KAaefeso
1 Ngame Paulus, omuyapostoli gwaKristus Jesus pahalo lyaKalunga, otandi nyolele aayapuki yomuEfeso, mboka ye li aadhiginini, noye li muukumwe naKristus Jesus:
2 Uuwanawahenda nombili, ndjoka hayi zi kuKalunga, Tate yetu, nosho wo kOmuwa gwetu, Jesus Kristus, nayi kale pamwe nane.
3 Kalunga, He yOmuwa gwetu Jesus Kristus, na hambelelwe, oshoka okwe tu yambeka nomalalekonuuyamba agehe gopambepo sho e tu pa omahala megulu, muukumwe naKristus. 4 Okwe tu hogolola, tu kale muukumwe naye,* opo tu ulike ohole, tu kale aayapuki, nokaatu na oshipo koshipala she. 5 Oshoka okwa tokola komeho yethimbo, tu ninge oyana okupitila muJesus Kristus, e shi ningi nenyanyu nosho wo metsokumwe nehalo lye. 6 Shoka Kalunga okwe shi ningi, opo tu mu tange, sho e tu ulukile uuwanawahenda we uunene okupitila mOmwana omuholike. 7 Kalunga okwa gandja ekulilo okupitila mombinzi yOmwana omolwuuwanawahenda we uunene, opo tu vule okudhiminwa po omayono getu.
8 Omolwuuwanawahenda we, mboka uunene, Kalunga okwe tu pa uunongo awuhe nontseyo,* 9 opo e tu hololele oshiholekwa oshiyapuki kombinga yehalo lye. Oshiholekwa shoka oshi na ko nasha naashoka a li a lalakanena okuninga 10 omolwelongekidho,* ndyoka a li ta ka gwanitha po peuthwathimbo, a gongele iinima ayihe yomegulu nosho wo yokombanda yevi, okupitila muKristus. Eeno, iinima ayihe otayi ka gongelwa okupitila muye, 11 ngoka tu li muukumwe naye, notatu ka thigulula pamwe naye, shoka twa uvanekelwa nale kuKalunga, ngoka ha gwanitha po iinima ayihe, mbyoka a uvaneka metsokumwe nehalo lye, 12 opo a hambelelwe noku simanekwe okupitila mutse, mboka twa itaale tango muKristus. 13 Ihe nane wo omwa itaale muye, konima sho mwa uvu oshili yoohapu dhaKalunga, ano onkundana ombwanawa kombinga yehupitho lyeni. Konima sho mwa itaale, omwa tulwa oshihako shombepo ondjapuki okupitila muKristus, shoka mwa li mwa uvanekelwa, 14 shoka shi li endhindhiliko lyeshilipaleko kutya Kalunga ota ka gwanitha po ashihe shoka e tu uvanekela, nota ka mangulula oshigwana she okupitila mekuliloyambo, opo a simanekwe.
15 Onkee ano nangame wo sho nda uvu kutya omwa itaala mOmuwa Jesus, nomwa ulukila aayapuki ayehe ohole, 16 inandi etha po nando okupandula Kalunga omolweni. Ngame otandi tsikile oku mú kwatela momagalikano gandje, 17 opo Kalunga kOmuwa gwetu Jesus Kristus, He gweadhimo, a vule oku mú pa uunongo, noku mú hololela ontseyo yashili kombinga ye. 18 Kalunga okwa patulula omitima dheni, opo mu vule okutseya etegameno, ndyoka e mú pa nosho wo omayambeko kaaku na we, ngoka a uvanekela aayapuki. 19 Tu li ooitaali, okwe tu hololela oonkondo dhe oonenenene, okupitila miilonga ye, mbyoka a longa, 20 mbyoka a ulike, sho a yumudha Kristus kuusi e te mu kuutumbike kolulyo lwe megulu, 21 nokwe mu pe ondondo ya simana yi vule yaapangeli ayehe, yaamboka ye na oonkondopangelo, yaanankondo, yaawa noyaanamadhina ayehe, hamuuyuni owala mbuka,* ihe nomwaamboka wo tawu ke ya. 22 Kalunga okwa tula wo iinima ayihe kohi yoompadhi dhaKristus, nokwe mu ningi omutse gwiinima ayihe megongalo, 23 ndyoka li li olutu lwe, noli na omaukwatya ge agehe.