Timoteus gwotango
3 Oohapu ndhika odhi shi okwiinekelwa, ndhoka tadhi ti: Ngele opu na omulumentu ta lalakanene okuninga omutonateli, okwi ihalela oshilonga oshiwanawa. 2 Onkee ano omutonateli oku na okukala e na eihumbato ewanawa, omusamane e na omukulukadhi gumwe, e na ondjele, ha dhiladhila pandunge,* e na elandulathano, e shi okuyakula aayenda, e shi okulonga aantu, 3 ke na okukala onkolwi, ke na okukala e hole elongithonkondo, ihe oku na okukala e na ondjele, ke na okukala e hole oontamanana, ke na okukala e hole iimaliwa, 4 oku na okukala omulumentu ha tonatele* nawa aanegumbo lye, e na oyana haya vulika, noye na eihumbato ewanawa, 5 (oshoka ngele omulumentu ke shi nkene e na okutonatela* aanegumbo lye, ota ka vula ngiini okusila oshimpwiyu egongalo lyaKalunga?), 6 ke na okukala opo a ningi omwiitaali, opo kaa kwatwe kuuntsa e ta pangulwa ngaashi Ondiyapoli. 7 Kakele kaashono, oku na okukala ha popilwa muuwanawa* kwaamboka kaaye shi ooitaali,* opo kaa shekwe* kaantu, nokugwila momwigo gwOndiyapoli.
8 Sha faathana, aayakuligongalo oye na okukala yi itula mo, ihaaya fundju, ihaaya nu iikolitha sha pitilila, kaaye shi aanalwiho mokulikola, 9 ihe oye na okudhiginina eitaalo, ndyoka li li oshiholekwa oshiyapuki shaKalunga, ye na eiyuvo lya yela.
10 Shimwe ishewe, naya talike tango, ngele oya gwana okuyakula; opo nduno taya langekwe po ye li aayakuligongalo, molwaashoka oye na eihumbato ewanawa.
11 Aakiintu nayo naya kale yi itula mo, kaaye na oluhoko, ye na ondjele, noye li aadhiginini miinima ayihe.
12 Omuyakuligongalo oku na okukala omusamane gwomukulukadhi gumwe, e shi okutonatela oyana nawa nosho wo aanegumbo lye. 13 Oshoka aalumentu, mboka haya yakula nawa, otayi iningile edhina ewanawa, notaya ka kala ye na emanguluko enene lyokupopya kombinga yeitaalo lyawo muKristus Jesus.
14 Otandi ku nyolele kombinga yiinima mbika, nonando onda dhiladhila okuya kungoye masiku, 15 opo ngele onda kala inaandi ya, wu kale wu shi nkene wu na okwiihumbata megumbo lyaKalunga, ndyoka li li egongalo lyaKalunga omunamwenyo, noli li ongudhi nekankameno lyoshili. 16 Eeno, oshiholekwa oshiyapuki nosha simanenena shi na ko nasha nesimanekokalunga osho shika: ‘Jesus okwa li a ningi omuntu gwopanyama, naasho ishewe a ningi omuntu gwopambepo, Kalunga okwe mu tala ko omuyuuki, a holoka montaneho yaayengeli, a uvithwa mokati kiigwana, a itaalwa kaantu muuyuni, nokwa taambiwa ko megulu, nokutumbalekwa.’