paMarkus
7 Opo ihe Aafarisayi naalongimpango yamwe, mboka ya za kuJerusalem, oya gongalele Jesus, 2 noya mono aalongwa ye yamwe taya li inaaya iyoga kiikaha.* 3 (Aafarisayi nAajuda ayehe kaya li haya li inaaya iyoga kiikaha, sigo opoongolo dhomaako, oshoka oya li haya dhiginine oonkuluhedhi dhaakulu yonale, 4 nuuna ya zi komahala gomalandithilo, kaya li haya li, omanga inaaya iyoga olutu aluhe. Oya li wo ya taamba ko oonkuluhedhi odhindji, ndhoka ya li ya kakatela kudho, ngaashi okweenditha momeya* iitenga, iiyuma niikwatelwa ya longwa mongopolo.) 5 Onkee ano Aafarisayi naalongimpango oye mu pula ya ti: “Omolwashike aalongwa yoye ihaaya dhiginine oonkuluhedhi dhaakulu yonale, sho haya li niikaha inaayi yogwa?” 6 Okwa ti kuyo: “Jesaja okwa hunganeke oshili kombinga yeni, aafudhime ne, sho a nyola a ti: ‘Aantu mbaka ohaya simaneke ndje owala mokana, ihe omitima dhawo odhi li kokule nangame. 7 Okulongela ndje kwawo osima yowala, oshoka shoka haya longo osha ikolelela komalongo gopantu.’ 8 Omwa ekelahi ompango yaKalunga nomwa dhiginina oonkuluhedhi dhopantu.”
9 Shimwe ishewe, Jesus okwe ya lombwele ta ti: “Ohamu ipwililikile owina ompango yaKalunga e tamu dhiginine oonkuluhedhi dheni. 10 Pashiholelwa, Moses okwa tile: ‘Simaneka ho nanyoko,’ nokwa tile wo: ‘Ngoka ta tuku* he, nenge yina, na dhipagwe.’ 11 Ihe ne ohamu ti: ‘Kehe ngoka ta ti kuhe, nenge kuyina: “Shoka nda li ndi na oku ku pa oshi li okorban, (sha hala okutya, omagano ga yapulilwa Kalunga).”’ 12 Nena omuntu ngoka ihamu mu pitike we a kwathe he nenge yina. 13 Kungawo omwa kutha oohapu dhaKalunga oonkondo omolwoonkuluhedhi dheni, ndhoka mwa longa yalwe, nohamu ningi iinima oyindji ya fa mpoka.” 14 Onkee ano sho a ithana ishewe ongundu yaantu kuye, okwe ya lombwele ta ti: “Pulakeneni amuhe kungame e tamu uvu ko eityo lyaashoka tandi popi. 15 Omuntu iha nyatekwa kiinima mbyoka hayi yi meni lye; ihe oha nyatekwa kwaambyoka hayi zi meni lye.” 16 ——
17 Opo nduno sho a topoka nongundu yaantu, okwa yi megumbo lyontumba, naalongwa ye oya tameke oku mu pula kombinga yethaneko ndyoka. 18 Onkee ano okwa ti kuyo: “Nani nane kamu uvite ko mwe ya fa? Kamu shi shi kutya omuntu iha nyatekwa kiinima, mbyoka hayi yi meni lye, 19 oshoka shoka hashi yi meni lye ihashi yi momutima gwe, ihe ohashi yi mepunda lye e tashi piti mo?” Kungawo okwa yelitha kutya iikulya ayihe oya yogoka. 20 Okwa gwedha ko wo a ti: “Omuntu oha nyatekwa kwaashoka hashi zi meni lye, 21 oshoka momutima gwomuntu omo hamu zi omadhiladhilo omawinayi, ngaashi omilalo dha nyata,* uufuthi, omadhipago, 22 oluhondelo, olwiho, uukolokoshi, uukengeleledhi, okuyona nopwaa na uuhwenge,* efupa, omasheko, uuntsa nuugoya. 23 Iinima ayihe mbika iiwinayi ohayi zi meni lyomuntu, noyo hayi mu nyateke.”
24 Okwa zi po mpoka e ta yi koshitopolwa shaTiro naSidon. Opo nduno okwa yi megumbo lyontumba, noka li a hala aantu ya tseye kutya omo e li moshitopolwa, ihe aantu oye shi tseya. 25 Nziya, omukiintu gumwe, ngoka a li e na okamwanakadhona ke na ombepo ya nyata,* okwa uvu kombinga ye, nokwe ya kuye e ta tsu oongolo poompadhi dhe. 26 Omukiintu ngoka okwa li Omugreka, a valelwa muFoinikia shomuSiria, nokwa kala ta indile Jesus a tidhe mo ondemoni mokamwanakadhona. 27 Ihe Jesus okwa ti kuye: “Tango etha aanona ya lye e taya kuta, oshoka kashi li mondjila okukutha oshikwiila shaanona noku shi umbila uumbwena.” 28 Ihe omukiintu ngoka okwe mu yamukula a ti: “Eeno, omusimanekwa, nokuli nuumbwena wo ohawu li uundjagumuke, mboka aanona ya gwithila kohi yoshitaafula.” 29 Opo ihe okwa ti kuye: “Omolwoohapu ndhika wa popi, inda kegumbo, ondemoni oya za mo momumwoye.” 30 Onkee ano sho a yi kegumbo, okwa adha okamwanakadhona ka lala kombete, nondemoni ya za mo nale muko.
31 Sho Jesus a galuka ko koshitopolwa shaTiro, okwa pitile muSidon a uka kEfuta lyaGalilea, nokwa pitile wo moshitopolwa shaDekapolis.* 32 Hoka aantu oya etele Jesus omulumentu ombolo ngoka wo ihaa popi nawa, noye mu indile e mu tenteke iikaha ye. 33 Opo nduno okwe mu kutha mongundu yaantu ye ki ikalele. Opo ihe okwa tula ominwe dhe momakutsi gomulumentu ngoka, nokonima sho Jesus a hiya omayeye, okwa gumu elaka lye. 34 Sho Jesus a ligamene kegulu okwa fudha muule nokwa ti kuye: “Efata,” shoka tashi ti, “Thituluka.” 35 Opo ihe omakutsi ge oga thituluka, nelaka lye olya manguluka e ta tameke okupopya nawa. 36 Opo nduno okwa indike aantu mboka ya li po kaaye shi lombwele nando omuntu. Ihe nonando okwa kala noku ya lombwela kaaye shi popye, oya tsikile noku shi hokolola. 37 Oya li nokuli ya kumwa noonkondo noya ti: “Iilonga ye ayihe iiwanawa. Okwa thitulula omakutsi goombolo nokwa ningitha aathitawi ya popye.”