KAagalati

5 Oshoka Kristus okwe tu mangulula, opo tu kale twa manguluka. Onkee ano kaleni mwa kolelela, noinamu igandja we kondjoko yuupika.

2 Taleni! Ngame, Paulus, otandi mú lombwele kutya ngele omwa kenkwa, shoka Kristus a ninga itashi mú etele we uuwanawa washa. 3 Natango otandi tseyithile omulumentu kehe, ngoka ta kenkwa, kutya okwa tegelelika a dhiginine Ompango ayihe. 4 Omwa topolwa ko kuKristus, ne mboka tamu kambadhala okutalika ko aayuuki okupitila mompango; omwa hunutha uuwanawahenda we. 5 Oshoka tse kombinga yetu, otwa tegelela nondjuulukwe okutalika ko aayuuki omolweitaalo nokekwatho lyombepo ondjapuki. 6 Okukenkwa, nenge okwaakenkwa itaku ti sha kwaamboka ye li muukumwe naKristus Jesus, ihe eitaalo, ndyoka tali inyengithwa kohole, olyo tali ti sha.

7 Omwa li tamu matuka nawa.* Olye e mú imbi mu tsikile okuvulika koshili? 8 Oshinima, shoka tamu lalakanene, inashi za kuNgoka te mu ithana. 9 Efulika eshona otali vulu okufulika* ondombo ayihe. 10 Ondi na einekelo kutya ne mboka mu li muukumwe nOmuwa otamu tsu kumwe nangame; ihe ngoka te mú etele uupyakadhi, kutya nduno na kale oye lye, ota ka pewa epangulo, ndyoka a ilongela. 11 Aamwatate, ngame polwandje, ngele otandi uvitha natango kombinga yekenko, omolwashike tandi hepekwa natango? Ngele osho shi li ngawo, nena kehe shoka tashi pundukitha kombinga yomuti gwomahepeko* osha hulithwa po. 12 Onda hala andola aalumentu, mboka taya kambadhala oku mú pukitha, ya ithone yo yene.*

13 Aamwatate, emanguluko, ndyoka mwa ithanenwa, inamu li longitha li li ompito yokugwanitha po uuhalu wopanyama, ihe yakulathaneni pahole ongaapika. 14 Oshoka Ompango ayihe oya gwanithwa po* koshipango shoka tashi ti: “Hola mukweni, ngaashi wu ihole mwene.” 15 Ngele omwa kala tamu kondjithathana nokweehamekathana, kotokeni kaamu ihanagule po.

16 Ihe otandi mú lombwele tandi ti, kaleni hamu wilikwa kombepo, opo kaamu gwanithe po uuhalu wopanyama nandonando. 17 Oshoka onyama oyi li ompinge nombepo, nombepo oyi li ompinge nonyama; iinima mbika otayi kondjithathana, opo kaamu longe iinima, mbyoka mwa hala okulonga. 18 Shimwe ishewe, ngele ohamu wilikwa kombepo, nena kamu li kohi yompango.

19 Iilonga yonyama oyi iwetikile; oyo ngaashi omilalo dha nyata,* okwaanuuyogoki,* okuyona nopwaa na uuhwenge,* 20 okulongela iikalunga, uumpulile, uutondwe, oontamanana, ondumbo, ongeyo ya pitilila, omahilathano, omatopoko, iimpaga, 21 efupa, uunkolwi, okukutha ombinga miituthi ya kwatela mo eihumbato lya nyata nosho wo iinima ya fa mpoka. Otandi mú londodha komeho yethimbo kombinga yiinima mbika, ngaashi nda li nde mú londodha nale kutya mboka haya longo iilonga ya tya ngaaka itaya ka thigulula Uukwaniilwa waKalunga.

22 Mepingathano naashoka, iiyimati yombepo oyo mbika: Ohole, enyanyu, ombili, eidhidhimiko,* ohenda, uuwanawa, eitaalo, 23 omwenyo omwaanawa neipangelo. Kapu na ompango yi li ompinge niinima mbika. 24 Kakele kaashono, mboka yaKristus Jesus oya alela komuti omahalo gawo gopanyama.

25 Ngele otatu wilikwa kombepo yaKalunga, natu kaleni wo hatu katuka metsokumwe newiliko lyombepo yaKalunga. 26 Inatu kala tu na uuntsa, ombepo yethigathanopo mokati ketu nosho wo okusilathana efupa.