PaLukas

23 Onkee ano ongundu ayihe yaantu oya thikama, noya fala Jesus kuPilatus. 2 Opo nduno oya tameke oku mu tamaneka taya ti: “Omulumentu nguka otwe mu kwata ta pukitha oshigwana, ta indike aantu kaaya fute iifendela kOmukesari, ye ota iti kutya oye Kristus, Omukwaniilwa.” 3 Nena Pilatus okwe mu pula ta ti: “Ongoye Omukwaniilwa gwAajuda?” Jesus okwe mu yamukula a ti: “Eeno, ongaashi we shi popi.” 4 Opo nduno Pilatus okwa lombwele aayambi aakuluntu nongundu yaantu ta ti: “Omulumentu nguka inandi mu mona ondjo yasha.” 5 Ihe oya tsikile owala taya ti: “Ota piyaganeke aantu nelongo lye muJudea ashihe, nokwa tamekele nokuli okuza kuGalilea, sigo oohuka.” 6 Sho Pilatus e shi uvu, okwa pula ngele omulumentu ngoka Omugalilea. 7 Konima sho a uvu kutya Jesus okwa za koshitopolwa shi li kohi yepangelo lyaHerodes, okwe mu tumu kuHerodes, ngoka naye wo pethimbo ndyoka a li muJerusalem.

8 Sho Herodes a mono Jesus, okwa li a nyanyukwa unene, oshoka okwa kala ethimbo ele a hala oku mu mona, molwaashoka okwa uvu oshindji kombinga ye, nokwa kala a hala oku mu mona ta longo oshikumithalonga. 9 Onkee ano okwa tameke okupula Jesus omapulo ogendji, ihe ine mu yamukula sha. 10 Ihe aayambi aakuluntu naalongimpango oya kala taya thikama ye mu tamaneke noonkondo. 11 Opo nduno Herodes pamwe naakwiita ye oya ungaunga naye nonyanya, nokwe mu zaleke onguwo ombwanawa nelalakano lyoku mu sheka e te mu shunitha kuPilatus. 12 Okuza esiku ndyoka, Herodes naPilatus oya panga uukuume, nonando nale oya li ye tondathane.

13 Opo ihe Pilatus okwa gongaleke aayambi aakuluntu, aapangeli naantu yalwe, 14 nokwa ti kuyo: “Omwa eta omulumentu nguka kungame tamu ti ota nwetha mo aantu ya tukulile epangelo oshipotha. Ihe taleni, omulumentu nguka onde mu pulapula montaneho yeni, ihe inandi mu mona ondjo yasha kombinga yaashoka tamu mu tamanekele. 15 Nokuli naHerodes ine mu mona ondjo yasha, nomolwaashoka e mu galulile kutse. Ihe taleni, omulumentu nguka ina ninga nando osha sha gwana oku mu dhipagitha. 16 Onkee ano otandi mu geele e tandi mu mangulula.” 17 —— 18 Ihe ongundu ayihe yaantu oya igidha tayi ti: Omulumentu nguka na dhipagwe e to tu mangululile Barabbas!” 19 (Barabbas okwa li a tulwa mondholongo, oshoka okwa li a hwahwameke aantu ya tse ondumbo nepangelo moshilando, nomolwedhipago.) 20 Natango Pilatus okwa pula ongundu yaantu, molwaashoka okwa li a hala okumangulula Jesus. 21 Opo ihe oya tameke okwiigidha taya ti: “Na ka alelwe komuti! Na ka alelwe komuti!”* 22 Okwe ya pula ishewe oshikando oshititatu ta ti: “Omolwashike? Omulumentu nguka okwa ningi shike sha puka? Inandi mu mona ondjo yasha ya gwana oku mu dhipagitha. Onkee ano otandi mu geele e tandi mu mangulula.” 23 Okuza mpono, oya tameke okwiigidha mokule kutya na ka dhipagwe,* na Pilatus okwa sholola. 24 Onkee ano Pilatus okwa ningi etokolo, opo shoka taya pula shi ningwe. 25 Okwa mangulula omulumentu ngoka aantu ya li taya pula, ngoka a li a tulwa mondholongo omolwokutsa ondumbo nepangelo nomolwedhipago, nokwa gandja Jesus a ka dhipagwe,* ngaashi taya pula.

26 Sho ya li taye mu fala a ka dhipagwe, oya kwata po omulumentu gumwe gwedhina Simon, Omukireni, ngoka a li ta zi komukunda, noye mu pe omuti gwomahepeko* a humbate ko, ta ende e li konima yaJesus. 27 Opwa li wo ongundu onene yaantu ya landula Jesus, mwa kwatelwa aakiintu mboka ya li ya nika oluhodhi* notaya lili omolwe. 28 Jesus okwa punguluka, nokwa ti kaakiintu mboka: “Aakadhona ne yomuJerusalem, inamu lila omolwandje, ihe lileni omolweni nomolwoyana yeni. 29 Oshoka taleni, ethimbo otali ya uuna aantu taya ka tya, ‘Aakiintu, mboka ihaaya vala, naakiintu, mboka inaaya vala, nosho wo mboka omagundji gawo inaaga yamutha oya nyanyukwa!’ 30 Opo nduno otaya ka lombwela oondundu taya ti: ‘Gwileni kutse!’ nosho wo kiikulundundu, ‘Tu siikileni!’ 31 Ngele iinima, mbyoka otaye yi ningi, manga omuti omutalala, oshike tashi ka ningwa po, uuna gwa kukuta?”

32 Opwa li wo aalumentu yalwe yaali, mboka nayo ya li taya falwa ya ka alelwe pamwe naye. 33 Opo nduno sho ye ya pehala hali ithanwa Ehala lyOmakolotse, oye mu alele komuti pamwe naakolokoshi mboka, gumwe okolulyo lwe, namukwawo okolumoho lwe. 34 Ihe Jesus okwa ti: “Tate, ya dhimina po, oshoka kaye shi shoka taya ningi.” Shimwe ishewe, oya itopolele oonguwo dhe pamukalo gwokuumba oshihogololitho. 35 Opo nduno aantu oya kala ya thikama ye mu tala. Ihe aapangeli oya li taye mu sheke taya ti: “Oku shi okuhupitha yalwe; na ihupithe nduno ye mwene, ngele oye Omugwayekwa gwaKalunga, Omuhogololwa.” 36 Nokuli naakwiita oya li taye mu sheke, noye ya e taye mu pe omaviinu omalulu 37 taya ti: “Ngele ongoye Omukwaniilwa gwAajuda, ihupitha nduno mwene.” 38 Pombanda yomutse gwe, oya mbambangele po wo okapilangi ke na oohapu tadhi ti: “Nguka oye Omukwaniilwa gwAajuda.”

39 Opo ihe gumwe gwomaakolokoshi, mboka ya li ya alelwa pamwe naye, okwa tameke oku mu sheka, ta ti: “Ongoye Kristus ndishi? Ihupitha nduno e to tu hupitha wo!” 40 Nena omukolokoshi omukwawo okwe mu ganda ta ti: “Ano iho tila Kalunga? Natse otwa pewa egeelo lya fa lye. 41 Tse otwa ilongela okugeelwa omolwiinima, mbyoka twa ninga, ihe omulumentu nguka ina ninga sha sha puka.” 42 Opo nduno omulumentu ngoka okwa ti: “Jesus, dhimbulukwa ndje, uuna wa yi mUukwaniilwa woye.” 43 Opo ihe Jesus okwa ti kuye: “Otandi ku lombwele oshili nena kutya oto ka kala pamwe nangame mOparadisa.”

44 Pethimbo ndyoka, osha li lwopotundi ontihamano,* noshilongo ashihe osha ningi omilema, sigo opotundi ontimugoyi,* 45 oshoka etango kalya li we tali gandja uuyelele. Opo ihe etopolitholapi lyotempeli olya tuuka pokati. 46 Opo nduno Jesus okwa igidha mokule ta ti: “Tate, omwenyo gwandje otandi gu gandja miikaha yoye.” Konima sho a popi ngawo, okwa si.* 47 Sho omukuluntu gwetangakwiita a mono shoka sha ningwa po, okwa tameke okuhambelela Kalunga, ta ti: “Odhoshili kutya omulumentu nguka okwa li omuyuuki.” 48 Opo nduno sho ongundu ayihe yaantu, ndjoka ya li ya gongala mpoka, ya mono iinima ayihe, mbyoka ya ningwa po, oya shuna kegumbo ya nika oluhodhi,* 49 naantu ayehe, mboka ya li ye mu shi, oya li ya thikama kokule. Shimwe ishewe, aakiintu, mboka ya li ya ende pamwe naye okuza kuGalilea, opo ya li, noya mono iinima mbyoka.

50 Ihe tala, opwa li pu na omulumentu gumwe gwedhina Josef, oshilyo shOmpangu yoPombanda yAajuda, ngoka a li e na omwenyo omwaanawa nomuyuuki. 51 (Omulumentu ngoka ka li a hogolola, a yambidhidhe oompangela noonkatu dhawo.) Okwa li gwokuArimatia, oshilando shAajudea, nokwa li a tegelela Uukwaniilwa waKalunga. 52 Omulumentu ngoka okwa yi kuPilatus, nokwa pula a pewe omudhimba gwaJesus. 53 Opo nduno okwe gu kutha ko komuti, te gu dhingile moshiyata sholiina, nokwe gu langeke mombila* ya hokwa memanya, moka inaamu langekwa nando onale omudhimba. 54 Esiku ndyoka olya li esiku lyElongekidho, nEsabati olya li li li pokutameka. 55 Ihe aakiintu, mboka ya li ya za naJesus kuGalilea, nayo oya landula mo ya uka kombila,* ya ka tale nkene omudhimba gwe tagu langekwa mo, 56 noya shuna ya ka longekidhe iigwanga nomagadhi ga nika nawa. Ihe mesiku lyEsabati oya vululukwa po, ngaashi Ompango tayi ti.