KuTitus
1 Ngame, Paulus, ondi li omupiya gwaKalunga, nondi li omuyapostoli gwaJesus Kristus, metsokumwe neitaalo lyaahogololwa yaKalunga nosho wo nontseyo yi li mondjila kombinga yoshili, ndjoka yi li metsokumwe nesimanekokalunga, 2 niinima mbika oya kankamena ketegameno lyomwenyo gwaaluhe, ngono Kalunga, ngoka ihaa fundju, e tu uvanekela okuza konalenale; 3 nokwa tseyitha oohapu dhe peuthwathimbo lye, sho a inekelele ndje iilonga yokuuvitha palombwelo lye e li Omuhupithi gwetu. 4 Otandi nyolele Titus, omumwandjelela meitaalo lyetu limwe:
Uuwanawahenda nombili, ndjoka hayi zi kuKalunga, Tate, nosho wo kOmuhupithi gwetu, Kristus Jesus, nayi kale pamwe nangoye.
5 Onde ku thigi muKreta, opo wu tule iinima pomahala, mbyoka kaayi li melandulathano, nowu langeke po aakuluntugongalo miilando niilando, ngaashi nde ku lombwela: 6 ngele opu na omulumentu e na eihumbato ewanawa, omusamane e na omukulukadhi gumwe, e na oyana ihaaya popilwa iinima iiwinayi, nenge inaaya tseyika ye li aatangalali. 7 Oshoka elenga lyaKalunga, ano omutonateli oku na okukala e na eihumbato ewanawa, kee na omutse omukukutu, ihaa geye mbala, kee shi onkolwi, kee hole elongithonkondo, hamunalwiiho mokukonga eliko mokukotokela yalwe, 8 ihe oku na okukala e shi okuyakula aayenda, e hole uuwanawa, ha dhiladhila pandunge,* omuyuuki, omudhiginini, e na eipangelo, 9 ha longo aantu i ikolelela koohapu dhi shi okwiinekelwa, opo a vule okutsa aantu omukumo, sho te ya longo elongo, ndyoka ewanawa,* nokupukulula mboka ye li ompinge nalyo.
10 Oshoka opu na aalumentu oyendji aatangalali, mboka aapopyagani yowala naapukithi, unene tuu mboka ya kakatela kekenko. 11 Owa pumbwa okumweneka omakana gawo, molwaashoka aalumentu oyo tuu mboka otaya tsikile okuyona po eitaalo lyomagumbo agehe mokulonga aantu iinima ya puka nelalakano lyokukonga eliko nomakoto. 12 Gumwe gwomokati kawo, omuhunganeki gwawo yene, okwa ti: “Aakreta ohaya fundju aluhe, oya fa iilikama ya nika oshiponga, ye li aananyalo ya fuka.”
13 Oohapu ndhika odhoshili. Onkee ano molwetompelo ndika, tsikila oku ya pukulula* wa mana mo, opo ya kale ye na eitaalo lya kola, 14 kaaya gandje eitulomo koongano dhAajuda nokiipango yaalumentu, mboka ya thiga po oshili. 15 Iinima ayihe oya yogoka kaantu mboka ya yogoka; ihe kwaamboka ya nyata, nokaye na eitaalo, kuyo kapu na sha shoka sha yogoka, oshoka omadhiladhilo nomaiyuvo gawo oga nyata. 16 Ohaya popi montaneho kutya oye shi Kalunga, ihe otaye mu idhimbike okupitila miilonga yawo, oshoka oyo iikungitha yowala, ihaya vulika, noinaya gwana okulonga oshilonga kehe oshiwanawa.