PaLukas

24 Mesiku lyotango lyoshiwike, aakiintu mboka oye ya ongula onene kombila* ya etelela iigwanga ya nika nawa, mbyoka ya longekidha. 2 Ihe oya adha nale emanya lya undulwa po pombila,* 3 naasho ya yi mo, omudhimba gwOmuwa Jesus inaye gu adha mo. 4 Manga ya li ya limbililwa kombinga yoshinima shoka, tala, puyo opwa holoka aalumentu yaali, ya zala oonguwo tadhi adhima. 5 Aakiintu mboka oya tameke okukala ya tila, noya sizimaneke iipala yawo pevi. Onkee ano aalumentu mboka oya ti kuyo: “Omolwashike tamu kongo ngoka e na omwenyo mokati kaasi? 6 Ke po mpaka, ihe okwa yumudhwa. Dhimbulukweni shoka e mu lombwelele, manga a li muGalilea, 7 sho a ti kutya Omuna gwomuntu ota ka gandjwa miikaha yaalunde, nota ka alelwa komuti e ta yumudhwa mesiku etitatu.” 8 Opo nduno oya dhimbulukwa oohapu dhe, 9 noya zi po pombila* e taya hokololele aayapostoli 11 nosho wo aalongwa ayehe yalwe, iinima ayihe mbyoka. 10 Oya li Maria Magdalena, Johanna nosho wo Maria, yina yaJakob; naakiintu yalwe wo mboka ya li pamwe nayo oya li taya hokololele aayapostoli iinima mbyoka. 11 Ihe kaya li ya hala okwiitaala aakiintu mboka, oshoka shoka ya li taya popi oya li ye shi tala ko sha fa kaashi shi shoshili.*

12 Ihe Petrus okwa thikama e ta matukile kombila,* naasho a ontamene mo, okwa mono mo owala iiyata yoliina. Onkee ano okwa shuna, ta ipula kutya oshike sha ningwa po.

13 Ihe tala, mesiku olyo tuu ndyoka, aalongwa yaali oya li mondjila taya yi komukunda hagu ithanwa Emmaus, ngoka gwa li ookilometa 11,* okuza kuJerusalem, 14 noya li taya kundathana kombinga yiinima ayihe, mbyoka ya ningwa po.

15 Manga ya li taya kundathana kombinga yiinima mbyoka, Jesus okwe ya puyo, nokwa tameke okweenda pamwe nayo, 16 ihe kaya li ya vulu oku mu dhimbulula. 17 Okwa ti kuyo: “Otamu ende tamu kundathana shike?” Opo ihe oya thikama taya monika ya yemata. 18 Gumwe ngoka ha ithanwa Kleopas, okwe mu yamukula ta ti: “Ano ngoye omukwiilongo muJerusalem, sho inoo uva* kombinga yaashoka sha ningwa po omasiku ngaka?” 19 Jesus okwe ya pula ta ti: “Oshike shoka sha ningwa po?” Oya ti kuye: “Ino uva ano shoka sha ningilwa Jesus Omunasareti, ngoka e shi koleke kutya ye omuhunganeki omunankondo moku shi ulika moohapu nomiilonga koshipala shaKalunga nomontaneho yaantu ayehe, 20 nankene aayambi aakuluntu naapangeli ye mu gandja a tokolelwe eso noku alelwe komuti? 21 Ihe otwa li twa inekela kutya omulumentu nguka oye ta ka hupitha Israeli. Kakele kaashono, nena esiku etitatu, okuza sho iinima mbika ya ningwa. 22 Shimwe ishewe, aakiintu yamwe yomokati ketu nayo oye tu kumitha wo, sho ya yi kombila* ongula onene, 23 naasho inaaya adha mo omudhimba gwe, oye ya taya ti kutya oya mono oshinima oshikumithi, ano aayengeli, mboka ye ya lombwele kutya Jesus okwa yumuka. 24 Opo nduno yamwe mboka ya li pamwe natse oya yi kombila,* noye yi adha naanaa ngaashi aakiintu ya ti, ihe inaye mu mona.”

25 Onkee ano Jesus okwa ti kuyo: “Yayee, ne mboka kaamu na oondunge, noihamu itaale mbala iinima ayihe, mbyoka ya popiwa kaahunganeki! 26 Mbela Kristus ka li e na okupita momahepeko agehe ngaka e ta yi meadhimo lye?” 27 Opo ihe Jesus okwe ya fatululile Omanyolo agehe, ngoka ga popya kombinga ye, okutameka nOmanyolo ngoka ga nyolwa kuMoses, sigo okwaangoka ga nyolwa kaahunganeki ayehe.

28 Sho ya li ye li pokuthika popepi nomukunda, hoka ya li taya yi, Jesus okwa ningi a fa ta pitilile po. 29 Ihe oye mu indile a kale puyo taya ti: “Kala putse, molwaashoka otaku toko, netango oli li pokuningina. Opo ihe okwa yi megumbo, a ka kale nayo. 30 Opo nduno sho a li ta li* pamwe nayo, okwa kutha oshikwiila, ta galikana e te shi pambula, nokwa tameke oku shi ya pa. 31 Opo ihe omeho gawo oga tonata, noye mu dhimbulula. Ihe ohaluka, okwa kana po puyo. 32 Nena oya lombwelathana taya ti: “Nomolwaashono nani omitima dhetu dha li dha hwama, sho a li ta popi natse mondjila noku tu fatululila nawa omanyolo.” 33 Opo nduno pethimbo olyo tuu ndyoka, oya thikama e taya shuna kuJerusalem, noya adha aayapostoli 11 nosho wo mboka ya gongala pamwe nayo, 34 mboka ya ti: “Omuwa okwa yumuka shili, nokwi ihololele Simon.” 35 Opo ihe oye ya hokololele shoka sha ningwa po mondjila, nankene ye mu dhimbulula, sho a pambula oshikwiila.

36 Manga ya li taya popi kombinga yiinima mbyoka, Jesus okwa thikama mokati kawo e ta ti kuyo: “Ombili nayi kale nane.” 37 Ihe molwaashoka oya li ya haluka, noya li ya tila noonkondo, oya li taya dhiladhila kutya oya mona oshishitwa shopambepo. 38 Onkee ano okwa ti kuyo: “Omolwashike mwa tila, nomolwashike mu na omalimbililo momitima dheni? 39 Taleni iikaha noompadhi dhandje kutya ongame. Gumii ndje, mu shi imonene, oshoka oshishitwa shopambepo kashi na oontumba nomasipa, ngaashi mu wete ndje ndi yi na.” 40 Opo nduno sho a popi ngawo, okwe ya ulukile iikaha noompadhi dhe. 41 Ihe manga natango ya li inaaya hala oku shi itaala, molwaashoka oya li ya nyanyukwa noonkondo noya kumwa, okwa ti kuyo: “Omu na po sha shokulya?” 42 Onkee ano oye mu pe oshipambu shohi ya yothwa, 43 nokwe yi taamba e te yi li montaneho yawo.

44 Opo ihe okwa ti kuyo: “Oohapu ndhika odho nda li nde mu lombwele, sho nda li pamwe nane, kutya ashihe shoka sha nyolwa kombinga yandje mOmpango yaMoses, momambo gaahunganeki nomOmapisalomi, oshi na okugwanithwa.” 45 Opo nduno okwe ya kwathele ya uve ko thiluthilu eityo lyOmanyolo, 46 nokwa ti kuyo: “Okwa nyolwa taku ti: Kristus ota ka hepekwa, nota ka yumudhwa kuusi mesiku etitatu, 47 nomolwedhina lye, etumwalaka, ndyoka tali ti kutya aantu naya itedhulule, opo ya dhiminwe po omayono gawo, oli na okuuvithilwa iigwana ayihe okutamekela muJerusalem. 48 Ne otamu ka kala oombangi dhiinima mbika. 49 Ihe taleni, otandi mu tumine shoka Tate a uvaneka. Ihe ne kaleni moshilando, sigo oosho mwa pewa oonkondo okuza megulu.”*

50 Opo nduno okwe ya fala kuBetania, nokwa yelutha iikaha ye e te ya yambeke. 51 Manga a li te ya yambeke, okwa zi po puyo e ta falwa megulu. 52 Opo ihe oye mu inyongamene* e taya shuna kuJerusalem ya nyanyukwa noonkondo, 53 noya tsikile okukala aluhe motempeli taya hambelele Kalunga.