Yotango kAakorinto

7 Shi na ko nasha niinima, mbyoka mwa nyola, oshi li nawa komulumentu kaa gume* omukiintu; 2 ihe omolwomilalo dha nyata,* ndhoka dhi li kehe pamwe, omulumentu kehe na kale e na omukulukadhi gwe mwene, nomukiintu kehe na kale e na omusamane gwe mwene. 3 Omusamane na gwanithile po omukulukadhi gwe oompumbwe dhe dhopamilalo, nomukulukadhi na ningile wo omusamane gwe sha faathana. 4 Omukulukadhi ke na uuthemba wokupangela olutu lwe mwene, ihe omusamane gwe; sha faathana, omusamane ke na uuthemba wokupangela olutu lwe mwene, ihe omukulukadhi gwe. 5 Inamu idhilikathana omilalo, shila ongele mwa uvathana mu ninge ngaaka uule wethimbo lyontumba, opo ethimbo ndyoka mu li longithe mokugalikana e tamu ya pamwe ishewe, opo Satana kaa kale te mu makele, sho itaamu vulu okwiidhidhimika.* 6 Ihe otandi popi ngeyi, ndi mú pe owala omayele, ihe itandi mú lombwele andola osho mu ninge. 7 Ihe onda hala andola aantu ayehe ya kale ngaashi ngame. Ihe kehe gumwe Kalunga okwe mu pa omagano ge mwene; gumwe okwa pewa ga tya ngeyi, namukwawo ogi ili.

8 Ihe ngashingeyi, otandi lombwele mboka inaaya ya mondjokana nosho wo aaselekadhi kutya oshi li nawa ya kale ngaashi ngame. 9 Ihe ngele kaye na eipangelo, naya hokane, oshoka oshi li hwepo ya hokane, pehala lyokuhepekwa komahalo gopamilalo.

10 Otandi pe aaihokani omayele, kage shi gandje, ihe oga zi kOmuwa, kutya omukulukadhi ke na okutopoka nomusamane gwe. 11 Ihe ngele omukulukadhi okwa topoka naye, na kale inaa hokanwa, nenge a hangane ishewe nomusamane gwe; nomusamane ina thiga po omukulukadhi gwe.

12 Ngame otandi lombwele yalwe, eeno, ngame, ihe ke shi Omuwa: Ngele opu na omumwatate e na omukulukadhi kee shi omwiitaali, nomukulukadhi okwa zimina okukala pamwe naye, ine mu thiga po; 13 nongele omukiintu oku na omusamane kee shi omwiitaali, nomusamane okwa zimina okukala pamwe naye, ina thiga po omusamane gwe. 14 Oshoka omusamane, ngoka kee shi omwiitaali, okwa yapulwa omolwomukulukadhi gwe, nomukulukadhi, ngoka kee shi omwiitaali, okwa yapulwa omolwomumwatate. Oshoka andola hasho sha li ngawo, ando oyana yeni inaya yogoka, ihe ngashingeyi aayapuki. 15 Ihe ngele ngoka kee shi omwiitaali okwa tokola a thige po* mukwawo, ne mu ethe a ye; omumwatate nenge omumwameme ke na oku mu thiminika a kale naye, oshoka Kalunga okwa hala mu kale nombili. 16 Mukulukadhi ngoye, owu shi shi ngaa kutya oto vulu okukwathela omusamane gwoye a hupithwe? Nenge, musamane ngoye, owu shi shi ngaa kutya oto vulu okukwathela omukulukadhi gwoye a hupithwe?

17 Kakele kaashono, kehe gumwe na kale noshipewa, shoka Jehova e mu pa, nokweenda mondjila, ndjoka Kalunga e mu ithanena. Shika otandi shi lombwele omagongalo agehe. 18 Mbela opu na omulumentu a adhika a kenkwa nale sho a ningi omwiitaali? Ngele osho, ina lundulula ekenko lye. Mbela opu na omulumentu a adhika inaa kenkwa, manga inaa ninga omwiitaali? Ngele osho, na kale inaa kenkwa. 19 Ekenko inali simana, nokwaakenkwa inaku simana; ihe shoka sha simana okuvulika kiipango yaKalunga. 20 Kehe gumwe na kale ngaashi a adhika, sho a ithanwa. 21 Mbela owa adhika omupika, sho wa ithanwa? Ngele osho, ino ipula nasho. Ihe ngele owa mono ompito yokumanguluka mo, ino yi hunutha. 22 Oshoka kehe ngoka a adhika omupika, sho a ithanwa kOmuwa, okwa mangululwa, nokwa ninga gwOmuwa. Sha faathana, kehe ngoka a adhika a mangululwa, sho a ithanwa, oku li omupiya gwaKristus. 23 Omwa landwa ondilo; onkee ano ethii po okukala aapika yaantu. 24 Aamwatate, kutya nduno kehe gumwe okwa adhika a tya ngiini, sho a ithanwa, na tsikile okukala ngaaka koshipala shaKalunga.

25 Shi na ko nasha naamboka inaaya ya nando onale momilalo* inandi pewa oshipango shasha kOmuwa, ihe otandi popi omadhiladhilo gandje mwene, ongaangoka a silwa ohenda kOmuwa, ndi kale omudhiginini. 26 Onkee ano ondi wete shi li nawa komuntu a tsikile okukala ngaashi e li, oshoka otu li momathimbo omadhigu. 27 Mbela owu na omukulukadhi? Ngele osho, ino kambadhala oku mu etha po. Mbela ku na omukulukadhi? Ngele osho, ino konga omukulukadhi. 28 Ihe nokuli ngele owa yi mondjokana, ito yono. Niishewe, ngele gumwe ngoka inaa ya nando onale momilalo okwa yi mondjokana, ita yono. Ihe mboka taya yi mondjokana, otaya ka iyadha momaupyakadhi.* Onkee ano otandi kambadhala oku mú kwathela mu ga yande.

29 Shimwe ishewe, aamwatate, otandi mu lombwele kutya ethimbo, ndyoka lya hupa ko, efupi. Onkee ano okuza nena, mboka ye na aakulukadhi naya kale ya fa kaaye ya na, 30 naamboka taya lili naya kale ya fa itaaya lili, naamboka ya nyanyukwa, naya kale ya fa inaaya nyanyukwa naamboka taya landa naya kale ya fa kaaye na sha, 31 naamboka taya longitha uuyuni naya kale ya fa itaaye wu longitha pakuudha. Oshoka onkalo yuuyuni mbuka otayi ende tayi lunduluka. 32 Uushili owo kutya onda hala mu kale kaamu na nando iimpwiyu yasha. Omulumentu, ngoka inaa ya mondjokana, oha ipula niinima yOmuwa, nankene ta vulu okukala a hokiwa kOmuwa. 33 Ihe omulumentu, ngoka a hokana, oha ipula niinima yuuyuni, nankene ta vulu okwoopalela omukulukadhi gwe, 34 nomadhiladhilo ge oga topoka. Shimwe ishewe, omukiintu, ngoka inaa hokanwa nosho wo ngoka inaaya nando onale momilalo, oha ipula niinima yOmuwa, opo a kale a yogoka palutu nopambepo. Ihe omukiintu, ngoka a hokanwa oha ipula niinima yuuyuni, nankene ta vulu okwoopalela omusamane gwe. 35 Ihe otandi mú lombwele oshinima shika omolwuuwanawa weni, haku mú ngambeka,* ihe oku mú ladhipika mu longe shoka oshiwanawa, nokulongela Omuwa nopwaa na omapiyaganeko.

36 Ihe ngele opu na omuntu, ngoka inaa ya mondjokana, e wete kutya ita vulu okwiidhidhimika, nokwa pita mo mepipi lyuugundjuka, nena shika osho shi na okuningwa: Mu etheni a ninge shoka a hala; ita yono. Ya etheni ya ye mondjokana. 37 Ihe ngele opu na gumwe, ngoka a tokola momutima gwe noku wete inaashi pumbiwa, ihe ota vulu okupangela omahalo ge nokwa ninga etokolo momutima gwe kaa ye mondjokana, ota ningi nawa. 38 Sha faathana wo, ngoka ta yi mondjokana ota ningi nawa, ihe ngoka itaa yi mondjokana ota ningi nawa lela.

39 Omukulukadhi ina manguluka, manga omusamane gwe e li momwenyo. Ihe ngele omusamane gwe okwa si, okwa manguluka okuya mondjokana nakehe ngoka a hala, shampa owala tashi ningilwa mOmuwa. 40 Ihe ondi wete kutya ota kala a nyanyukwa unene, ngele okwa kala ngaashi e li; nondi shi shi nawa lela kutya nangame ondi na wo ombepo yaKalunga.