PaJohannes

10 “Oshili tandi mu lombwele, ngoka te ya moshigunda shoonzi, itaa pitile posheelo, omufuthi nomuyugi. 2 Ihe ngoka ta pitile posheelo, oye omusita gwoonzi. 3 Omukeeleli gwoposheelo ote mu egulula, noonzi otadhi uvu ewi lyomusita. Oha ithana oonzi dhe komadhina, nohe dhi piitha mo. 4 Uuna e dhi piitha mo adhihe, ohe dhi tetekele komeho e tadhi mu landula, molwaashoka odhi shi ewi lye. 5 Ihadhi landula ngoka kaadhi shi, ihe ohadhi mu yi ontuku, molwaashoka kadhi shi ewi lye.” 6 Jesus okwe ya lombwele ethaneko ndyoka, ihe kaya li yu uvite ko shoka a hala okutya.

7 Onkee ano Jesus okwa ti ishewe kuyo: “Oshili tandi mu lombwele, ongame osheelo shoonzi. 8 Ayehe mboka ya li ye ya taya iti ongame oyo aafuthi naayugi; ihe oonzi inadhi pulakena kuyo. 9 Ongame osheelo. Kehe ngoka ta pitile mungame ota hupithwa, nota kala te ya mo nokupita mo e ta mono uunapelo. 10 Omufuthi ihe ya inaa endela okuyaka, okudhipaga nokuhanagula. Ihe ngame onde ya, opo oonzi dhi vule okukala nomwenyo sigo aluhe. 11 Ongame omusita omwaanawa; omusita omwaanawa oha gandjele oonzi dhe omwenyo gwe. 12 Uuna omulumentu, ngoka a kutwa, ye haye mwene gwoonzi, a mono embungu tali ya, oha thigi po oonzi e ta yi ontuku, opo nduno embungu otali dhi ponokele e tadhi halakana, 13 molwaashoka ye omuniilonga owala, noke na ko nasha noonzi. 14 Ongame omusita omwaanawa. Oonzi dhandje ondi dhi shi, nadho odhi shi ndje, 15 ngaashi Tate e shi ndje; nangame ondi mu shi; noonzi dhandje otandi dhi gandjele omwenyo gwandje.

16 “Ondi na wo oonzi dhilwe, ndhoka kaadhi shi dhomoshigunda shika. Nadho ondi na oku dhi eta mo, notadhi ka pulakena kewi lyandje e tadhi ningi oshigunda shimwe, nodhi na omusita gumwe. 17 Tate oku hole ndje, molwaashoka onda gandja omwenyo gwandje, opo ndi ke gu pewe ishewe. 18 Kapu na omuntu te gu kutha ndje, ihe otandi gu gandja ngame mwene. Ondi na uuthemba woku gu gandja, nondi na uuthemba woku gu pewa ishewe. Oshipango shika onde shi pewa kuTate.”

19 Opo ihe mokati kAajuda omwa holoka ishewe etopoko omolwoohapu dhe ndhoka. 20 Oyendji yomuyo oya li taya ti: “Oku niwe kondemoni, nota yi oonkwengu. Omolwashike tamu pulakene kuye?” 21 Yalwe oya ti: “Oohapu ndhika kadhi shi dhomuntu e na ondemoni. Mbela ondemoni otayi vulu ngaa okutsikulula omeho gaaposi?”

22 Pethimbo ndyoka opwa li oshituthi shokudhimbulukwa eyapulo lyotempeli muJerusalem. Osha li pethimbo lyokufu, 23 na Jesus okwa li ta ende motempeli, momukala gwaSalomo. 24 Opo nduno Aajuda oye mu kundukidha, noya ti kuye: “Sigo uunake to tu* kaleke momalimbililo? Ngele ongoye Kristus, tu lombwela.” 25 Jesus okwe ya yamukula ta ti: “Onde mu lombwela, ihe natango inamu itaala. Iilonga, mbyoka tandi longo medhina lyaTate, oyo tayi gandja uumbangi kombinga yandje. 26 Ihe ne inamu itaala, molwaashoka kamu shi oonzi dhandje. 27 Oonzi dhandje ohadhi pulakene kewi lyandje, ngame ondi dhi shi, nohadhi landula ndje. 28 Otandi dhi pe omwenyo gwaaluhe, noitadhi ka kana nando, nokapu na ngoka te dhi yugu ndje. 29 Oonzi, ndhoka Tate a pa ndje, odha simanenena dhi vule iinima ayihe yilwe, nokapu na ngoka ta vulu oku dhi yakula mo moshikaha shaTate. 30 Ngame naTate otwa hangana.”*

31 Natango Aajuda oya kutha omamanya, ye mu dhenge.* 32 Jesus okwa ti kuyo: “Onde mu ulukila iilonga oyindji iiwanawa, ya za kuTate. Omolwoshilonga shini shomwaambyoka nda longa mwa hala okudhipaga ndje nomamanya?” 33 Aajuda oye mu yamukula ya ti: “Itatu ku dhenge* nomamanya, omolwiilonga iiwanawa mbyoka wa longa, ihe omolwesheko, oshoka nonando ongoye omuntu, owa iningi kalunga.” 34 Jesus okwe ya yamukula ta ti: “Nani mOmpango yeni inamu nyolwa taku ti, ‘Ngame onda ti: “One ookalunga”’?* 35 Ngele Kalunga okwa ithana mboka ya pangulwa koohapu dhe “ookalunga,” nomanyolo oga popya oshili, 36 omolwashike ngame ngoka nda yapulwa kuTate nonda tumwa muuyuni, tamu ula ndje tamu ti: ‘Otandi sheke,’ molwaashoka handi ti, ‘Ngame Omuna gwaKalunga’? 37 Ngele itandi longo iilonga yaTate, inamu itaala ndje. 38 Ihe ngele ohandi yi longo, nonando itamu itaale ndje, itaaleni iilonga mbyoka, opo mu vule okutseya nomu kale mu shi kutya Tate okwa hangana nangame nosho wo kutya nangame onda hangana naTate.” 39 Onkee ano natango oya kambadhala oku mu kwata po, ihe okwe ya henuka.

40 Opo nduno Jesus okwa yi ishewe handiyaka yomulonga gwaJordan, kehala, hoka Johannes a li a ninginithile aantu tango, nokwa kala hoka. 41 Opo ihe aantu oyendji oye ya kuye, noya ti: “Johannes ina longa nando oshikumithalonga shimwe, ihe ashihe shoka a popya kombinga yomulumentu nguka oshoshili.” 42 Nena aantu oyendji oya itaale Jesus.