Yotango kAakorinto

3 Onkee ano, aamwatate, kanda li tandi vulu okupopya nane ngaashi tandi popi naantu, mboka taya wilikwa kombepo, ihe ongaashi tandi popi naantu yopanyama, onguuhanona muKristus. 2 Onde mú pe omahini, ihe haikulya ya kola, oshoka kamwa li natango mwa koka noku yi lya. Ihe nongashingeyi inamu koka noku yi lya, 3 oshoka natango ohamu dhiladhila panyama. Molwaashoka mokati keni omu na ondumbo nomahilathano, mbela kungawo ihamu dhiladhila panyama, nokuninga iinima, mbyoka aantu yomuuyuni haya ningi? 4 Oshoka ngele gumwe ota ti: “Ngame ogwaPaulus,” namukwawo gulwe ota ti: “Ngame ogwaApollos,” mbela kungawo itamu ihumbata mwa fa aantu yomuuyuni?

5 Apollos oshike ano? Ye Paulus oshike? Oye li owala aayakuli, mboka ye mú kwathele mú ninge ooitaali, ngaashi ya lombwelwa kOmuwa ye shi ninge. 6 Ngame onda kuna, Apollos e ta tekele, ihe Kalunga oye ha menitha e ta kokitha, 7 opo esimano kaali pewe ngoka a kuna, nenge ngoka a tekela, ihe li pewe Kalunga, ngoka ha kokitha. 8 Kapu na eyooloko pokati kaangoka a kuna naangoka a tekela,* ihe kehe gumwe ota ka pewa ondjambi, sha ikolelela kiilonga ye. 9 Oshoka tse aalongi pamwe naKalunga. Ihe ne epya lyaKalunga, ndyoka tali longwa, ano etungo lyaKalunga.

10 Sha ikolelela kuuwanawahenda waKalunga, mboka nda ulukilwa, onda tungu ekankameno ngaashi omutungi onkulungu,* ihe gulwe ota tungile ko kulyo. Nonando ongawo, kehe gumwe na tale nkene ta kala ta tungile ko kulyo. 11 Oshoka kapu na nando ogumwe ta vulu okutunga ekankameno lilwe li ili, li vule ndyoka lya tungwa nale, ndyono li li Jesus Kristus. 12 Ngele opu na gumwe ngoka ta tungile kekankameno ndyoka noshingoli, noshisiliveli, nomamanya gondilo, niiti, nomwiidhi, nenge niihenguti, 13 esiku otali ya, uuna iilonga yakehe gumwe tayi ka hololwa kutya oya tya ngiini komulilo. Omulilo otagu ka ulika kutya kehe gumwe okwa longa oshilonga shi li ngiini. 14 Ihe ngele shoka omuntu a tungila kekankameno inashi hanagulwa po komulilo, ota ka pewa ondjambi; 15 ngele shoka omuntu a tungila kekankameno osha pi po, ota kanitha shoka a tunga, ihe ye ota ka hupithwa, a fa a hupa momulilo.

16 Mbela kamu shi shi kutya ne yene otempeli yaKalunga, nombepo yaKalunga oyi li mune? 17 Ngele gumwe okwa hanagula po otempeli yaKalunga, Kalunga ote ke mu hanagula po. Oshoka otempeli yaKalunga ondjapuki, nane one otempeli ndjoka.

18 Inamu ifundjaleka. Ngele opu na gumwe ta dhiladhila kutya ye omunandunge muuyuni mbuka,* na ninge omugoya, opo a ninge omunandunge. 19 Oshoka uunongo wuuyuni mbuka owo uugoya koshipala shaKalunga, oshoka okwa nyolwa taku ti: “Aanongo ote ya kwata momakoto gawo.” 20 Natango omanyolo otaga ti: “Jehova okwa tseya kutya okudhiladhila kwaanongo osima yowala.” 21 Onkee ano inapu kala nando ogumwe ta itangele omuntu; oshoka iinima ayihe oyeni, 22 kutya nduno oPaulus, nenge oApollos, nenge oKefas,* nenge uuyuni, nenge omwenyo, nenge eso, nenge iinima, mbyoka yi li ko ngashingeyi, nenge mbyono tayi ke ya; iinima ayihe oyeni. 23 Ihe ne oyaKristus; omanga Kristus ogwaKalunga.