Ontiyali kAakorinto
3 Mbela otwa pumbwa ishewe okwiipopya kutya otse oolye? Nenge ngaashi aantu yamwe, otwa pumbwa oontumwafo dhepopilo dha uka kune, nenge dha za kune? 2 Ne yene one ontumwafo yetu, ndjoka ya nyolelwa momitima dhetu, ya tseyika noyi leshwe kaantu ayehe. 3 Oshoka osha yela kutya omu li ontumwafo yaKristus, ndjoka ya nyolwa kutse tu li aapiya yaKalunga, inayi nyolwa nohinga, ihe onombepo yaKalunga omunamwenyo. Inayi nyolelwa kiipelende yomamanya, ihe okiipelende yopanyama, ano momitima.
4 Otu na einekelo ndika muKalunga okupitila muKristus. 5 Itatu vulu okutya otwa gwana okulonga iilonga mbika kutse yene, ihe okekwatho lyaKalunga tatu yi gwanitha po. 6 Oye he tu kwathele tu yi gwanithe po tu li aapiya yehangano epe, hayompango ya nyolwa, ihe oyombepo ondjapuki; oshoka ompango ya nyolwa otayi fala meso, ihe ombepo otayi gandja omwenyo.
7 Ngele ompango, ndjoka tayi fala meso, ndjono ya li ya nyolelwa komamanya oya li yi na eadhimo, ndyoka lya ningitha oyana yaIsraeli kaaya tale Moses moshipala, omolweadhimo lyoshipala she, eadhimo ndyoka lya li tali ka hulithwa po, 8 mbela iilonga, mbyoka tayi longwa kombepo, kayi na eadhimo li vule ndyoka? 9 Ngele ompango, ndjoka tayi eta eso, oya li yi na eadhimo, mbela iilonga, mbyoka tayi kwathele aantu ya ninge aayuuki, kayi na tuu eadhimo li vulithe mpoka! 10 Eadhimo lyompango oli vulike nokuli kokule keadhimo lyehangano epe. 11 Oshoka ngele shoka tashi ka hulithwa po oshi na eadhimo, nena eadhimo lyaashoka tashi kala po itali ka kala tuu enene!
12 Molwaashoka otu na etegameno ndyoka, otu na emanguluko enene lyokupopya, 13 noitatu ningi ngaashi Moses, sho a siikile oshipala she nelapi, opo oyana yaIsraeli kaaya vule okukala ye mu tala, sigo shoka shi na okuhulithwa po sha hulithwa po. 14 Ihe omadhiladhilo gawo oga li ga patwa . Oshoka sigo okunena osho ge li, nelapi lya faathana otali kala lye ya siikila, notali vulu owala okukuthwa ko okupitila muKristus. 15 Nokuli sigo okunena, omitima dhawo odha siikilwa kelapi, opo kaaya vule okuuva ko oohapu dhaMoses. 16 Ihe ngele gumwe a galukile kuJehova, elapi ohe li siikululwa. 17 Jehova Ombepo, naampoka pu na ombepo yaJehova opu na emanguluko. 18 Omanga atuhe, mboka twa siikululwa miipala, otwa fa esipili tali imonikila eadhimo lyaJehova; otwa lunduluka tu kale ngaashi Kalunga, neadhimo lye ohali imonikila mutse thiluthilu, ngaashi naanaa sha ningwa kuJehova,* ngoka e li Ombepo.