PaMateus

14 Pethimbo ndyoka, Herodes, omupangeli gwoshitopolwa shaGalilea,* okwa uvu kombinga yaJesus, 2 nokwa ti kaapiya ye: “Nguka oJohannes Omuninginithi. Okwa yumudhwa kuusi, nomolwaasho ta vulu okulonga iikumithalonga ya tya ngawo.” 3 Herodes* okwa li a kwatitha po Johannes e te mu tulitha mondholongo omolwaHerodias, omukulukadhi gwamumwayina, Filippus. 4 Oshoka Johannes okwa kala ta lombwele Herodes, ta ti: “Inashi pitikwa pampango, sho wa hokana omukiintu ngoka.” 5 Ihe nonando okwa li a hala okudhipaga Johannes, okwa li a tila ongundu yaantu, molwaashoka oya li ya tala ko Johannes e li omuhunganeki. 6 Omanga oshituthi shevalo lyaHerodes sha li tashi dhanwa, omwanakadhona gwaHerodias okwa tutula uudhano, mboka Herodes a li a panda noonkondo, 7 onkee okwa uvanekele omukadhona ngoka nokugana kutya ote ke mu pa kehe shoka ta pula. 8 Ihe omukadhona okwa lombwelwa kuyina, a tye: “Pe ndje omutse gwaJohannes Omuninginithi moshiyaha shika.” 9 Nonando omukwaniilwa okwa li a nika oluhodhi, okwa gandja elombwelo shi ningwe, omolwegano ndyoka a ningi nomolwaayenda ye. 10 Onkee ano okwa tumu omukwiita gumwe kondholongo, Johannes a ka tetwe omutse. 11 Omutse gwe ogwa etwa gu li moshiyaha e tagu pewa omukadhona, omukadhona e te gu fala kuyina. 12 Lwanima, aalongwa ye oye ya, noya kutha po omudhimba gwe e taye gu fumvike. Okuza mpono, oya yi kuJesus e taye shi mu lombwele. 13 Sho Jesus e shi uvu, okwa zi po mpoka nowato e ta yi kehala li ikalela e ki ikalele. Ihe sho oongundu dhaantu dhe shi uvu, odhe mu landulile ko tadhi ende kolupadhi, dha za kiilando yi ili noyi ili.

14 Sho e ya komunkulofuta, okwa mono ongundu onene yaantu nokwa li e yi etela ohenda e ta aludha aavu yawo. 15 Ihe sho kwa toko, aalongwa ye oye ya kuye e taya ti: “Kehala huka okokule, nokwa toka; laleka ongundu yaantu, opo yi ye momikunda yi ka ilandele iikulya.” 16 Ihe Jesus okwa ti kuyo: “Inaya pumbwa okuya; ya peni sha shokulya.” 17 Aalongwa ye oya ti kuye: “Mpaka otu na po owala iikwiila itano noohi mbali.” 18 Okwa ti kuyo: “Yi eteni kungame.” 19 Opo nduno okwa lombwele ongundu yaantu yi kuutumbe pomwiidhi. Opo ihe okwa kutha iikwiila mbyoka itano noohi mbali, nokwa ligamene kegulu e ta galikana, nokonima okwa pambula iikwiila e te yi pe aalongwa ye, naalongwa ye oye yi topolele aantu. 20 Onkee ano ayehe oya li noya kuta, opo nduno aalongwa oya gongele iipambu mbyoka ya hupu po, ya udha iimbamba 12. 21 Mboka ya li, oya li aalumentu 5 000 nosho wo aakiintu naanona. 22 Nziya okwa lombwele aalongwa ye ya londe mowato, opo ye mu tetekele handiyaka yefuta, omanga ye ta laleke ongundu yaantu.

23 Konima sho a laleke ongundu yaantu, okwa londo kondundu a ka galikane i ikalela. Okwa kala hoka oye awike, sigo kwa toko. 24 Pethimbo mpoka owato oya li kokule unene nomunkulofuta, noya li tayi monithwa iihuna komakuthikuthi, oshoka ombepo oya li tayi ya ziilile komeho. 25 Ihe lwokoongulasha,* Jesus okwe ya kuyo, ta ende kombanda yomeya. 26 Sho aalongwa ye ye mu mono ta ende kombanda yomeya, oya li ya tila noya ti: “Yakwetu oshike shono tashi zi hono?”* Oya li wo taya kugu mokule omolwuumbanda. 27 Ihe Jesus okwe ya lombwele ta ti: “Ngungumaneni! Ongame; inamu tila.” 28 Petrus okwa ti kuye: “Omuwa, ngele ongoye, lombwela ndje ndi ye kungoye tandi ende kombanda yomeya.” 29 Okwa ti: “Ila!” Onkee ano Petrus okwa zi mo mowato e ta ende kombanda yomeya, a uka kuJesus. 30 Ihe sho a tala koshikungulu shombepo, okwa kwatwa kuumbanda. Naasho a tameke okuningina okwa igidha ta ti: “Omuwa, hupitha ndje!” 31 Nziya Jesus okwe mu kwata e te mu nana nokwa ti kuye: “Ngoye gweitaalo eshona, omolwashike wa limbililwa?” 32 Konima sho ya yi mowato, oshikungulu shombepo osha kodha.* 33 Opo nduno mboka ye li mowato oye mu tsile oongolo, taya ti: “Ngoye Omuna gwaKalunga shili.” 34 Opo nduno oya taakana efuta e taya yi kuGenesaret.

35 Sho aantu yomoshitopolwa moka ye mu dhimbulula, oya tumu etumwalaka pomikunda dhopopepi, naantu oya eta kuye ayehe mboka taya ehama. 36 Aantu oye mu indile ya kwate owala nando okoonyemba dhonguwo ye yokombanda, naayehe mboka ye dhi kwata oya aluka thiluthilu.