PaMateus

8 Konima sho Jesus a kuluka kondundu, oongundu dhaantu odhe mu landula. 2 Ihe tala, omunashilundu okwe ya kuye e ta tsu oongolo puye e ta ti: “Omuwa, ngele owa hala, oto vulu okwaaludha* ndje.” 3 Opo ihe Jesus okwa yelutha oshikaha she, nokwe mu gumu e ta ti: “Onda hala, aluka!* Mbalambala okwa aluka kuuvu woshilundu.” 4 Opo nduno Jesus okwe mu lombwele a ti: “Ino shi lombwela nando omuntu, ihe inda wu ka iyulike komuyambi e to gandja omayambo ngaashi sha popiwa mOmpango yaMoses, shi kale uumbangi kutya owa aluka.”

5 Sho Jesus a thiki muKapernaum, kuye okwe ya omukuluntu gwetangakwiita, te mu hehela, 6 ta ti: “Omuwa, omupiya gwandje oku li kegumbo a lala a sa ombanda, nota mono iihuna noonkondo.” 7 Jesus okwe mu lombwele a ti: “Otandi ya, ndi mu aludhe.” 8 Opo ihe omukuluntu gwetangakwiita okwa ti: “Omuwa, ngame inandi gwana oku ku taamba megumbo lyandje, popya owala lumwe, omupiya gwandje nota aluka. 9 Oshoka nangame wo omupangelwa owala ndi na aakwiita ye li kohi yewiliko lyandje. Ngele onda ti kugumwe, ‘Inda!’ ota yi, nongele onda ti kumukwawo, ‘Ila!’ ote ya, nuuna nda ti komupiya gwandje, ‘Ninga shino!’ ote shi ningi.” 10 Sho Jesus e shi uvu, okwa li a kumwa nokwa lombwele mboka ya li ye mu landula a ti: “Otandi mu lombwele oshili kutya muIsraeli ashihe inandi mona mo nando ogumwe e na eitaalo lya kola lya fa ndika. 11 Ihe ngame otandi mu lombwele kutya oyendji otaya ka za kuuzilo nokuuninginino, ya kuutumbe poshililo pamwe naAbraham, Isak naJakob mUukwaniilwa womegulu; 12 omanga oyana yUukwaniilwa taya ka umbilwa pondje momilema, moka taya ka lilagana nokwiikokota komayego.” 13 Opo nduno Jesus okwa lombwele omukuluntu gwetangakwiita a ti: “Inda! Molwaashoka owu ulika eitaalo, shoka wa pula oto shi ningilwa.” Opo ihe omupiya gwe okwa aluka ethimbo olyo tuu ndyoka.

14 Sho Jesus a yi kegumbo lyaPetrus, okwa adha yinamweno yaPetrus a lala, e na oshivu. 15 Onkee ano Jesus okwa gumu oshikaha she e ta aluka nokwa yambuka po e ta yakula Jesus. 16 Ihe konima sho kwa toko, aantu oye eta kuye oyendji mboka ye na oondemoni e te dhi tidha mo nohapu, nokwa aludha ayehe mboka ya li taya ehama, 17 opo shoka sha popiwa okupitila momuhunganeki Jesaja, ngoka a ti: “Oye okwa kutha po uuvu nuuwehame wetu,” shi gwanithwe.

18 Ano Jesus sho a mono ongundu yaantu ye mu kundukidha, okwa lombwele aalongwa ye, opo ya ye pamwe naye handiyaka yefuta. 19 Opo ihe omulongimpango gumwe okwe ya kuye e ta ti: “Muhongi, otandi ku landula shaa mpoka to yi.” 20 Ihe Jesus okwa ti kuye: “Ookaandje oye na omakwena, nuudhila owu na iihandhila, ihe Omuna gwomuntu ke na mpoka ta langeke omutse gwe.” 21 Opo nduno gumwe gwomaalongwa ye okwa ti kuye: “Omuwa, pitika ndje manga ndi fumvike tate.” 22 Jesus okwa ti kuye: “Tsikila okulandula ndje! Etha aasi ya fumvike aasi yawo.”

23 Sho a yi mowato, aalongwa ye oya yi mo pamwe naye. 24 Ihe tala, oshikungulu oshinene osha tukuluka mefuta, nomakuthikuthi oga li taga idhenge mowato, ihe Jesus okwa li owala a kotha. 25 Aalongwa ye oya yi kuye e taye mu pendula taya ti: “Omuwa, tu hupitha, otu li pokusa!” 26 Ihe okwa ti kuyo: “Omolwashike mwa tila, ne yeitaalo eshona?” Opo ihe okwa thikama e ta ganda ombepo nefuta e tayi mwena thilu. 27 Onkee ano aalumentu mboka oya li ya kumwa noya ti: “Omuntu a tya ngiini nguno, sho ombepo nefuta tayi vulika kuye?”

28 Sho ya thiki handiyaka yefuta koshitopolwa shAagadara, aalumentu yaali ye na oondemoni taya zi poombila, oye mu tsakaneke. Molwaashoka oya li ye na oonkondo yo aatilithi, kapwa li ngoka a li ha vulu okweenda pondjila ndjoka. 29 Oyo oya igidha taya ti: “Owe tu halela shike, Omuna gwaKalunga? Owe ya huka wu tu hepeke, omanga ethimbo ndyoka lya uthwa inaali thika?” 30 Ihe kokule nayo okwa li ku na oshigunda oshinene shiingulu tayi li. 31 Onkee ano oondemoni odhe mu hehela tadhi ti: “Ngele owe tu tidha mo tu pitika tu ye miingulu mbyoka.” 32 Jesus okwe dhi lombwele ta ti: “Indeni!” Opo ihe odha zi mo e tadhi yi miingulu mbyoka, noshigunda ashihe shiingulu osha kolokele mefuta okuza koontuni e tayi sile mo. 33 Ihe aasita yiingulu oya matuka ya uka moshilando, noya hokolola ashihe shoka sha ningwa po, mwa kwatelwa wo shoka sha ningilwa aalumentu mboka ya li ye na oondemoni. 34 Opo nduno aantu oyendji moshilando oye ya, ya tsakaneke Jesus, naasho ye mu mono, oye mu indile a ze mo moshitopolwa shawo.