Iilonga yaayapostoli
23 Sho Paulus a tala ta tongolola iilyo yOmpangu yoPombanda yAajuda, okwa ti: “Aalumentu ne, aamwatate, ondi na eiyuvo lya yela thiluthilu koshipala shaKalunga sigo okunena.” 2 Opo ihe omuyambi omunene Ananias, okwa lombwele mboka ya li ya thikama puPaulus, ye mu dhenge komulungu. 3 Nena Paulus okwa ti kuye: “Kalunga ote ku geele,* mufudhime ngoye.* Owa kuutumba mpaka to pangula ndje metsokumwe nOmpango, ihe pethimbo olyo tuu ndyoka, oto yono Ompango, sho to ti kutya nandi dhengwe.” 4 Mboka ya li ya thikama puye oya ti: “Oto tuku omuyambi omunene gwaKalunga?” 5 Nena Paulus okwa ti: “Aamwatate, kanda li ndi shi wo ngele ye omuyambi omunene. Oshoka okwa nyolwa taku ti: ‘Ino sheka omupangeli gwoshigwana sheni.’”
6 Molwaashoka Paulus okwa li e shi kutya yamwe yomwaamboka ya gongala oya li Aasadukayi, yo yamwe Aafarisayi, okwa igidha mOmpangu yoPombanda yAajuda, ta ti: “Aalumentu ne, aamwatate, ngame Omufarisayi, nomuna gwAafarisayi. Otandi pangulwa, molwaashoka nda itaala meyumuko lyaasi.” 7 Sho a popi ngawo, pokati kAafarisayi nAasadukayi opwa holoka oontamanana, noshigongi osha topoka. 8 Oshoka Aasadukayi ohaya ti kutya kaku na eyumuko, nenge aayengeli, nenge iishitwa yopambepo, ihe Aafarisayi oya itaala* kutya iinima ayihe mbyoka oko yi li. 9 Onkee ano opwa holoka epiyagano enene, nayamwe yomaalongimpango yomAafarisayi oya thikama ya geya noonkondo taya ti: “Omulumentu nguka, tse inatu mu mona epuko lyasha, ihe ngele oshishitwa shopambepo, nenge omuyengeli oye a popya naye,—.” 10 Sho oontamanana dha lundu pombanda, omukuluntu gwetangakwiita okwa lombwele aakwiita, ya kuthe mo Paulus mokati kaantu, ye mu fale komuhandjo gwaakwiita, molwaashoka okwa li a tila kutya otashi vulika ye mu dhipage.
11 Ihe uusiku wa landula ko, Omuwa okwa thikama puPaulus, nokwa ti: “Kala wu na omukumo! Oshoka ngaashi owala wa kala to uvitha nawanawa kombinga yandje muJerusalem, owu na wo oku ka uvitha kombinga yandje muRoma.”
12 Sho kwa shi, Aajuda oya pangele ompangela nokugana kutya itaya li sha, nenge ya nwe sha, sigo oosho ya dhipaga Paulus. 13 Egano ndyoka olya li lya ningwa kaalumentu ye vulithe pomilongo ne. 14 Aalumentu mboka oya yi kaayambi aakuluntu nokaakuluntu yoshigwana, noya ti: “Otwa gana, kaatu lye nando osha, sigo oosho twa dhipaga Paulus. 15 Onkee ano ngashingeyi, ngoye nosho wo iilyo yOmpangu yoPombanda yAajuda, lombweleni omuwiliki gwetangakwiita a ete Paulus kune, mwa fa andola mwa hala okukonakona oshipotha she nawanawa. Ihe manga inaaya thika, otatu kala twa ilongekidha, tu mu dhipage.”
16 Ihe sho omwanamati gwomumwayinakadhona gwaPaulus a uvu kutya oya pangela ompangela, ye mu langele, okwa yi komuhandjo gwaakwiita e te shi lombwele Paulus. 17 Nena Paulus okwa ithana gumwe gwomaakuluntu yetangakwiita kuye, nokwa ti: “Fala omumati nguka komuwiliki gwetangakwiita, oshoka oku na sha shoka a hala oku mu lombwela.” 18 Onkee ano okwe mu kutha e te mu fala komuwiliki gwetangakwiita, nokwa ti: “Omunandholongo Paulus okwa ithana ndje e ta pula ndje ndi ete omumati nguka kungoye, molwaashoka oku na sha shoka a hala oku ku lombwela.” 19 Omuwiliki gwetangakwiita okwe mu kwata moshikaha, nokwe mu kutha po e te mu pula ye li po oyo ayeke, ta ti: “Oshike wa hala okulombwela ndje?” 20 Okwa ti: “Aajuda oya hala oku ku indila wu fale Paulus kOmpangu yoPombanda yAajuda ongula, ya fa andola ya hala oku uva oshindji kombinga yoshipotha she. 21 Ihe ino shi pitika nando, oshoka opu na aalumentu ye vulithe pomilongo ne, ye mu langela, noya gana kutya itaya li, yo itaya nu sha, sigo oosho ye mu dhipaga. Ngashingeyi, oya tegelela owala wu ya pe epitikilo.” 22 Onkee ano omuwiliki gwetangakwiita okwa etha omumati ngoka a ye, konima sho e mu londodha ta ti: “Ino lombwela nando omuntu kutya oshinima shika owe shi tseyithila ndje.”
23 Nena omuwiliki gwetangakwiita okwa ithana aakuluntu yetangakwiita yaali, nokwa ti kuyo: “Longekidheni aakwiita yokolupadhi 200, aakwiita yokuukambe 70 nosho wo aalumentu 200 ya homata omagonga, ye ye kuKesarea potundi ontitatu yuusiku.* 24 Shimwe ishewe, longekidhileni Paulus uukambe, opo a vule okuya kungoloneya Feliks e li megameno.” 25 Opo nduno omuwiliki gwetangakwiita okwa nyola ontumwafo tayi ti:
26 “Nandi ku kunde, omusimanekwa ngoloneya Feliks. Ongame Klaudius Lisias, ngoka tandi ku nyolele. 27 Omulumentu nguka okwa li a kwatwa po kAajuda, nokonyala ye mu dhipage, ihe ngame naakwiita yandje otwa endelele, tu mu hupithe, molwaashoka onda uvu kutya ye Omuroma. 28 Onda li nda hala okuuva kutya omolwashike taye mu tamaneke, nomolwaashono nde mu fala kOmpangu yoPombanda yAajuda. 29 Onda mono kutya ota tamanekelwa iinima yi na ko nasha nOmpango yawo, ihe kapwa li sha shoka sha gwana oku mu dhipagitha, nenge oku mu tulitha mondholongo. 30 Molwaashoka onda uva kutya opu na yamwe ya pangela ompangela kombinga ye, onde mu tumu nziya kungoye, nonda lombwele aatamaneki ye, ye ye, ye mu tamanekele koshipala shoye.”
31 Onkee ano aakwiita mboka oya kutha Paulus ngaashi ya lombwelwa, noye mu fala uusiku kuAntipatria. 32 Esiku lya landula ko, oya pitike aakwiita yokuukambe ya ye pamwe naPaulus, ihe aakwiita yalwe oya shuna komuhandjo gwawo. 33 Nena aakwiita yokuukambe oye ya muKesarea, noya gandja ontumwafo kungoloneya, noye mu pe wo Paulus. 34 Onkee ano okwe yi lesha, nokwa pula Paulus kutya okwa za koshitopolwalongo shini, e te mu lombwele kutya okwa za kuKilikia. 35 Ngoloneya okwa ti: “Onda hala okupulakena kungoye nawa, uuna aapataneki yoye ya thiki.” Opo ihe okwa gandja elombwelo, opo Paulus a kale a langelwa mombala yaHerodes.