PaLukas

10 Konima yiinima mbika, Omuwa okwa hogolola aalongwa yalwe 70, nokwe ya tumu ooyaali nooyaali, ye mu tetekele koshilando nokehala kehe, hoka a li ta ka ya. 2 Opo nduno okwa ti kuyo: “Eeno, iilonga yokuteya oyindji, ihe aaniilonga aashona. Onkee ano indileni Mwene gweteyo, a tume aaniilonga keteyo lye. 3 Indeni, ihe kaleni mwa kotoka, oshoka otandi mu tumu ongoonzi mokati komambungu. 4 Inamu ya nokampunda kiimaliwa, nenge nompunda yiikulya, nenge noongaku,* noinamu kunda nando omuntu* mondjila. 5 Uuna tamu yi megumbo lyontumba, tyeni tango: ‘Ombili nayi kale megumbo ndika.’ 6 Ngele megumbo moka omu na omunambili,* ombili ndjoka mwe mu halela nayi kale naye. Ihe ngele kamu na sha, nayi mu galukile. 7 Onkee ano kaleni megumbo ndyoka e tamu li nokunwa kehe shoka taye mu pe, oshoka omuniilonga okwa ilongela ondjambi ye. Inamu kala tamu tembukatembuka nomagumbo.

8 “Shimwe ishewe, uuna tamu yi moshilando, aantu e taye mu taamba ko, lyeni shoka taye mu pe 9 e tamu aludha aavu, mboka ye li mo, noku ya lombwela tamu ti: ‘Uukwaniilwa waKalunga owa hedha popepi nane.’ 10 Ihe uuna tamu yi moshilando, aantu e taya kala inaaye mu taamba ko, indeni momapandaanda gasho e tamu ti: 11 ‘Otwa ipupula nokuli nontsi yomoshilando sheni koompadhi dhetu, tu mu pe uusama. Ihe tseyeni kutya Uukwaniilwa waKalunga owa hedha popepi.’ 12 Ngame otandi mu lombwele, mesiku lyepangulo, egeelo lyoshilando shoka otali ka kala enene li vule lyaSodom.

13 “Yayee, ngoye Korasin! Yayee, ngoye Betsaida! Oshoka andola muTiro nomuSidon omo mwa ningilwe iikumithalonga, mbyoka ya longelwe mune, ando iilando mbyoka oya itedhulula nale, mokuzala omahahi nokukuutumba momutoko. 14 Onkee ano mesiku lyepangulo, egeelo lyeni otali ka kala enene li vule lyaTiro naSidon. 15 Mbela ngoye Kapernaum, oto ka yelwa wu ye megulu? Oto ka kulukila mOmbila.*

16 “Ngoka ta pulakene kune, ota pulakene wo kungame. Nakehe ngoka itee mu taamba, ita taamba ndje ko wo. Shimwe ishewe, kehe ngoka itaa taamba ndje, ita taamba ko wo Ngoka a tuma ndje.”

17 Opo nduno aalongwa 70 oya galuka ya nyanyukwa, taya ti: “Omuwa, noondemoni odha vulika nokuli kutse, sho twa longitha edhina lyoye.” 18 Opo ihe Jesus okwa ti kuyo: “Ondi wete nale Satana a gwa megulu a fa olwaadhi. 19 Taleni, onde mu pa oonkondo dhokulyatagula omayoka noondje nodho ku sinda oonkondo adhihe dhomutondi, nokapu na shoka tashi ke mu etela oshiponga. 20 Nonando ongawo, inamu nyanyukwa molwaashoka oombepo dha nyata dha vulika kune, ihe nyanyukweni, molwaashoka omadhina geni ga nyolwa megulu.” 21 Pethimbo olyo tuu ndyoka, Jesus okwa udhithwa enyanyu kombepo ondjapuki, nokwa ti: “Otandi ku hambelele montaneho, Tate, Omuwa gwegulu nogwevi, oshoka iinima mbika owe yi holeke nuukeka aanandunge naalongwantu, ihe owe yi hololele aanona. Eeno, Tate, molwaashoka shika osho she ku opalela. 22 Iinima ayihe onde yi pewa kuTate, nokapu na ngoka e shi Omwana, kakele kaHe; nokapu na ngoka e shi He, kakele kOmwana, nakehe ngoka Omwana a hala oku mu hololela He.”

23 Opo ihe Jesus okwa taalele kaalongwa ye e te ya lombwele ye li po oyo ayeke, ta ti: “Aantu, mboka omeho gawo ge wete iinima mbika, oyo aanelago,* 24 oshoka ngame otandi mu lombwele, aahunganeki naakwaniilwa oya li ya halelela okumona iinima, mbyoka mwe yi mono, ihe inaye yi mona, noya li ya hala okuuva iinima, mbyoka mwe yi uvu, ihe inaye yi uva.”

25 Ihe tala, omulumentu gumwe, ngoka e shi Ompango nawa, okwa thikama e mu makele, nokwa ti kuye: “Muhongi, ondi na okuninga shike, opo ndi ka mone omwenyo gwaaluhe?” 26 Jesus okwa ti kuye: “MOmpango omwa nyolwa shike?” Owu yi uvite ko ngiini?” 27 Okwe mu yamukula a ti: “‘Hola Jehova Kalunga koye nomutima gwoye aguhe, nomwenyo* gwoye aguhe, noonkondo dhoye adhihe, nomadhiladhilo goye agehe’ nosho wo ‘hola mukweni ngaashi wu ihole mwene.’” 28 Jesus okwa ti kuye: “Owa yamukula mondjila. Tsikila oku shi ninga, noto ka mona omwenyo gwaaluhe.

29 Ihe molwaashoka omulumentu ngoka okwa li a hala okwiimonikitha kutya ye omuyuuki, okwa ti kuJesus: “Mukwetu olye naanaa?” 30 Jesus okwe mu yamukula ta ti: “Omulumentu gumwe okwa li ta zi kuJerusalem a uka kuJeriko nokwa adhika kaayugi. Oye mu hula onguwo ye e taye mu dhenge, noye mu thigi e na okamwenyo okashona. 31 Omuyambi gumwe okwa li ta ende mondjila ndjoka, ihe sho e mu mono, okwa tsu mooha dhondjila e te mu pitilile. 32 Sha faathana, Omulevi gumwe, sho e ya pehala mpoka e te mu mono, okwa tsu wo mooha dhondjila e te mu pitilile. 33 Ihe sho Omusamaria gwontumba, ngoka a li ta ende nondjila oyo tuu ndjoka, e mu mono, okwa li e mu uvitile olukeno.* 34 Onkee ano okwa yi puye e ta tile iilalo ye omagadhi nomaviinu e te yi manga. Opo nduno okwe mu londeke koshimuna she e te mu fala kegumbo lyaayenda e ke mu sile oshimpwiyu. 35 Esiku lya landula ko, okwa kutha oondenari mbali e te dhi pe mwene gwehala, nokwa ti kuye: ‘Mu sila oshimpwiyu, nongele owa longitha oshindji shi vulithe pwaashoka, otandi ya ndi ku fute, sho tandi galuka.’ 36 Olye gwomaalumentu mbaka yatatu a ulike kutya omukwawo* gwomulumentu, ngoka a adhika kaayugi?” 37 Okwa ti kuye: “Oongoka e mu sile ohenda.” Opo nduno Jesus okwa ti kuye: “Inda ano e to ka ninga sha faathana.”

38 Sho ya tsikile nondjila yawo, Jesus okwa yi momukunda gwontumba. Opo ihe omukiintu gwedhina Marta okwe mu taamba maandjawo. 39 Marta okwa li wo e na omumwayina gwedhina Maria, ngoka a li a kuutumba poompadhi dhOmuwa, nokwa kala ta pulakene kwaashoka ta ti.* 40 Mepingathano naMaria, Marta okwa li a ipyakidhila niinima oyindji. Onkee ano okwe ya kuJesus e ta ti: “Omuwa, ku na ko nasha, sho omumwameme a ethela ndje po owala? Mu lombwela, e ye a kwathele ndje.” 41 Omuwa okwe mu yamukula a ti: “Marta, Marta, owu na oshimpwiyu unene, nowa ipyakidhila niinima oyindji. 42 Inatu pumbwa iinima oyindji, ihe iishona owala. Maria okwa ihogololela shoka sha dhenga mbanda,* nokapu na ngoka te shi mu kutha.”