PaJohannes

3 Opwa li pu na omulumentu Omufarisayi gwedhina Nikodemus, gumwe gwomaapangeli yAajuda. 2 Omulumentu ngoka okwe ya kuJesus uusiku, nokwa ti kuye: “Muhongi,* otu shi shi kutya ngoye omuhongi a za kuKalunga, oshoka kapu na ngoka ta vulu okulonga iikumithalonga mbyoka ho longo, okuninga a pewa oonkondo kuKalunga.” 3 Jesus okwa ti kuye: “Oshili tandi ku lombwele, kapu na omuntu ta vulu okumona Uukwaniilwa waKalunga, ngele ina valululwa.”* 4 Nikodemus okwa ti kuye: “Ngele omuntu okwa koka nale, ongiini ta vulu okuvalululwa? Mbela ota vulu ngaa okushuna moshivalelo shayina e ta valwa ishewe?” 5 Jesus okwe mu yamukula ta ti: “Oshili tandi ku lombwele, kapu na ngoka ta vulu okuya mUukwaniilwa waKalunga, ngele ina ninginithwa momeya e ta pewa ombepo ondjapuki.”* 6 Shoka sha valwa panyama, osho onyama, naashoka sha valwa pambepo, osho ombepo. 7 Ino kala wa kumwa sho nde ku lombwele kutya: Omu na okuvalululwa. 8 Ombepo ohayi pepe kehe mpoka ya hala, noho kala wu yi uvite, ihe ku shi hoka hayi zi nosho wo hoka ya uka. Shoka osho wo shi li ngaaka nakehe ngoka a valwa kombepo.”

9 Nikodemus okwa ti kuye: “Ongiini shoka tashi vulu okuningwa?” 10 Jesus okwa yamukula ta ti: “Ngoye omuhongi gwomuIsraeli, ihe omolwashike iinima mbika kuu yi shi?” 11 Oshili tandi ku lombwele, ohatu popi shoka tu shi, nohatu tseyitha shoka twa mona, ihe inamu taamba ko shoka twe mu tseyithile. 12 Ngele onde mu lombwela iinima yokombanda yevi, ihe inamu yi itaala, ongiini tamu ka itaala ngele onde mu lombwele mbyoka yomegulu? 13 Shimwe ishewe, kapu na ngoka a yile megulu, kakele kOmuna gwomuntu ngoka a zi megulu. 14 Ngaashi owala Moses a li a endjeleleka eyoka mombuga, Omuna gwomuntu naye ota ka endjelelekwa, 15 opo kehe ngoka te mu itaale, a ka mone omwenyo gwaaluhe.

16 “Molwaashoka Kalunga okwa kala e hole uuyuni noonkondo, okwa gandja Omwana epona,* opo kehe ngoka ta ulike kutya oku na eitaalo muye kaa hanagulwe po, ihe a ka mone omwenyo gwaaluhe. 17 Kalunga ina tuma Omwana muuyuni, e wu pangule, ihe oku hupithe uuyuni okupitila muye. 18 Kehe ngoka ta ulike kutya oku na eitaalo muye ita pangulwa. Ihe ngoka itaa ulike kutya oku na eitaalo muye okwa pangulwa nale, molwaashoka ina ulika kutya oku na eitaalo medhina lyOmuna gwaKalunga epona. 19 Uuyelele owe ya muuyuni, ihe aantu oya kala ye hole omilema pehala lyuuyelele, oshoka iilonga yawo iiwinayi, nomolwaashoka taya ka pangulwa. 20 Kehe ngoka ha longo uuwinayi oku tonde uuyelele, noihe ya muuyelele, opo iilonga ye yi monike.* 21 Ihe kehe ngoka ha longo shoka sha uka ote ya muuyelele, opo iilonga ye yi monike kutya oyi li metsokumwe nehalo lyaKalunga.”

22 Konima yaashono, Jesus naalongwa ye oya yi komikunda dhaJudea, hoka a kala pamwe nayo uule wethimbo, noya li taya ninginitha aantu. 23 Ihe Johannes naye okwa li ta ninginitha aantu muAinon, popepi naSalim, molwaashoka omwa li omeya ogendji, naantu oya kala taye ya kuye, e ya ninginithe. 24 Pethimbo mpoka, Johannes ka li natango a tulwa mondholongo.

25 Aalongwa yaJohannes oya li taya ludhikathana nOmujuda gumwe kombinga yankene omuntu e na okukala a yogoka koshipala shaKalunga. 26 Onkee ano oye ya kuJohannes e taya ti kuye: “Muhongi,* tala, omulumentu, ngwiyaka wa li naye handiyaka yaJordan, ngoka wa li to popi kombinga ye, tala, ota ninginitha, naantu ayehe otaya yi kuye.” 27 Johannes okwe ya yamukula ta ti: “Omuntu ita vulu okukala nasha, okuninga e shi pewa kuKalunga.* 28 Ne yene omwa uvile ndje sho nda tile: ‘Hangame Kristus, ihe onda tumwa ndi mu tetekele.’ 29 Kehe ngoka e na omufuko oye ombushiki.* Ihe kuume kombushiki, uuna a thikama e ta uvu ewi lyombushiki oha kala a nyanyukwa noonkondo. Onkee ano nangame onda nyanyukwa lela. 30 Iilonga ye otayi ende tayi indjipala, ihe yandje otayi ende tayi shonopala.”

31 Ngoka a za pombanda oku vule ayehe yalwe. Ngoka a za kevi ogwokevi, noha popi iinima yokevi. Ihe ngoka a za megulu, oku vule ayehe yalwe. 32 Oha tseyitha shoka a mono nokwa uvu, ihe kapu na nando ogumwe ha itaale oohapu dhe. 33 Kehe ngoka a itaala oohapu dhe okwa zimina* kutya Kalunga omunashili. 34 Ngoka a tumwa kuKalunga oha popi oohapu dhaKalunga, oshoka Kalunga iha ngungunine* ombepo ye. 35 He oku hole Omwana, nokwa gandja iinima ayihe miikaha ye. 36 Kehe ngoka ta ulike kutya oku na eitaalo mOmwana ota kala nomwenyo sigo aluhe, ihe ngoka itaa vulika kOmwana, ita ka mona omwenyo, ihe ondjahi yaKalunga otayi kala kombanda ye.