PaLukas

8 Nziya, konima yaashono, Jesus okwa ende oshilando noshilando nosho wo omukunda nomukunda ta uvitha nota tseyitha onkundana ombwanawa yUukwaniilwa waKalunga, naayapostoli ye 12 oya li pamwe naye, 2 mwa kwatelwa wo aakiintu yontumba, mboka muyo a li a tidha mo oombepo dha nyata,* nokwe ya aludha komauvu gawo. Aakiintu mboka oyo: Maria, ngoka a li ha ithanwa Magdalena, ngoka muye a tidha mo oondemoni heyali. 3 Johanna, omukulukadhi gwaKusa, elenga lyaHerodes; Susanna nosho wo aakiintu yalwe oyendji, mboka ya li haye ya yakula taya longitha iiniwe yawo.

4 Sho ongundu onene yaantu, ya gongala pamwe naamboka ya li ye ya kuye ya za kiilando niilando, okwa popi nayo ta longitha ethaneko, ta ti: 5 “Omukuni okwa yi, a ka kune oombuto dhe. Sho a li ta kunu, oombuto dhimwe odha gwile mondjila e tadhi lyatagulwa, nuudhila wokegulu owe ya e tawu dhi li po. 6 Dhimwe odha gwile kemanya, naasho dha piti, odha ganya, oshoka kadha li hadhi mono omeya. 7 Dhimwe odha gwile mokati koondjoho, naasho dha koko mumwe noondjoho, oondjoho odha thininike iimeno. 8 Ihe dhilwe odha gwile mevi ewanawa, naasho dha piti, odha vala lwethele.” Sho a mana okupopya iinima mbika, okwa popi mokule ta ti: “Ngoka e na omakutsi na uve ko.”

9 Ihe aalongwa ye oye mu pula kutya ethaneko ndyoka otali ti shike. 10 Okwa ti: “Ne omwa pewa ontseyo yokutseya iiholekwa iiyapuki yUukwaniilwa waKalunga, ihe mboka kaaye shi aalongwa, iinima ayihe otaye yi lombwelwa momathaneko, opo nonando otaya tala, itaya mono ko, nonando otaya pulakene, itaya uvu ko nokuli eityo lyaashoka tashi popiwa. 11 Ethaneko ndyoka otali ti ngeyi: Oombuto odho oohapu dhaKalunga. 12 Ndhoka dha gwile mondjila oomboka ya uvu oohapu, nOndiyapoli oye ya e tayi ya yugu oohapu ndhoka dha kunwa momitima dhawo, opo kaaya itaale noya hupithwe. 13 Ndhoka dha gwile kemanya oomboka, sho ya uvu oohapu, ye dhi taamba ko nenyanyu, ihe inadhi mena omidhi muyo. Otaye dhi itaale owala uule wokathimbo, ihe uuna ya adhika kemakelo, otaya sholola. 14 Ndhoka dha gwile mokati koondjoho oomboka ya uvu oohapu, ihe iimpwiyu, omaliko nomainyanyudho guuyuni mbuka, otayi dhi thininike noitaya imike iiyimati iiwanawa. 15 Ndhoka dha kunwa mevi ewanawa, aanamitima omiwanawa, mboka, konima sho ya uvu oohapu, ye dhi dhiginine e taya imike iiyimati neidhidhimiko.

16 “Kapu na omuntu ha tema olamba e te yi siikile noshiyuma, nenge e yi tule kohi yombete, ihe ohe yi tula koshihukikwa, opo ayehe mboka taye ya megumbo ya mone uuyelele; 17 oshoka kapu na shoka sha holekwa thiluthilu itaashi ka hololwa, nokapu na shoka sha siikilwa itaashi ka tseyika, noitashi ka kala inaashi ya puuyelele. 18 Onkee ano pulakeneni nawa kwaashoka tandi mu lombwele, oshoka kehe ngoka e na ota pewa oshindji, ihe kehe ngoka kee na sha ota kuthwa nokuli naashoka ta dhiladhila kutya oku shi na.”

19 Opo nduno yina yaJesus naamwayinamati oye ya kuye, ihe kaya li ya vulu okuya popepi naye, oshoka okwa li a ngundumanenwa kaantu oyendji. 20 Onkee ano gumwe okwa ti kuye: “Nyoko naamwanyoko oya thikama pondje, ya hala oku ku mona.” 21 Jesus okwa yamukula ta ti: “Meme naamwamememati oyo mboka haya uvu oohapu dhaKalunga e taya vulika kudho.”

22 Esiku limwe, ye naalongwa ye oya yi mowato e ta ti kuyo: “Natu taagulukileni handiyaka yetale.” Onkee ano oya yi. 23 Ihe sho ya li taya yi, Jesus okwa kotha. Opo nduno metale omwa tukuluka oshikungulu shombepo oshidhigu, nowato yawo oya tameke okuudha omeya, noya li yi li pokuningina. 24 Onkee ano oya yi e taye mu pendula, taya ti: “Muhongi, Muhongi, otu li pokusa!” Opo ihe okwa penduka e ta ganda ombepo nomakuthikuthi e tayi mwena thilu. 25 Opo nduno okwa ti kuyo: “Kamu na eitaalo ano?” Ihe oya li ya tila, noya li ya kumwa, e taya lombwelathana taya ti: “Omuntu a tya naanaa ngiini nguno, sho ombepo nomeya tayi vulika kuye?”

26 Opo ihe oya thikameke owato yawo komunkulofuta, moshitopolwa shAagerasa, shoka shi li handiyaka yaGalilea. 27 Sho Jesus a zi mo mowato, omulumentu, e na ondemoni, a zi moshilando, okwe mu tsakaneke. Omulumentu ngoka okwa kala ethimbo ele ihaa zala sha, noka li ha zi megumbo, ihe okoombila.* 28 Sho a mono Jesus, okwa igidha, nokwa tsu oongolo komeho ge e ta popi mokule ta ti: “Owa halela ndje shike, Jesus, Omuna gwaKalunga Omukombandambanda? Otandi ku indile kuu hepeke ndje.” 29 (Jesus okwa kala ta lombwele ombepo ya nyata* yi ze mo momulumentu ngoka. Ombepo, ndjoka ya nyata, oya kala nokuhepeka omulumentu ngoka lwiikando,* nolundji okwa li ha kala a mangwa nomalyenge komaako nokomagulu, nokwa li ha kala a langelwa, ihe okwa li ha itokola mo, nondemoni oya li hayi mu fala komahala ga ikalela.) 30 Jesus okwe mu pula ta ti: “Ongoye lye?” Okwe mu yamukula a ti: “Ongame ongundu onene,” oshoka muye omwa li oondemoni odhindji. 31 Oondemoni odha kala tadhi indile Jesus kee dhi tidhile molumbogo. 32 Pompito ndjoka opwa li oshigunda oshinene shiingulu tayi li kondundu. Onkee ano oondemoni odhe mu indile, e dhi pitike dhi ye miingulu, nokwe dhi pitike. 33 Opo ihe oondemoni odha zi mo momulumentu ngoka, nodha yi miingulu, noshigunda ashihe shiingulu osha kolokele metale okuza koontuni e tayi sile mo. 34 Ihe sho aasita yiingulu ya mono shoka sha ningwa po, oya matuka ya uka moshilando nomomikunda, noye shi hokololele aantu.

35 Opo nduno aantu oya yi ya ka tale shoka sha ningwa po. Aantu oye ya kuJesus, noya adha omulumentu, ngoka a li e niwe koondemoni, a zala noku li nawa, nokwa kuutumba poompadhi dhaJesus, noya li ya tila noonkondo. 36 Mboka ya mono shoka sha ningwa po, oye ya hokololele nkene omulumentu, ngoka a li e na oondemoni, a aludhwa. 37 Opo nduno ongundu onene yaantu yomoshitopolwa shAagerasa oya pula Jesus, a ze mo moshitopolwa shawo, oshoka oya li ya tila noonkondo. Okuza mpono, okwa londo mowato a ye. 38 Omulumentu, ngoka a li e na oondemoni, okwa kala ta indile Jesus, a ye pamwe naye, ihe okwe mu laleke a ye, ta ti: 39 “Inda kegumbo e to kala to hokolola shoka Kalunga e ku ningila.” Onkee ano okwa yi, nokwa hokololele oshilando ashihe shoka Jesus e mu ningila.

40 Sho Jesus a shuna kuGalilea, ongundu yaantu oye mu taamba ko nombili, oshoka ayehe oya li ye mu tegelela. 41 Ihe tala! Omulumentu gwedhina Jairus, ngoka a li omukuluntu gwosinagoga, okwe ya kuye. Opo nduno okwa tsu oongolo poompadhi dhaJesus e ta tameke oku mu indila, e ye kegumbo lye, 42 oshoka okamwanakadhona ke akeke,* hoka ka li ke na omimvo 12 lwaampono, oka li ke li pokusa.

Omanga Jesus a li ta yi, ongundu yaantu oya li tayi ithininike muye. 43 Pethimbo mpoka opwa li omukiintu, ngoka a kala e na uuvu wetiko lyombinzi uule womimvo 12, nokapu na ngoka a li a vulu oku mu aludha. 44 Omukiintu ngoka okwe mu ziilile konima e ta gumu oonyemba dhonguwo ye yokombanda, na nziya etiko lye lyombinzi olya kodha. 45 Onkee ano Jesus okwa ti: “Olye a gumu ndje?” Sho ayehe ye shi ipatana, Petrus okwa ti: “Muhongi, owa kundukidhwa kaantu oyendji notaya ithininike mungoye.” 46 Ihe Jesus okwa ti: “Opu na gumwe a gumu ndje, oshoka onda dhimbulula kutya mungame omwa za oonkondo.” 47 Sho omukiintu ngoka a mono kutya ita vulu we okuholama, okwe ya kuJesus ta kakama e te mu tsile oongolo, nokwa popi montaneho yaantu ayehe kutya omolwashike e mu gumu nankene a aluka nziya. 48 Ihe Jesus okwa ti kuye: “Omumwandjekadhona, eitaalo lyoye olye ku aludha. Inda nombili.”

49 Manga a li ta popi, omukalelipo gumwe gwomukuluntu gwosinagoga okwe ya, ta ti: “Okamwoyekadhona oka sa; ino monitha we Omuhongi iihuna.” 50 Sho Jesus e shi uvu, okwa lombwele Jairus ta ti: “Ino tila, kala owala wu na eitaalo; otaka kala ishewe nomwenyo.”* 51 Sho Jesus a thiki pegumbo, ina pitika nando ogumwe a ye mo naye, kakele kaPetrus, Johannes, Jakob nosho wo he nayina yokakadhona. 52 Ihe aantu ayehe oya li taya lili noonkondo* omolwako. Onkee ano okwa ti kuyo: “Inamu lila we, oshoka okanona inaka sa, ihe oka kotha.” 53 Sho a popi ngawo, oya tameke oku mu yola ye mu sa uunye, oshoka oya li ye shi kutya okanona oka sa. 54 Ihe okwe ka kwata moshikaha e ta ti kuko: “Kakadhona, penduka!” 55 Opo nduno oka kala ishewe nomwenyo, e taka penduka nziya, na Jesus okwe ya lombwele, ye ka pe okulya. 56 Aavali yako oya li ya nyanyukwa noonkondo, ihe Jesus okwe ya indile, kaaya lombwele nando omuntu kombinga yaashoka sha ningwa po.