PaMateus
1 Embo ndika otali popi onziililo yezimo* lyaJesus Kristus,* omuna gwaDavid, omuna gwaAbraham:
2 Abraham ohe yaIsak;
Isak ohe yaJakob;
Jakob ohe yaJuda nosho wo yaamwahe;
3 Juda ohe yaPerez naSera, ye yina yawo oTamar;
Perez ohe yaHezron;
Hezron ohe yaRam;
4 Ram ohe yaAminadab;
Aminadab ohe yaNahshon;
Nahshon ohe yaSalmon;
5 Salmon ohe yaBoas; yina yaBoas oRahab;
Boas ohe yaObed; yina yaObed oRut;
Obed ohe yaIsai;
6 Isai ohe yomukwaniilwa David.
David ohe yaSalomo, e mu valelwa komukulukadhi gwaUria;
7 Salomo ohe yaRehoboam;
Rehoboam ohe yaAbia;
Abia ohe yaAsa;
8 Asa ohe yaJehosafat;
Jehosafat ohe yaJoram;
Joram ohe yaUsia;
9 Usia ohe yaJotam;
Jotam ohe yaAhas;
Ahas ohe yaHiskia;
10 Hiskia ohe yaManasse;
Manasse ohe yaAmon;
Amon ohe yaJosia;
11 Josia okwa vala Jekonia* naamwayinamati pethimbo lyokufalwa muupongekwa kuBabilon.
12 Konima sho ya falwa muupongekwa kuBabilon, Jekonia okwa vala Shealtiel;
Shealtiel ohe yaSerubbabel;
13 Serubbabel ohe yaAbiud;
Abiud ohe yaEliakim;
Eliakim ohe yaAsor;
14 Asor ohe yaSadok;
Sadok ohe yaAkim;
Akim ohe yaEliud;
15 Eliud ohe yaEleasar;
Eleasar ohe yaMattan;
Mattan ohe yaJakob;
16 Jakob ohe yaJosef, omusamane gwaMaria, yina yaJesus, ngoka ha ithanwa Kristus.
17 Omapipi agehe, okuza kuAbraham sigo okuDavid, oge li 14; okuza kuDavid sigo oosho ya falwa muupongekwa kuBabilon, omapipi 14; okuza sho ya falwa muupongekwa kuBabilon sigo okuKristus, omapipi 14.
18 Okuvalwa kwaJesus Kristus osho kwa li ngeyi; Pethimbo sho yina, Maria, a yalekwa kuJosef, manga inaaya hokana, okwa mono kutya oku li metegelelo, kekwatho lyombepo ondjapuki.* 19 Nonando ongawo, molwaashoka omusamane gwe,* Josef, okwa li omuyuuki noka li a hala oku mu sitha ohoni, okwa tokola e mu ethe po meholamo. 20 Ihe konima sho a dhiladhila kombinga yasho, omuyengeli gwaJehova okwe mu ihololele mondjodhi e te mu lombwele ta ti: “Josef, omwana gwaDavid, ino kala wa tila okufala Maria kegumbo, a ninge omukulukadhi gwoye, oshoka etegelelo ndyoka e na olye ya po koonkondo dhombepo ondjapuki. 21 Ota ka vala okanona okamati, nowu na oku ka luka Jesus,* oshoka ota ka hupitha aantu ye moondjo dhawo.” 22 Ashihe shoka osha ningwa, opo oohapu dhaJehova dhi gwanithwe, ndhoka a li a lombwele omuhunganeki gwe, tadhi ti: 23 “Omukadhona ota ningi etegelelo nota vala okanona okamati, notaka lukwa Immanuel,” ndyoka tali ti: “Kalunga oku li pamwe natse.”
24 Opo nduno Josef okwa papudhuka mo moomposi e ta ningi ngaashi omuyengeli gwaJehova e mu lombwele, nokwa fala Maria kegumbo a ninge omukulukadhi gwe. 25 Ihe ina ya naye momilalo, sigo oosho a vala okanona okamati, Josef e te ka luku Jesus.