Yotango kAakorinto

13 Ngele ohandi popi momalaka gaantu nogaayengeli, ihe kandi na ohole, nena onda fa owala ongendjo tayi kwelengendja, nenge oshikwelengendji tashi kwelengendja; 2 nongele ondi na omagano gokuhunganeka, okuuva ko iiholekwa ayihe iiyapuki, nondi na ontseyo ayihe, nongele ondi na eitaalo lya kola, tali vulu okwiinyengitha* oondundu, ihe kandi na ohole, nena ngame kandi shi sha.* 3 Nonando ondi gandje po iinima yandje ayihe, ndi paluthe yalwe, nokuyamba po olutu lwandje, opo ndi vule okwiitanga, ihe kandi na ohole, itashi kwatha ndje sha.

4 Ohole oyi na ontalanteni,* noyi na olukeno. Ohole kayi na ondumbo. Ihayi itanga, ihayi inenepeke,* 5 ihayi ihumbata nayi,* ihayi lalakanene uuwanawa wayo yene, ihayi uvu nayi mbala. Ihayi dhimbulukwa uuwinayi ye wu ningilwa. 6 Ihayi nyanyukilwa okwaanuuyuuki, ihe ohayi nyanyukilwa oshili. 7 Ohayi siikile iinima ayihe, ohayi itaale iinima ayihe, ohayi tegamene iinima ayihe, nohayi idhidhimikile iinima ayihe.

8 Ohole itayi hulu po nando. Ihe ngele opu na omagano gokuhunganeka, otaga hulu po; ngele opu na gokupopya momalaka,* otaga hulu po; nongele opu na ontseyo, otayi hulu po. 9 Oshoka ontseyo yetu inayi ihwa po, nokuhunganeka kwetu inaku ihwa po, 10 ihe ngele shoka sha ihwa po oshe ya, shoka inaashi ihwa po otashi hulu po. 11 Sho nda li okanona, onda li handi popi ngaashi okanona, handi dhiladhila ngaashi okanona, nonda li ndi na oondunge dha fa dhokanona. Ihe ngashingeyi sho nda ninga omukuluntu, onda etha po iikala yuunona. 12 Oshoka ngashingeyi otwa fa tatu italele mesipili lyoshiyela lya siilila, ihe konima yethimbo otatu ka kala tu iwetele mo nawa. Mongashingeyi, kandi na ontseyo ya ihwa po kombinga yaKalunga, ihe otandi ke mu tseya thiluthilu, ngaashi owala ye e shi ndje nawanawa. 13 Ihe iinima mbika itatu opo tayi kala: eitaalo, etegameno nohole; ihe shoka sha simanenena kwaayihe ohole.