Ontumwafo ya nyolelwa Aakolossa
3 Ihe ngele ne omwa yumudhwa pamwe naKristus, tsikileni okulalakanena iinima yomegulu,* moka Kristus a kuutumba kolulyo lwaKalunga. 2 Kaleni hamu dhiladhila kombinga yiinima yomegulu,* ihe haambyoka yokombanda yevi. 3 Oshoka ne omwa sa, noomwenyo dheni odha holekwa pamwe naKristus, ngoka e li muukumwe naKalunga. 4 Ngele Kristus, ngoka e li omwenyo gwetu, okwa holola oonkondo dhe,* nane otamu ka tumbalekwa pamwe naye.
5 Onkee ano dhipageni omahalo omawinayi,* ngoka ge li mune, ngaashi omilalo dha nyata,* okwaanuuyogoki,* omahalo gopamilalo ga pitilila, okahalu nosho wo olwiho, ndoka lwa faathana nokulongela iikalunga. 6 Kalunga ota ka geela aantu, mboka haya ningi iinima ya tya ngaaka. 7 Nane nale, osho mwa li hamu ihumbata* ngawo. 8 Ihe ngashingeyi omu na okweetha po iinima ayihe mbika: ondjahi, ongeyo, uuwinayi, omalaka omawinayi, noohapu dha nyata inadhi uvika mo momakana geni. 9 Inamu lombwelathana iifundja. Ihuleni omuntu gweni omukulu pamwe niilonga ye 10 e tamu zala omuntu omupe, ngoka okupitila montseyo yashili ta ningwa omupe, noku li oshifetha shaKalunga, Omushiti gwe, 11 kashi na nduno mbudhi kutya Omugreka, nenge Omujuda, a kenkwa, nenge inaa kenkwa, omukwiilongo, omudhinwa,* omupika, nenge omumangululwa;* oshoka iinima ayihe oyi li muKristus, ngoka e li mwaayihe.
12 Onkee ano mu li aahogololwa yaKalunga, aayapuki nomu holike, kaleni mu na* olukeno, ohenda, eifupipiko, omwenyo omwaanawa nontalanteni. 13 Tsikileni okwiidhidhimikilathana nokudhiminathana po nehalo ewanawa, nuuna nokuli pu na ngoka a ningathana namukwawo. Ngaashi owala Jehova he mú dhimine po nehalo ewanawa, nane ningeni wo sha faathana. 14 Ihe kakele kiinima ayihe mbika, zaleni ohole, oshoka oyi li epaya, ndyoka hali mangele kumwe aantu thiluthilu.*
15 Shimwe ishewe, etheni ombili yaKristus yi pangele momitima dheni,* oshoka Kalunga okwe mú ithana mu ninge olutu lumwe, nomu kale mu na ombili. Kaleni wo hamu pandula. 16 Etheni oohapu dhaKristus dhi kale dha udhilila momitima dheni, dhi mú pe uunongo awuhe. Tsikileni okulongathana nokutsaathana omukumo* nomapisalomi, okutanga Kalunga, okwiimba nolupandu omaimbilo gopambepo nosho wo okwiimbila Jehova momitima dheni. 17 Kehe shoka tamu popi, nenge tamu ningi, shi ningeni medhina lyOmuwa Jesus, tamu pandula Kalunga, He, okupitila muye.
18 Ne aakulukadhi, vulikeni kaasamane yeni, ngaashi omulanduli gwOmuwa a tegelelika a ninge. 19 Ne aasamane, kaleni mu hole aakulukadhi yeni, noinamu ungaunga nayo mwa geya unene.* 20 Ne aanona, vulikeni kaavali yeni miinima ayihe, oshoka shika ohashi nyanyudha lela Omuwa. 21 Ne ootate, inamu geyitha* oyana yeni, opo kaaya teke omukumo.* 22 Ne aapika, vulikeni miinima ayihe kooyene yeni yopantu,* hauna owala ye mú wete, opo mu pandike kaantu,* ihe shi ningeni nomutima aguhe, nokutila Jehova. 23 Kehe shoka tamu longo shi longeni nomwenyo* aguhe onga tamu shi longele Jehova, ihe haantu, 24 oshoka omu shi shi kutya Jehova oye te ke mú pa ondjambi, ndjoka tamu ka thigulula. Longeleni Omuwa, Kristus. 25 Odhoshili kutya ngoka ta longo shoka sha puka ota ka geelwa omolwiilonga ye, oshoka Kalunga ke na okatongo.