PaJohannes
15 “Ongame omuviinu gwashili, na Tate oye he gu sile oshimpwiyu. 2 Iitayi ayihe, mbyoka ihaayi imi, ote yi tete ko kungame, ihe mbyoka hayi imi, ote yi kokola,* opo yi ime iiyimati oyindji. 3 Ne omwa yela nale, omolwoohapu ndhoka nde mu lombwela. 4 Kaleni mwa hangana nangame, opo nangame ndi kale nda hangana nane. Ngaashi owala oshitayi itaashi vulu okwiima iiyimati, okuninga shi li komuti, nane itamu vulu okwiimika iiyimati, ngele itamu kala mwa hangana nangame. 5 Ongame omuviinu; ne iitayi. Kehe ngoka ta kala a hangana nangame, otandi kala nda hangana naye, nota ka imika iiyimati oyindji; oshoka ngele inamu hangana* nangame itamu vulu okuninga sha nandonando. 6 Kehe ngoka itaa kala a hangana nangame, ota ka kala ngaashi oshitayi sha ekelwahi e tashi kukuta. Aantu otaya ka gongela iitayi mbyoka, noku yi umbila momulilo e tayi pi po. 7 Ngele omwa kala mwa hangana nangame, nokupungula oohapu dhandje momitima dheni, nena, otamu vulu okwiindila shaa shoka mwa hala, notamu shi pewa. 8 Tate ota ka simanekithwa, ngele omwa kala hamu imike iiyimati oyindji, nokuulika kutya ne aalongwa yandje. 9 Ngaashi owala Tate a kala e hole ndje, nangame onda kala ndi mu hole. Onkee ano kaleni mohole yandje. 10 Ngele ohamu dhiginine iipango yandje, otandi kala ndi mu hole, ngaashi owala ngame handi dhiginine iipango yaTate, noku hole ndje.
11 Oohapu ndhika onde dhi mu lombwele, opo mu kale mwa nyanyukwa ngaashi ngame, nenyanyu lyeni li kale enene. 12 Oshipango shandje osho shika, ano mu kale mu holathane, ngaashi ngame nda kala ndi mu hole. 13 Kapu na ngoka e na ohole onene, yi vule yaangoka ta gandjele ookuume ke omwenyo gwe. 14 One ookuume kandje, ngele ohamu ningi shoka tandi mu lombwele. 15 Itandi mu ithana we aapiya, molwaashoka omupiya iha kala e shi shoka mwene gwe ta ningi. Ihe otandi mu ithana ookuume, molwaashoka onde mu tseyithila iinima ayihe, mbyoka nda uva kuTate. 16 Hane mwa hogolola ndje, ihe ongame nde mu hogolola, nonde mu langeka po, opo mu tsikile okwiimika iiyimati, mbyoka tayi kalelele. Nena shaa shoka tamu indile Tate medhina lyandje, ote shi mu pe.
17 Oohapu ndhika onde dhi mu lombwele, mu kale mu holathane. 18 Ngele uuyuni owu mu tonde, kaleni mu shi kutya ongame wa tonda tango, manga inaawu mu tonda. 19 Andola omwa li oshitopolwa shuuyuni, ando uuyuni owu mu hole, ihe molwaashoka kamu shi oshitopolwa shuuyuni, nonde mu hogolola mo muwo, uuyuni owu mu tonde. 20 Dhimbulukweni oohapu ndhoka nde mu lombwela: Omupiya ke vule mwene gwe. Ngele oya hepeka ndje, nane otaye ke mu hepeka wo. Ngele oya dhiginina oohapu dhandje, otaya ka dhiginina wo oohapu dheni. 21 Ihe iinima ayihe mbika otaye ke yi mu ningila omolwedhina lyandje, molwaashoka kaye shi ngoka a tuma ndje. 22 Andola onda li inaandi ya okupopya nayo, ando kaye na ondjo yasha. Ihe ngashingeyi kaye na eipopilo lyasha omolwoondjo dhawo. 23 Kehe ngoka e tonde ndje, oku tonde wo Tate. 24 Andola onda li inaandi longa iilonga mbyoka nda longo mokati kawo, mbyoka inaayi longwa nando onale komuntu, ando kaye na ondjo yasha. Ihe ngashingeyi oya mona ndje, noye tonde ndje nosho wo Tate. 25 Ihe shika osha ningwa, opo oohapu ndhoka dha nyolwa mompango yawo dhi gwanithwe, ndhoka tadhi ti: ‘Oye tonde ndje, kaapu na etompelo lyasha.’ 26 Uuna omukwathi e ya, ngoka tandi ka tuma okuza kuTate, ano ombepo ondjapuki, ndjoka tayi holola oshili, otayi ka hokolola kombinga yandje. 27 Nane otamu ka hokolola kombinga yandje, molwaashoka omwa kala pamwe nangame okuza petameko.