Yotango kAakorinto
12 Aamwatate, shi na ko nasha nomagano gopambepo, inandi hala mu kale kaamu ga shi. 2 Sho mwa li kaamu shi ooitaali,* omwa li mwa nwethwa mo nokupukithwa kiikalunga ihaayi popi, nokuya kehe mpoka tashi vulika tayi mú wilike mu ye. 3 Onda hala mu tseye kutya kapu na omuntu ta longithwa kombepo yaKalunga ta vulu okupopya ta ti: “Jesus okwa thingwa!” nokapu na omuntu ta vulu okutya: “Jesus oye Omuwa!” okuninga shila ta wilikwa kombepo ondjapuki.
4 Oku na omagano ga yoolokathana, ihe ombepo yimwe; 5 nopu na iilongayakulo yi ili noyi ili, ihe opu na owala Omuwa gumwe; 6 Kalunga oha kwathele aantu momikalo dha yoolokathana, ya longe iilonga ya yoolokathana, ihe Kalunga ngoka gumwe awike. 7 Shoka Kalunga e ya kwathela ya longe kekwatho lyombepo ondjapuki oshi iwetikile, notashi etele yalwe uuwanawa. 8 Oshoka gumwe okwa pewa uunongo wokupopya* okupitila mombepo ondjapuki, gumwe okupopya nontseyo kekwatho lyombepo oyo tuu ndjoka, 9 gumwe okukala e na eitaalo, gumwe okukala e na omagano gokwaaludha, 10 gumwe okulonga iilongankondo, gumwe okuhunganeka, gumwe okumona ngele etumwalaka lyontumba olya za kuKalunga, nenge hasho, gumwe okupopya omalaka gi ili nogi ili, nagulwe okufatulula omalaka. 11 Iilonga ayihe oya longwa mewiliko lyombepo ondjapuki, nakehe gumwe okwa pewa omagano ge pahalo lyaKalunga.
12 Oshoka ngaashi owala olutu lumwe lu na iilyo oyindji, iilyo ayihe yolutu ndwoka, nonando oyindji, oyi li olutu lumwe, naKristus osho e li ngawo. 13 Oshoka atuheni otwa ninginithilwa molutu lumwe, okupitila mombepo yimwe, kutya nduno Aajuda, nenge Aagreka, kutya nduno aapika, nenge aamangululwa, naatuheni otwa nwethwa ombepo yimwe.
14 Oshoka odhoshili kutya olutu inalu thikama po owala moshilyo shimwe, ihe omiilyo oyindji. 15 Ngele ompadhi otayi ti: “Molwaashoka ngame kandi shi oshikaha, kandi li oshitopolwa sholutu,” shoka itashi yi ningitha kaayi kale oshitopolwa sholutu. 16 Ngele okutsi otaku ti: “Molwaashoka ngame kandi shi eho, kandi shi oshitopolwa sholutu,” shoka itashi ku ningitha kaaku kale oshitopolwa sholutu. 17 Andola olutu aluhe olwa li eho, ando ohalu pulakenitha shike? Andola olutu aluhe olwa li okutsi, ando olutu ohalu nikitha shike? 18 Ihe Kalunga okwa unganeka iilyo ayihe yolutu, yi kale ngaashi a hala.
19 Andola iilyo ayihe oya li ya faathana, ando otapu kala ngaa olutu? 20 Ihe ngashingeyi, iilyo oyindji, ihe olutu lumwe aluke. 21 Eho itali vulu okutya koshikaha, “Inandi ku pumbwa,” nenge natango, omutse itagu vulu okutya koompadhi, “Inandi mú pumbwa.” 22 Mepingathano naashono, iilyo yolutu, mbyoka hayi monika ya fa kaayi na naanaa oshilonga, 23 niitopolwa yolutu, mbyono hatu dhiladhila kutya kayi na naanaa oshilonga, ohatu yi sile oshimpwiyu nawa, niitopolwa yolutu, mbyoka kaayi na okukala kombanda, ohatu yi siikile nawa, 24 omanga mbyoka ihaatu si ohoni, ihaatu yi siikile. Nonando ongawo, Kalunga okwa tula kumwe olutu momukalo, moka a simaneka unene iilyo yolutu, mbyoka twa tala ko inaayi simana, 25 opo molutu kaamu kale etopoko, ihe iilyo yalwo ayihe yi kale tayi silathana oshimpwiyu. 26 Ngele oshilyo shimwe sholutu otashi ehama, nena iilyo yilwe ayihe yolutu ohayi ehama pamwe nasho; nenge ngele oshilyo shimwe tashi tangwa, iilyo ayihe yilwe ohayi nyanyukwa pamwe nasho.
27 Nane olutu lwaKristus, nakehe gumwe gwomune pauhandimwe oshilyo. 28 Kalunga okwa langeka po yamwe megongalo ya kale ngeyi: tango, aayapostoli, taku landula aahunganeki, okuza mpono, aalongi; yamwe oya longe iilongankondo, yamwe oya kale ye na omagano gokwaaludha, yamwe oya kale haya kwathele yakwawo, yamwe oya kale ye na owino yokuwilika, nayamwe okupopya omalaka gi ili nogi ili. 29 Haayehe aayapostoli, hasho mbela? Haayehe aahunganeki, hasho mbela? Haayehe aalongi, hasho mbela? Haayehe haya longo iilongankondo, hasho mbela? 30 Haayehe ye na omagano gokwaaludha, hasho mbela? Haayehe haya popi momalaka, hasho mbela? Haayehe aafatululi,* hasho mbela? 31 Ihe tsikileni okulalakanena* omagano, ngoka ga dhenga mbanda. Opo nduno otandi ke mú ulukila oshinima sha dhenga mbanda shi vule iikwawo.