Yotango kAakorinto
16 Shi na ko nasha nokugongela iimaliwa yaayapuki, otamu vulu okulandula omalombwelo, ngoka nda pa omagongalo gomuGalatia. 2 Mesiku lyotango lyoshiwike kehe, kehe gumwe gwomune na pungule sha, sha ikolelela kwaashoka e na, opo kaamu ke shi gongele, uuna nda thiki. 3 Ihe uuna nde ya, otandi ka tuma kune aalumentu, mboka mwa popila moontumwafo dheni, ya fale omagano geni gehalo ewanawa kuJerusalem. 4 Ihe ngele omu wete shi li nawa nangame ndi ye ko, otandi yi pamwe nayo.
5 Otandi ke ya kune tandi ziilile kuMakedonia, molwaashoka muMakedonia omo ndi na okupitila. 6 Otashi vulika ndi ye ndi kale nane uule wethimbo, nenge tashi vulika okufu akuhe, opo mu ka thindikile ndje ondjilakati hoka tandi yi. 7 Oshoka inandi hala oku mú talela po owala ngashingeyi uule wokathimbo okafupi, ihe onda hala ndi ye ndi kale nane uule wethimbo ele, ngele Jehova okwe shi hala. 8 Ihe otandi kala muEfeso, sigo oshituthi shOpentekoste, 9 molwaashoka ompito onene* oya egulukila ndje, ndi longe oshindji, ihe opu na aapataneki oyendji.
10 Ngele Timoteus a thiki kune, mu taambii ko, nokulongela kumwe naye, opo kaa kale e na uumbanda washa, oshoka naye ota longo iilonga yaJehova ngaashi owala ngame. 11 Onkee ano inamu mu dhina. Mu lalekeni nombili e ye kungame, oshoka onde mu tegelela pamwe naamwatate.
12 Shi na ko nasha nomumwatate Apollos, onde mu ladhipika lela e ye kune pamwe naamwatate. Ka li a hala okuya ngashingeyi, ihe ote ke ya ko, uuna a mono ompito.
13 Kaleni mwa tonata, kaleni mwa kola meitaalo, kaleni aalaadhi,* kaleni mwa nkondopala. 14 Kehe shoka tamu ningi, shi ningeni tamu inyengithwa kohole.
15 Aamwatate, otandi mú ladhipike ngeyi: Omu shi shi kutya Stefanas naanegumbo ye oyo ya ningi aalongwa yotango* muAkaia, noya kala taya yakula aayapuki nuudhiginini. 16 Nane wo vulikeni kaantu ya tya ngaaka, nokwaayehe, mboka ye na elongelokumwe, notaya longo nuudhiginini. 17 Ihe onda nyanyukwa sho Stefanas, Fortunatus naAkaikus ye ya, noya kwathela ndje noonkondo pehala lyeni; 18 oshoka oye tu tseni omukumo noonkondo.* Onkee ano kaleni mwa simaneka aalumentu ya tya ngaaka.
19 Omagongalo agehe gomuAsia otage mú kundile po. Otamu kundilwa po wo unene mu li aalanduli yOmuwa, kuAkula naPriskila nokegongalo, ndyoka hali gongalele megumbo lyawo. 20 Aamwatate ayehe otaye mú kundile po. Ikundeni mokwiihupita pahole.
21 Ngame Paulus, otandi mú kundile po noohapu, ndhoka nda nyola noshikaha shandje mwene.
22 Ngele opu na ngoka kee hole Omuwa, na thingwe. Omuwa gwetu, otatu ku indile, ila! 23 Uuwanawahenda wOmuwa, Jesus Kristus, nawu kale pamwe nane. 24 Ondi mu hole amuhe, molwaashoka omu li aalongwa yaKristus Jesus.