KuTitus

2 Ihe ngoye, kala aluhe ho popi iinima, mbyoka yi li metsokumwe nelongo ewanawa.* 2 Aalumentu aakokele* naya kale ye na ondjele miinima ayihe, yi itula mo, haya dhiladhila pandunge,* ye na eitaalo lya kola, ye na ohole nosho wo eidhidhimiko. 3 Sha faathana, aakulukadhi aakokele* naya kale ye na eihumbato ewanawa, kaaye na oluhoko, inaya kala aapika yomaviinu, yo naya kale ye shi okulonga aantu shoka oshiwanawa, 4 opo ya kumagidhe aakulukadhi aagundjuka ya kale ye hole aasamane yawo, ya kale ye hole oyana, 5 ya kale haya dhiladhila pandunge,* ye na eihumbato lya yogoka, ya kale haya longo momagumbo gawo,* haya longo shoka oshiwanawa, noya kale haya vulika kaasamane yawo, opo oohapu dhaKalunga kaadhi vule okupopilwa muuwinayi.

6 Sha faathana, tsikila wo okukumagidha aalumentu aagundjuka ya kale haya dhiladhila pandunge,* 7 nokuulika kutya owu li oshiholelwa oshiwanawa mokulonga iilonga iiwanawa momukalo kehe. Longa aantu wi itula mo shoka sha yogoka, 8 to longitha oohapu oombwanawa,* ndhoka itaadhi vulu okupatanekwa, opo mboka haye tu pataneke ya se ohoni, nokaaya vule nando oku tu popila muuwinayi washa. 9 Aapika naya kale haya vulika kooyene yawo miinima ayihe, naya kambadhale oku ya nyanyudha, inaye ya yamukula nayi, 10 noinaya yaka po iinima yawo, ihe naya ulike kutya oye shi okwiinekelwa thiluthilu, opo mukehe shimwe taya ningi, ya vule okusimanekitha omalongo gaKalunga, Omuhupithi gwetu.

11 Oshoka uuwanawahenda waKalunga owa hololwa, opo wu etele aantu yomaludhi agehe ehupitho. 12 Otawu tu dheula tu ethe po uukeenakalunga nuuhalu wuuyuni, tu kale hatu dhiladhila pandunge, tu kale aayuuki, nokulongela Kalunga muuyuni mbuka,* 13 omanga twa tegelela egwanitho lyetegameno lyenyanyu nosho wo okuholoka kweadhimo lyaKalunga ketu omunene nolyOmuhupithi gwetu, Jesus Kristus, 14 ngoka i igandja omolwetu, opo e tu mangulule* kiilonga iiwinayi yoludhi kehe, noku tu yogole, tu ninge aantu ye mwene, mboka ye li eliko lya sheywa,* opo tu vule okulonga nuulaadhi iilonga iiwanawa.

15 Tsikila oku ya longa iinima mbika, ya kumagidha noku ya pukulula,* oshoka owu na uuthemba thiluthilu woku shi ninga. Ino etha nando ogumwe e ku dhine.