Timoteus gwotango
1 Ngame, Paulus, omuyapostoli gwaKristus Jesus pautho lyaKalunga, Omuhupithi gwetu, nolyaKristus Jesus, ngoka e li etegameno lyetu, 2 otandi nyolele Timoteus,* omwiitaali omukwetu, ngoka e li omumwandjelela:
Uuwanawahenda, ohenda nosho wo ombili, ndjoka hayi zi kuKalunga, Tate, nokOmuwa gwetu, Kristus Jesus, nayi kale pamwe nangoye.
3 Ngaashi owala nda li nde ku ladhipike wu kale muEfeso, sho nda li lwopokuya kuMakedonia, ngashingeyi, otandi ku indile wu kumagidhe aantu yontumba, kaaya longe omalongo galwe gi ili, 4 nokaaya gandje eitulomo komahokololo giifundja, nokoondjokonona dhomazimo. Iinima ya tya ngaaka kayi na ekwatho lyasha, ihe ohayi ningitha owala aantu ya kale taya fekele, pehala lyokukundathana iinima, mbyoka ya za kuKalunga tayi koleke eitaalo. 5 Sho shene, elalakano lyoku mú pa elombwelo* ndika, omu kale mu na ohole yashili tayi zi komutima, eiyuvo lya yela nosho wo eitaalo kaali na uufudhime. 6 Sho aantu yamwe ya etha po iinima mbyoka, oya kutha ombinga momapopyo gowala. 7 Oya hala okukala aalongi yompango, ihe kaye uvite ko iinima, mbyoka taya popi, nenge iinima, mbyoka taya tsitsimike ya mana mo.
8 Otu shi kutya Ompango ombwanawa, ngele otayi tulwa miilonga momukalo gwa uka,* 9 notu shi shi kutya ompango inayi nuninwa aayuuki, ihe aantu, mboka kaaye na ompango, aatangalali,* aakaanakalunga, aalunde, mboka kaaye shi aadhiginini,* aakaanakonasha nuuyapuki, aadhipagi yoohe, aadhipagi yooyina, aadhipagi yaantu, 10 aantu, mboka haya yi momilalo dha nyata,* omashenge,* mboka haya kwata po aantu ombambyona, aaniifundja, mboka haya gana iifundja, nosho wo kehe shoka shi li ompinge nelongo, ndyoka lya uka,* 11 ndyono li ikolelela konkundana ombwanawa yaKalunga omunyanyukwi, ndjoka e yi inekelela ndje.
12 Otandi pandula Omuwa gwetu, Kristus Jesus, ngoka a pa ndje oonkondo, molwaashoka okwa tala ndje ko ndi li omudhiginini, sho a pe ndje oshilonga shika shokuuvitha, 13 nonando nale, ngame onda li omusheki, omuhepeki gwooitaali, nomulumentu e na ondhino. Nonando ongawo, onda silwa ohenda, molwaashoka kanda li ndi shi shoka tandi ningi, nokanda li ndi na eitaalo. 14 Omuwa gwetu okwa ulukila ndje uuwanawahenda we uunene, nondi na eitaalo nohole, ndjoka Kristus Jesus e na. 15 Oohapu ndhika odhoshili, nodhi shi okwiinekelwa, ndhoka tadhi ti: Kristus Jesus okwe ya muuyuni, a hupithe aalunde, mboka mokati kawo, ongame omulunde a shiga ko. 16 Nonando ongawo, onda silwa ohenda, opo Kristus Jesus a ulike okupitila mungame, ngoka ndi li omulunde a shiga ko, kutya oku na ontalanteni thiluthilu, nondi kale oshiholelwa kwaayehe, mboka ye mu itaala, opo ya ka mone omwenyo gwaaluhe.
17 Kalunga awike, Omukwaniilwa gwaaluhe, ngoka ihaa si, noiha monika, na simanekwe nokutumbalekwa sigo aluhe. Amen.
18 Otandi ku inekelele omalombwelo* ngaka, omumwandje Timoteus, metsokumwe nomahunganeko, ngoka ga li ga hunganekwa kombinga yoye, ga vule oku ku kwathela wu kondje ekondjo ewanawa, 19 nowu dhiginine eitaalo, nokukala neiyuvo ewanawa, iinima, mbyoka yamwe ya ekelehi, shoka sha ningitha eitaalo lyawo li teke po ongosikepa ya tekauka po. 20 Himeneus naAleksander oyamwe yomuyo, nonde ya gandja miikaha yaSatana, opo ya mone egeeloputudho, nokaaya sheke we Kalunga.