KAaefeso
6 Aanona, vulikeni kaavali yeni, ngaashi owala Omuwa e shi hala, oshoka osha uka oku shi ninga ngaaka. 2 “Simaneka ho nanyoko” osho oshipango shotango shi na euvaneko tali ti: 3 “Opo wu kale wu na onkalamwenyo ombwanawa,* nowu kale nomwenyo omule kombanda yevi.” 4 Ootate, inamu yemateka oyana yeni, ihe ya putudheni noku ya dheula metsokumwe newiliko* lyaJehova.
5 Aapika, vulikeni kooyene yeni yopantu,* tamu shi ningi netilo nokukakama, nokuvulika nomutima aguhe, onga tamu shi ningile Kristus, 6 hangele owala mu wetike, opo mu pandike kaantu,* ihe onga aapiya yaKristus taya longo ehalo lyaKalunga nomwenyo* aguhe. 7 Longeleni ooyene yeni nehalo ewanawa, onga tamu longele Jehova, ihe haantu, 8 oshoka omu shi shi kutya kehe gumwe, kutya nduno omupika, nenge okwa manguluka,* ota ka pewa ondjambi kuJehova omolwiilonga ye iiwanawa. 9 Shimwe ishewe, ne ooyene, inamu ungaunga nayi naapika yeni, noinamu ya ningila omatilitho, oshoka omu shi shi kutya Mwene gwawo nosho wo gweni oku li megulu, noke na okatongo.
10 Hugunina, tsikileni okupewa oonkondo kOmuwa, molwaashoka oonkondo dhe oonene. 11 Zaleni iikondjitho ayihe, mbyoka mwa pewa kuKalunga, opo mu vule okukandeka omakotokelo* gOndiyapoli, 12 molwaashoka itatu kondjitha onyama nombinzi, ihe otatu kondjitha omapangelo, mboka ye na oonkondopangelo, naapangeli yuuyuni mbuka womilema, ano oombepo dha nyata dhomewangandjo. 13 Omolwetompelo ndyoka, zaleni iikondjitho ayihe, mbyoka Kalunga e mú pa, opo mu vule okwiigamena pomathimbo omawinayi, nokonima ngele mwa gwanitha po ayihe, mu kale mwa kolelela.
14 Onkee ano kaleni mwa kolelela, mwa zala epaya lyoshili miiya yeni,* nomu zale oshipapa shuuyuuki poontulo dheni, 15 zaleni wo oongaku koompadhi dheni, mwa ilongekidhila okuuvitha onkundana ombwanawa yombili. 16 Kakele kaashono, kutheni ehuyanza* enene lyeitaalo, opo mu vule okudhima nalyo iikuti* ayihe yamwiinayi ya hwama omulilo. 17 Shimwe ishewe, zaleni egala lyosheela lyehupitho, nokuhomata egongamwele lyombepo, sha hala okutya, oohapu dhaKalunga, 18 okugalikana omagalikano gi ili nogi ili nokwiindila pompito kehe, tamu wilikwa kombepo. Omolwetompelo ndyono, kaleni mwa tonata nokugalikana aluhe kombinga yaayapuki ayehe. 19 Galikanenii ndje wo, ndi pewe oohapu, ndhoka ndi na okupopya, opo ndi vule okupopya nuulaadhi, sho tandi uvitha kombinga yoshiholekwa oshiyapuki shonkundana ombwanawa. 20 Kalunga oye a tuma ndje ndi uvithe onkundana ombwanawa, nomolwaashono nda mangwa nomalyenge. Galikanenii ndje kuKalunga, opo ndi vule okupopya nuulaadhi kombinga yonkundana ombwanawa kaandi na uumbanda, ngaashi shi na okukala.
21 Omumwatate omuholike nomupiya gwOmuwa omudhiginini, Tikikus, ote ke mú tseyithila ashihe kombinga yiilonga yandje nankene ndi li po. 22 Otandi mu tumu nelalakano ndika, opo e mú tseyithile kutya otu li po ngiini, noku mú hekeleke.
23 Aamwatate naya kale nombili, nohole neitaalo, ndyoka hali zi kuKalunga Tate nokOmuwa Jesus Kristus. 24 Uuwanawahenda nawu kale pamwe naayehe, mboka ye hole Omuwa gwetu Jesus Kristus nohole yaaluhe.