KAagalati
3 Aagalati ne, one aagoya! Olye e mú nwetha mo mu longe uuwinayi mbuka, mwa fa inaamu yelithilwa nawa shi na ko nasha nankene Jesus Kristus, a alelwa komuti? 2 Onda hala oku mú pula* oshinima shimwe: Mbela omwa pewa ombepo ondjapuki okupitila mokudhiginina ompango, nenge omolwaashoka mu na eitaalo mwaashoka mwa uva? 3 Ano ne aagoya lela nani? Omolwashike petameko, mwa li mwa inekela ombepo ondjapuki, ihe ngashingeyi omwa hala okulandula omadhiladhilo gopantu?* 4 Mbela omwa pita muudhigu owundji osima yowala? Ondi shi shi kutya inamu pita mo osima yowala. 5 Onkee ano ngoka he mú pe ombepo ondjapuki, noha longo iilongankondo mokati keni, mbela ohe shi ningi omolwokudhiginina kweni ompango, nenge omolweitaalo lyeni mwaashoka mwa uva? 6 Shika ongaashi owala Abraham “a itaale muJehova, nokwa talika ko omuyuuki.”
7 Omu shi shi nawa kutya mboka ye na eitaalo oyo oyana yaAbraham. 8 Kalunga okwa hunganeka momanyolo kutya ota ka tala ko aantu yomiigwana ye li aayuuki omolweitaalo lyawo. Onkundana ombwanawa ndjika okwe yi lombwele Abraham komeho yethimbo, sho a ti: “Iigwana ayihe otayi ka lalekwa nuuyamba okupitila mungoye.” 9 Onkee ano ayehe mboka ye na eitaalo otaya lalekwa nuuyamba pamwe naAbraham, ngoka a li e na eitaalo.
10 Ayehe, mboka ya inekela mokudhiginina ompango, oye li kohi yethingo, oshoka okwa nyolwa taku ti: “Kehe ngoka itaa kala metsokumwe niinima ayihe, mbyoka ya nyolwa mondhingambo yompango, okwa thingwa.” 11 Shimwe ishewe, osha yela kutya kapu na omuntu ta talika ko omuyuuki kuKalunga omolwokudhiginina ompango, oshoka “omuyuuki ota kala nomwenyo omolweitaalo.” 12 Ompango inayi kankamena keitaalo. Pehala lyaashono, “kehe ngoka ta longo iinima mbika ota kala nomwenyo omolwayo.” 13 Kristus okwe tu landa, sho e tu mangulula methingo lyOmpango, sho a thingwa omolwetu, molwaashoka okwa nyolwa taku ti: “Kehe ngoka ta endjelelekwa komuti okwa thingwa.” 14 Shika osha ningwa, opo iigwana yi yambekwe okupitila muKristus Jesus, ngaashi sha li sha uvanekelwa Abraham, notu pewe ombepo ondjapuki, ngaashi twa li twa uvanekelwa okupitila meitaalo lyetu.
15 Aamwatate, otandi popi tandi longitha ethaneko lyopantu: Uuna euvathanotsokumwe lya kolekwa, nokuli nando okomuntu, kapu na ngoka ta vulu oku li teya po, nenge a gwedhe ko sha kulyo. 16 Omauvaneko oga li ga uvanekelwa Abraham noluvalo* lwe. Inaku tiwa kutya, “nomaluvalo* goye,” sha hala okutya, ando aantu oyendji, ihe pehala lyaashono, okwa tiwa, “koluvalo* lwoye,” sha hala okutya, omuntu gumwe awike, nomuntu ngono oKristus. 17 Shimwe ishewe, otandi ti: Ompango, ndjoka ya ka totwa po konima yomimvo 430, inayi hulitha po ehangano, ndyoka lya totwa nale kuKalunga, opo andola euvaneko li kale inaali gwanithwa. 18 Oshoka ngele uuthiga owa kankamena kompango, nena inawu kankamena we keuvaneko; ihe Kalunga okwe wu pa Abraham okupitila meuvaneko.
19 Ompango ano oya totwa po nelalakano lyashike? Oya li ya totwa po, opo yi holole omayono, sigo oluvalo,* ndoka lwa uvanekwa, lwe ya. Kalunga okwa longitha aayengeli, a gandje ompango okupitila moshikaha shomupokati. 20 Ihe uuna Kalunga oye awike a kwatelwa mo, inapu pumbiwa omupokati. 21 Ano mbela Ompango oyi li ompinge nomauvaneko gaKalunga? Hasho nando! Oshoka ngele ompango oya li ya gandjwa yi gandje omwenyo, andola omuntu ota vulu okuninga omuyuuki omolwompango. 22 Ihe Omanyolo otaga holola kutya iinima ayihe oyi li kohi yoonkondo dhuulunde, nonokutya mboka taya ulike kutya oye na eitaalo muJesus Kristus otaya ka gwanithilwa omauvaneko gaKalunga.
23 Ihe manga eitaalo lya li inaali ya, otwa li hatu pangelwa nokuwilikwa kompango, omanga twa tegelela eitaalo, ndyoka lya li li li pokuholoka. 24 Onkee ano Ompango oya kala omuputudhi* gwetu, sigo Kristus e ya, opo tu vule okutalika ko aayuuki okupitila meitaalo. 25 Ihe ngashingeyi sho eitaalo lye ya, katu li we melelo lyomuputudhi.*
26 Amuhe oyana yaKalunga lela okupitila meitaalo, ndyoka mu na muKristus Jesus. 27 Oshoka amuhe, mboka mwa ninginithwa muKristus, omwa zala Kristus. 28 Kapu na eyooloko pokati kOmujuda nOmugreka, pokati komupika naangoka a manguluka,* pokati komulumentu nomukiintu, oshoka amuhe omwa hangana naKristus Jesus. 29 Shimwe ishewe, ngele ne oyaKristus, nena omu li shili oluvalo* lwaAbraham, notamu ka thigulula shoka sha uvanekelwa Abraham.