paMarkus

4 Jesus okwa tameke ishewe okulonga aantu pomunkulofuta, nongundu onene yaantu oye mu gongalele. Onkee ano okwa yi e ta kuutumba mowato kokule kashona nomunkulofuta, ihe ongundu ayihe yaantu oya kala pomunkulofuta. 2 Opo nduno okwa tameke oku ya longa iinima oyindji ta longitha omathaneko, nomanga a li te ya longo, okwa ti kuyo: 3 “Pulakeneni. Taleni! Omukuni okwa yi a ka kune. 4 Sho a li ta kunu, oombuto dhimwe odha gwile mondjila, nuudhila owe ya e tawu dhi li po. 5 Dhimwe odha gwile mevi lya nika omamanya, nodha mene nziya, molwaashoka kapwa li evi olindji. 6 Ihe etango sho lya piti, iimeno mbyoka oya lembe e tayi ganya, molwaashoka omidhi dhayo kadha li dha ya muule. 7 Oombuto dhimwe odha gwile mokati koondjoho, naasho oondjoho dha koko, odha thininike iimeno, noinayi vala. 8 Ihe dhimwe odha gwile mevi ewanawa, naasho dha mene, odha koko e tadhi vala, dhimwe olwomilongo ndatu, dhimwe olwomilongo hamano noonkwawo olwethele.” 9 Opo nduno okwa gwedha ko a ti: “Ngoka e na omakutsi, na uve ko.”

10 Omanga a li oye awike, aalongwa ye yamwe naayapostoli ye 12 oya tameke oku mu pula kombinga yomathaneko, ngoka a li ta longitha. 11 Okwa ti kuyo: “Ne omwa pewa oshiholekwa oshiyapuki shUukwaniilwa waKalunga, ihe mboka kaaye shi aalongwa, iinima ayihe otaye yi lombwelwa momathaneko. 12 Opo nonando otaya tala, itaya mono ko, nonando otaya pulakene, itaya uvu ko, nokuli neityo lyaashoka tashi popiwa; nokaye na siku ya itedhulule noya dhiminwe po.” 13 Okwa ti ishewe kuyo: “Ngele ethaneko ndika kamu li uvite ko, ongiini tamu ka uva ko omathaneko agehe galwe?

14 “Omukuni okwa kunu ohapu. 15 Ndhoka dha kunwa mondjila oomboka ya uvu ohapu, ihe nziya sho ye yi uvu, Satana okwe ya e te ya yugu ohapu, ndjoka ya kunwa muyo. 16 Sha faathana, ndhoka dha kunwa mevi lya nika omamanya oomboka konima sho ya uvu ohapu, ye yi taamba ko nziya nenyanyu. 17 Ihe molwaashoka inayi mena omidhi momitima dhawo, otaya tsikile owala uule wokathimbo okafupi, nongele oya adhika kuudhigu, nenge komahepeko omolwohapu, otaya etha po eitaalo lyawo nziya. 18 Dhilwe ndhoka dha gwile mokati koondjoho, oyo mboka ya uvu ohapu, 19 ihe iimpwiyu yuuyuni mbuka* nefundjaleko lyomaliko nokahalu kiinima ayihe yilwe otayi topola omitima dhawo notayi thininike ohapu ndjoka, noitayi imike iiyimati muyo. 20 Hugunina, ndhoka dha kunwa mevi ewanawa, oomboka ya uvu ohapu noye yi taamba ko e taya imike iiyimati, gumwe olwomilongo ndatu, gumwe olwomilongo hamano nagulwe olwethele.”

21 Okwe ya lombwele wo a ti: “Ndishi olamba ihayi temwa e tayi tulwa kohi yontungwa, nenge kohi yombete, ihe ohayi temwa e tayi tulwa koshihukikwa? 22 Onkee ano kapu na shoka sha holekwa thiluthilu itaashi ka hololwa; nokapu na shoka sha siikilwa itaashi ke ya puuyelele. 23 Ngoka e na omakutsi, na uve ko.”

24 Okwa ti ishewe kuyo: “Pulakeneni nawa kwaashoka tandi mu lombwele. Oshiyelekitho shoka tamu yelekitha aantu, osho wo tamu ka yelekithwa nasho, notamu ka gwedhelwa ko oshindji. 25 Oshoka kehe ngoka e na ota pewa oshindji, ihe ngoka kee na sha ota kuthwa nokuli naashoka e na.”

26 Onkee ano okwa tsikile ko ta ti: “Uukwaniilwa waKalunga otawu faathanithwa nomulumentu a kuna oombuto mevi. 27 Opo nduno uusiku okwa ka lala. Sho a penduka ongula onene, okwa adha oombuto dha mena nodha koka, ihe ka li e shi kutya osha ende ngiini. 28 Evi olyo lyene hali menitha oombuto kashona nakashona, tango omino, tadhi vala omitse, opo nduno omitse tadhi vala oomuma. 29 Ihe nziya ngele iilya ya kolo, ota kutha oshiteyitho, oshoka eteyo olya thika.”

30 Okwa tsikile ko ishewe ta ti: “Uukwaniilwa waKalunga otatu vulu oku wu faathanitha nashike, nenge onethaneko lini tatu vulu oku wu yelitha? 31 Owa fa omuma yosinapi, ndjoka pethimbo tayi kunwa mevi oyo hayi kala oshuushuka koombuto adhihe kombanda yevi. 32 Ihe uuna ya kunwa, ohayi koko e tayi ningi omuti gu vule iimeno ayihe yilwe yiikwamboga, nohagu ningi iitayi iinene, hoka oondhila dhokegulu hadhi vulu okutungila iihandhila yadho, momunzile gwago.”

33 Okwa li e ya longo ta longitha omathaneko ogendji ga fa mpoka, shi ikolelela kwaashoka taya vulu okuuva ko. 34 Ka li nokuli ha popi nayo itaa longitha omathaneko, ihe okwa li ha yelithile aalongwa ye iinima ayihe, uuna ye li oyo ayeke.

35 Mesiku ndyoka sho kwa toko, okwa lombwele aalongwa ye ta ti: “Natu taagulukileni handiyaka yefuta.” 36 Konima sho ya laleke ongundu yaantu, oya yi pamwe naye mowato, ihe opwa li wo oowato dhilwe dhe ya landula. 37 Opo nduno mefuta omwa tukuluka oshikungulu shombepo oshinene, nomakuthikuthi oga li taga idhenge mowato, noya li yi li pokuudha omeya. 38 Ihe Jesus okwa li kosindo* yowato a kothela koshigwilo.* Onkee ano oye mu pendula e taya ti kuye: “Muhongi, otu li pokusa omeya. Ku na ko nasha natse?” 39 Opo nduno okwa thikama nokwa ganda ombepo e ta lombwele efuta ta ti: “Mwena thilu!” Opo ihe ombepo oya kodha, nefuta olya mwena. 40 Onkee ano okwa ti kuyo: “Omolwashike mwa tila? Natango kamu na eitaalo?” 41 Ihe oya li ya tila noonkondo, noya pulathana taya ti: “Omuntu a tya naanaa ngiini nguno, sho ombepo nefuta tayi vulika kuye?”