KAaefeso
2 Shimwe ishewe, Kalunga okwe mú yumudha, oshoka omwa li mwa fa mwa sa omolwokwaavulika kweni nomolwoondjo dheni, 2 sho mwa li hamu ihumbata* ngaashi* aantu yomonkalelo yuuyuni mbuka, nomwa li hamu longo ehalo lyomupangeli gwuuyuni mbuka, ano ombepo, ndjoka ngashingeyi yi li maantu, mboka ihaaya vulika kuKalunga. 3 Natse otwa li hatu ihumbata sha ikolelela komahalo getu gopanyama ngaashi yo, twa li hatu katuka metsokumwe nomadhiladhilo getu yene, notwa li twa gwana okugeelwa kuKalunga,* ngaashi owala aantu ayehe. 4 Ihe omolwesilohenda lyaKalunga enene nomolwohole ye onene yoku tu hola, 5 okwe tu yumudha pamwe naKristus, nokuli nonando otwa li twa fa twa sa omolwoondjo dhetu; okwe mú hupitha omolwuuwanawahenda we. 6 Kakele kaashono, okwe tu yumudha pamwe naye, nokwe tu pa omahala gokukala megulu omolwuukumwe wetu naKristus Jesus, 7 opo muuyuni, mboka tawu ke ya,* a vule oku ke tu ulukila uuwanawahenda we uunene, sho te ke tu longela uuwanawa omolwuukumwe wetu naKristus Jesus.
8 Omolwuuwanawahenda mbuka nomolweyambeko lyaKalunga, omwa hupithwa omolweitaalo lyeni, ihe hamolwiilonga yeni yene. 9 Shika inashi ningwa omolwiilonga yeni, opo kaapu kale nando ogumwe ta itanga. 10 Otu li oshilonga shiikaha yaKalunga, notwa shitwa muukumwe naKristus Jesus, tu longe iilonga iiwanawa, mbyoka Kalunga e yi tu longekidhila nale tu yi longe.
11 Onkee ano dhimbulukweni kutya pompito yimwe, ne aantu yomiigwana, omwa li hamu ithanwa mboka “inaaya kenkwa” kwaamboka haku tiwa “oya kenkwa,” ano okukenkwa, hoka haku ningwa kaantu. 12 Pethimbo mpoka, kamwa li mu shi Kristus, omwa li mwa topoka ko koshigwana shaIsraeli, nokamwa li mwa kwatelwa mo momahangano ge na ko nasha neuvaneko lyaKalunga; omwa li muuyuni kaamu na etegameno, nokaamu shi Kalunga. 13 Ihe ngashingeyi, sho mu li muukumwe naKristus Jesus, ne mboka mwa li lela kokule naKalunga, ngashingeyi, omu li popepi naye omolwombinzi yaKristus. 14 Oshoka Kristus oye ombili yetu,* nokwa hanganitha oongundu mbali e ta kumuna po ekuma, ndyoka lya li pokati kadho. 15 Sho a yamba po olutu lwe, okwa hulitha po uutondwe, mboka wa li pokati koongundu ndhoka, mboka wa etithwa kOmpango, ndjoka ya kwatela mo iipango. Sho e dhi hanganitha, odha kala muukumwe naye, nokwa panga ombili nadho, 16 opo e dhi hanganithe naKalunga okupitila momuti gwomahepeko,* oshoka Kristus okwa hulitha po uutondwe, mboka wa li pokati kadho, okupitila muye mwene. 17 Shimwe ishewe, okwa li e ya e mú uvithile onkundana ombwanawa yombili, ne mboka mwa li kokule naKalunga, naamboka ye li popepi naye, 18 molwaashoka okupitila muye, atuheni otatu vulu okugalikana kuTate twa manguluka tatu wilikwa kombepo yimwe.
19 Kamu li we oondjendi naakwiilongo, ihe ngashingeyi omu na uukwashigwana wumwe naayapuki, nomwa ninga iilyo yegumbo lyaKalunga. 20 Omwa tungila kekankameno lyaayapostoli naahunganeki, omanga Kristus Jesus ye mwene e li emanya lyomohuke lyekankameno. 21 Ihe molwaashoka etungo alihe oli li muukumwe naye, iitopolwa yalyo ayihe otayi kwatakanithwa kumwe e tali koko, sigo lya ningi otempeli ondjapuki yaJehova. 22 Molwaashoka nane omu li muukumwe naKristus, Kalunga okwe mú tula megumbo limwe nayalwe, moka ha kala, oshoka ombepo ye omo yi li.