta vulu okuhunganeka poshikando, opo ayehe ya vule okwiilonga mo sha, naayehe ya vule okutsuwa omukumo. 32 Aahunganeki ayehe, mboka ya pewa omagano gokuhunganeka okupitila mombepo ondjapuki, oye na okukala ye na eipangelo. 33 Oshoka Kalunga ke shi Kalunga kevundakano, ihe okombili.
Ngaashi shi li momagongalo agehe gaayapuki, 34 aakiintu naya kale ya mwena momagongalo, oshoka inaya pitikwa ya popye. Pehala lyaashono, naya vulike, ngaashi Ompango wo tayi ti. 35 Ngele oya hala okutseya oshinima shontumba, naya ka pule aasamane yawo komagumbo, oshoka otashi sitha ohoni, ngele omukiintu ta popi megongalo.
36 Mbela oohapu dhaKalunga odha za kune, nenge one owala mwe dhi pewa?
37 Ngele gumwe ota dhiladhila kutya ye omuhunganeki, nenge okwa pewa omagano gombepo ondjapuki, oku na okuzimina kutya iinima, mbyoka tandi mú nyolele, oyi li iipango yOmuwa. 38 Ihe ngele gumwe okwe yi dhini, naye ota dhinika.* 39 Onkee ano, aamwatate, tsikileni okuhunganeka, noinamu keelela ngoka ta popi momalaka. 40 Ihe iinima ayihe nayi ningwe momukalo omwaanawa nopalandulathano.