PaMateus
6 “Kotokeni mwaa imonikithe kutya ne aayuuki montaneho yaantu, oshoka ngele tamu ningi ngeyi, itamu pewa ondjambi yasha kuHo yeni gwomegulu. 2 Onkee ano uuna to gandja iikwatha,* ino hika enkuma ngaashi aafudhime haya ningi moosinagoga nomomapandaanda, opo ya simanekwe kaantu. Oshili tandi mu lombwele, oyo oya pewa ondjambi yawo yi ihwapo. 3 Ihe ngele to gandja iikwatha, oshikaha shoye shokolumoho inashi tseya shoka shokolulyo tashi ningi, 4 opo shoka to gandja shi kale meholamo, naHo yeni gwomegulu ngoka ha mono meholamo, ote ke ku pa ondjambi.
5 “Shimwe ishewe, uuna tamu galikana, inamu ninga shoka hashi ningwa kaafudhime, oshoka oye hole okugalikana ya thikama moosinagoga nopomatsakaneno goondjila, opo ya monike kaantu. Oshili tandi mu lombwele, oyo oya mona nale ondjambi yawo yi ihwapo. 6 Ihe ngoye ngele to galikana, inda mondunda yoye e to edhile po, opo nduno to galikana kuHo gwomegulu ngoka e li meholamo. Kungawo, Ho ngoka ha mono meholamo, ote ke ku pa ondjambi. 7 Uuna to galikana, ino endulula iinima ya faathana lwiikando niikando ngaashi aantu yomiigwana haya ningi, oshoka ohaya dhiladhila kutya otaya ka uvika omolwomagalikano gawo omaleeleka. 8 Onkee ano inamu kala mwe ya fa, oshoka Ho yeni oku shi shoka mwa pumbwa, nokuli omanga inaamu shi mu pula.
9 “Ne omu na okugalikana ngeyi:
“‘Tate yetu ngoka wu li megulu, edhina lyoye nali yapulwe.* 10 Uukwaniilwa woye nawu ye. Ehalo lyoye nali gwanithwe wo kombanda yevi ngaashi megulu. 11 Tu pa oshikwiila* shetu shesiku ndika. 12 Tu dhimina po oondjo dhetu ngaashi wo hatu dhimine po mboka ya yona kutse. 13 Ino tu ethela momamakelo, ihe tu hupitha kumwiinayi.’
14 “Ngele ohamu dhimine po yalwe oondjo dhawo, Ho yeni gwomegulu naye ote mu dhimine po wo. 15 Nongele ihamu dhimine po yalwe oondjo dhawo, Ho yeni gwomegulu naye ite mu dhimine po wo oondjo dheni.
16 “Ngele tamu idhilike iikulya, inamu kala mwa ziyalaleka iipala yeni ngaashi aafudhime, oshoka ohaya ziyalaleke iipala yawo, opo ya monike kaantu kutya oya idhilika iikulya. Oshili tandi mu lombwele, oyo oya mona nale ondjambi yawo yi ihwapo. 17 Ihe ngoye ngele to idhilike iikulya, iyoga moshipala e to igwayeke omagadhi momutse, 18 opo kuu monike kaantu kutya oto idhilike iikulya, ihe okuHo awike ngoka e li meholamo. Opo nduno Ho ngoka ha mono meholamo, ote ke ku pa ondjambi.
19 “Inamu ilikolela omaliko kombanda yevi, hoka haga yonwa po koothithi nokoshushi, noku na aafuthi haya teya nokuyaka. 20 Pehala lyaashono, ilikoleleni omaliko megulu, moka kaamu na oothithi noshushi yoku ga yona po, nokamu na aafuthi haya teya nokuyaka. 21 Oshoka hoka ku na eliko lyoye, oko wo ku na omutima gwoye.
22 “Omeho ogo olamba yolutu. Ngele omeho goye oga tala owala koshinima shimwe ashike, nena olutu lwoye aluhe otalu kala muuyelele. 23 Ihe ngele omeho goye oga tala kiinima iiwinayi,* olutu lwoye aluhe otalu kala momilema. Ano ngele uuyelele mboka wu li mungoye owa ningi po omilema, nena omilema ndhoka dhi li mungoye otadhi ka kala dhi thike peni!
24 “Kapu na ngoka ta vulu okulongela aawa yaali, oshoka ota tondo gumwe e ta kala e hole omukwawo, nenge ta kala omudhiginini kugumwe e ta dhini ngwiyaka. Itamu vulu okulongela Kalunga nosho wo Omaliko.
25 “Onkee ano otandi mu lombwele: Etheni po okukala mu na oshimpwiyu kombinga yonkalamwenyo yeni kutya otamu li shike, nenge otamu nu shike, nenge kutya otamu zala shike. Mbela omwenyo inagu simana gu vule iikulya, nolutu inalu simana lwu vule oonguwo? 26 Taleni owala koondhila dhokegulu. Nonando ihadhi kunu, dho ihadhi teya, noihadhi pungula miigandhi, Ho yeni gwomegulu ohe dhi palutha. Ne mbela inamu simana mu dhi vule? 27 Olye ando gwomune ta vulu okugwedha ko nando okashona kuule womasiku gonkalamwenyo ye, mokukala e na oshimpwiyu? 28 Niishewe, omolwashike mu na okukala mu na oshimpwiyu shoonguwo? Ilongeni koongala dhokelundu nkene hadhi koko; ihadhi longo, dho ihadhi ihondjele oonguwo; 29 ihe ngame otandi mu lombwele, nokuli naSalomo meopalo lye alihe, ina zala nando a fe yimwe yomudho. 30 Ano ngele Kalunga osho ha zaleke iimeno yokelundu ngeyi, mbyoka owala yi li ko nena, ngula e tayi umbilwa meziko, mbela ne ite ke mu zaleka, ne yeitaalo eshona? 31 Onkee ano inamu kala mu na oshimpwiyu mu tye: ‘Otatu li shike?’ nenge ‘Otatu nu shike?’ nenge ‘Otatu zala shike?’ 32 Iinima mbyoka oyo tayi lalakanenwa noonkondo kaantu yomiigwana. Ho yeni gwomegulu oku shi kutya iinima ayihe mbyoka omwe yi pumbwa.
33 “Onkee ano tsikileni okupititha komeho* Uukwaniilwa waKalunga nuuyuuki we, nena ayihe mbiyaka yilwe otamu ke yi gwedhelwa ko. 34 Inamu kala ano mu na oshimpwiyu shesiku lyangula, oshoka esiku lyangula nalyo oli na iimpwiyu yalyo. Esiku kehe oli na uudhigu walyo.