Iilonga yaayapostoli

7 Ihe omuyambi omunene okwa pula Stefanus ta ti: “Iinima mbika to tamanekelwa, oyoshili tuu?” 2 Stefanus okwa yamukula ta ti: “Aamwatate nootate, pulakeneni. Kalunga keadhimo okwa li a ihololele tatekulululwa Abraham, sho a li muMesopotamia, manga inaa tembukila kuHaran, 3 nokwa ti kuye: ‘Thiga po evi lyeni naakwanezimo yoye e to yi koshilongo, shoka tandi ke ku ulukila.’ 4 Opo nduno okwa thigi po evi lyaKaldea, nokwa tula muHaran. Konima sho he a si, Kalunga okwe mu lombwele a tembukile moshilongo, moka mú li ngashingeyi. 5 Ina thikila te mu pe nando okatopolwa okashona kevi, ihe okwe mu uvanekele kutya evi alihe ndyoka otali ka ninga lye, nokonima otali ka ninga lyoluvalo* lwe, nonando pethimbo ndyoka ka li e na okanona natango. 6 Kakele kaashono, Kalunga okwa lombwele Abraham kutya oluvalo* lwe otalu ka ninga aakwiilongo moshilongo, shoka kaashi shi shawo, naantu yamo otaye ke ya ninga aapika, noku ya hepeka uule womimvo 400. 7 Kalunga okwa ti: ‘Oshigwana shoka tashi ke ya ninga aapika otandi ke shi pangula, nokonima yaashika, otaya ka za mo, notaya ka longela ndje iilonga iiyapuki mehala ndika.’

8 “Kalunga okwa ningi wo ehangano naAbraham li na ko nasha nekenko, nokonima sho a vala Isak, okwe mu kenke konima yomasiku gahetatu, opo nduno Isak okwa vala* Jakob, na muJakob omo mwa zi omitse dhomazimo 12.* 9 Opo ihe omitse dhomazimo odha tsile Josef ondumbo, nodhe mu landitha po, a ka kale omupika muEgipiti. Ihe Kalunga okwa li pamwe naye, 10 nokwe mu hupitha mo momaudhigu ge agehe e te mu pe uunongo, opo a kale a hokiwa kuFarao, omukwaniilwa gwaEgipiti. Nena Farao okwe mu langeke po, a pangele Egipiti nosho wo egumbo lye alihe. 11 Ihe muEgipiti ashihe nomuKanaan omwa holoka ondjala onene, ano onkalo ondhigu lela, nootatekulululwa kaya li ye na shoka taya li. 12 Ihe sho Jakob a uvu kutya kuEgipiti oku na iikulya,* okwa tumu ko ootatekulululwa oshikando shotango. 13 Sho ya shuna ko oshikando oshitiyali, Josef okwa ihololele aamwahe, nokungawo Farao okwa tseya yaandjawo yaJosef. 14 Onkee ano Josef okwa tumine he, Jakob, etumwalaka, opo e ye kuEgipiti pamwe naanegumbo lye ayehe. Ayehe kumwe oya li 75.* 15 Nena Jakob okwa yi kuEgipiti, nokwa sile hoka, nootatekulululwa oko wo ya sile. 16 Iipongo yawo oya falwa kuShekem, noya fumvikwa mombila, ndjoka Abraham a li a landa niimaliwa yiisiliveli yontumba koyanamati yaHamor muShekem.

17 “Sho ethimbo lyaKalunga lyokugwanitha po euvaneko, ndyoka a li a uvanekele Abraham, lya li pokuthika, oshigwana shaIsraeli shoka sha li muEgipiti, osha indjipala noonkondo, 18 sigo oosho Egipiti sha tameke okupangelwa komukwaniilwa gulwe, ngoka inaa tseya Josef. 19 Omukwaniilwa ngoka oye a li a kengelele ootatekulululwa, nokwe ya thiminike ya ekelehi uuhanona wawo, opo wu se. 20 Pethimbo mpoka, opo Moses a valwa, nokwa li omwaanawa momeho gaKalunga. Opo nduno okwa kala* megumbo lyahe uule woomwedhi ndatu. 21 Ihe sho aavali ye ya thiminikwa ye mu ekelehi, omwanakadhona gwaFarao okwe mu kutha po e te mu putudha e li onga omwanamati. 22 Onkee ano Moses okwa li a longwa uunongo awuhe wAaegipiti. Okwa li nokuli ha popi nuulaadhi, nokwa li a longo iilonga iinene.

23 “Sho Moses a gwanitha omimvo 40, okwa tokola a ka talele po* aamwahe, Aaisraeli. 24 Sho Moses a mono gumwe gwomuyo ta ungaungiwa naye kaashi li pauyuuki kugumwe gwomAaegipiti, okwe mu gamene, sho a shunithile Omuegipiti uuwinayi moku mu dhipaga. 25 Moses okwa li ta dhiladhila kutya aamwahe otaye ke shi ndhindhilika mo kutya oye ta longithwa kuKalunga, opo e ya hupithe, ihe kaya li ye shi ndhindhilika mo. 26 Esiku lya landula ko, okwe ya kaamwahe, nokwa adha yaali yomuyo taya kondjo e ta kambadhala oku ya hangukununa, ya pange ombili, ta ti: ‘Aalumentu ne, ne aamwayinathana. Omolwashike tamu ningathana nayi?’ 27 Ihe ngoka a li ta ningi nayi mukwawo okwa undula po Moses e ta ti kuye: ‘Olye e ku ningi omupangeli nomupanguli gwetu? 28 Ano owa hala okudhipaga ndje ngaashi wa dhipaga Omuegipiti ohela?’ 29 Sho Moses e shi uvu, okwa yi ontuku e ta yi a ka kale omukwiilongo kuMidian, hoka a ka valela oyanamati yaali.

30 “Sho pwa piti omimvo 40, omuyengeli okwa ihololele Moses moshihwa sheno sha hwama, mombuga yi li popepi nondundu yaSinai. 31 Sho Moses e shi mono, okwa li a kumwa. Ihe sho a hedha popepi nasho, e shi tale nawa, okwa uvu ewi lyaJehova tali ti: 32 ‘Ongame Kalunga koohokulululwa, Kalunga kaAbraham, Kalunga kaIsak naKalunga kaJakob.’ Opo nduno Moses okwa tameke okukakama kuumbanda, noka li we a hala oku shi nongonona nawa. 33 Jehova okwa ti kuye: ‘Hula ko oongaku koompadhi dhoye, oshoka pehala mpoka wa thikama opuuyapuki. 34 Onda mona okuhepekwa kwoshigwana shandje muEgipiti, nonda uva omakemo gasho, onkee onde ya ndi shi hupithe. Ngashingeyi otandi ku tumu kuEgipiti.’ 35 Moses, ngoka ya li ya dhini, noye mu ula taya ti: ‘Olye e ku ningi omupangeli nomupanguli?’ oye naanaa a li omupangeli nomuhupithi gwawo, a tumwa kuKalunga okupitila momuyengeli, ngoka e mu i hololele moshihwa sheno. 36 Omulumentu nguka okwe ya tembudha mo, nokwa longo iikumithalonga muEgipiti nopEfuta Etiligane nosho wo mombuga uule womimvo 40.

37 “Moses nguka oye tuu ngoka a li a lombwele Aaisraeli ta ti: ‘Kalunga ota ka langeka po gumwe gwomaamwaho, a ninge omuhunganeki ngaashi ngame.’ 38 Oye tuu ngoka a li pamwe noshigwana shaIsraeli mombuga, noye a li a popiwa naye komuyengeli pamwe nootatekulululwa kondundu yaSinai, nokwa pewa etumwalaka lyaKalunga, e li tu tseyithile. 39 Ootatekulululwa oya li ya tindi okuvulika nosho wo okuwilikwa kuye, noya li taya dhiladhila momitima dhawo okushuna kuEgipiti 40 e taya lombwele Aaron taya ti: ‘Tu ningila ookalunga, ye tu kwatele komeho. Oshoka katu shi kutya oshike sha ningilwa Moses, ngoka e tu tembudha muEgipiti.’ 41 Onkee ano pethimbo ndyono oya ningi oshikalunga shontana e taye shi yambele omayambo, noya tameke okukala ya nyanyukwa, omolwiilonga yomake gawo. 42 Onkee ano Kalunga okwe ya pilamene, nokwe ya etha ya longele iikwagulu, ngaashi owala sha nyolwa membo lyAahunganeki taku ti: ‘Egumbo lyaIsraeli ne, mbela ongame mwa kala tamu yambele omayambo mombuga uule womimvo 40? 43 Hangame, ihe omwa kala tamu longele iihongwathano, mbyoka mwa ihongela, ngaashi etsali lyaMolek noshiyelekela shonyothi yakalunga keni Refan, mbyoka hamu humbata. Onkee ano otandi ka etha mú falwe muupongekwa kokule kuBabilon.’

44 Sho ootatekulululwa ya li mombuga, oya li ye na etsali, ndyoka tali ulike kutya Kalunga oku li pamwe nayo, na Moses okwa li e li tungu ngaashi naanaa Kalunga a li e mu lombwele nokwe mu ulukile. 45 Opo nduno ootatekulululwa oya li ye li pewa li li uuthiga, noye li fala pamwe naJosua kevi, ndyoka Kalunga a tidha mo iigwana montaneho yootatekulululwa. Olya kala hoka sigo opethimbo lyaDavid. 46 David okwa li a hokiwa kuKalunga, nokwa li a pula a pewe uuthembahenda wokutungila Kalunga kaJakob ehala lyokukala. 47 Ihe Salomo oye a li a tungile Kalunga egumbo. 48 Nonando ongawo, Omukombandambanda iha kala momahala, ga tungwa niikaha, ngaashi owala omuhunganeki gumwe a tile: 49 ‘Egulu olyo oshipangelapundi shandje, nevi olyo oshilyatelo shoompadhi dhandje. Jehova okwa ti: Otamu ka tungila ndje ehala lya tya ngiini? Nenge ehala lyandje lyokukala oli li peni? 50 Mbela hangame nda shita iinima ayihe mbika?’

51 “Ne aantu aatangalali, mú na omitima omikukutu nomakutsi geni ihaga uvu ko,* aluhe otamu kondjitha ombepo ondjapuki, ngaashi oohokulululwa ya li haya ningi. 52 Oguni gwomaahunganeki inaa hepekwa koohokulululwa? Oya dhipaga mboka ya li ya tseyitha komeho yethimbo okuya kwomuyuuki, ngoka mwa gwaaleke, nomwa dhipaga, 53 ne mboka mwa pewa Ompango okupitila maayengeli, ihe inamu yi dhiginina.”

54 Sho ya uvu oohapu ndhoka oya li ya geya noonkondo* momitima dhawo, noya tameke okwiikokota komayego omolwe. 55 Ihe sho Stefanus a li a udha ombepo ondjapuki, okwa ligamene kegulu, nokwa mono eadhimo lyaKalunga, naJesus a thikama kolulyo lwaKalunga 56 e ta ti: “Taleni, ondi wete egulu lya eguluka, nOmuna gwomuntu a thikama kolulyo lwaKalunga.” 57 Nena oya igidha mokule e taya ikwata komakutsi, noye mu ponokele ayehe. 58 Konima sho ye mu umbu mo moshilando, oya tameke oku mu dhenga nomamanya. Oombangi ndhoka dha li tadhi mu pataneke, odha li dha tula oonguwo dhadho dhokombanda poompadhi dhomulumentu omugundjuka gwedhina Saulus. 59 Manga ya li taya dhenge Stefanus nomamanya, okwa indile ta ti: “Omuwa Jesus, taamba omwenyo gwandje!” 60 Opo nduno okwa tsu oongolo e ta igidha mokule ta ti: “Jehova, ino ya yalulila ondjo ndjika.” Konima sho a popi ngaaka, okwa si.