Ontiyali kAakorinto
8 Aamwatate, otwa hala mu tseye kombinga yuuwanawahenda waKalunga, mboka a ulukila omagongalo gomuMakedonia. 2 Sho ya li ya taalela omamakelo nomathiminiko omadhigu, oya li ya nyanyukwa noonkondo, noya li haya gandja, nonando oya li moluhepo olunene. 3 Otandi shi koleke kutya oya li ya gandja sha ikolelela kokuvula kwawo, nenge nokuli shi vulithe po. 4 Oya kala taya indile ya kuthe ombinga nehalo ewanawa mokugandja nomutima aguhe kaayapuki, noku ya yakula. 5 Inaya ninga owala shoka twa li twa tegelela ya ninge, ihe tango, oya igandja kOmuwa nokutse pahalo lyaKalunga. 6 Onkee ano otwa ladhipike Titus kutya ngaashi owala a li a tameke iilonga mbika mokati keni, oku na wo okumanitha iilonga mbika yokugongela iikwatha, mbyoka mwa gandja nehalo ewanawa. 7 Kakele kaashono, ngaashi owala tamu shi enditha nawa miinima ayihe, ano meitaalo, mokupopya, montseyo, mokulonga nuudhiginini, mokukala mu hole yalwe ngaashi tse tu mú hole, tsikileni wo okugandja nehalo ewanawa.
8 Otandi popi ngeyi, ihe itandi mú lombwele andola osho mu ninge, ihe oku mú kwathela owala, mu kale mu shi nkene yalwe haya longo nuudhiginini nokutala ngele ohole yeni oyashili ngaa. 9 Oshoka omu shi uuwanawahenda wOmuwa gwetu Jesus Kristus, ano kutya nonando okwa li omuyamba, okwa ningi ohepele omolweni, opo mu vule okuninga aayamba okupitila moluhepo lwe.
10 Edhiladhilo lyandje olyo ndika: Shika otashi mú etele uuwanawa, oshoka omumvo gwa zi ko, kamwa li owala mwa tameke oku shi ninga, ihe omwa ulike wo kutya omwa hala oku shi ninga. 11 Onkee ano kaleni mwa halelela okumanitha iilonga yokugongela iikwatha, ngaashi owala mwa li mwe yi tameke. 12 Kalunga oha taamba ko omagano, ngoka haga gandjwa nomutima aguhe, oshoka okwa tegelela omuntu kehe a gandje shoka e na, ihe haashoka kee na. 13 Oshoka inandi hala oku shi ningitha oshipu kuyalwe, ihe kune oshidhigu; 14 ihe onda hala mu kale mu na shi thike pamwe, opo ne mboka mu na oshindji mu kwathele mbono ye li moluhepo, opo nayo sho taya ka kala ye na oshindji, ye mú kwathele wo, opo mu vule okukala mu na shi thike pamwe. 15 Ngaashi owala kwa nyolwa taku ti: “Ngoka e na oshindji ina kala e na oshindji unene, naangoka e na oshishona ina kala e na oshishona unene.”
16 Kalunga na pandulwe, sho Titus e na ko nasha nane ngaashi tse, 17 molwaashoka sho twe mu ladhipike e ye kune, ina kakadhala, ihe okwe shi ningi nehalo ewanawa. 18 Otatu mu tumu pamwe nomumwatate gumwe, ngoka a tseyika nawa momagongalo agehe omolwokuuvitha onkundana ombwanawa. 19 Kakele kaashono, okwa langekwa po wo komagongalo, a kale ta ende pamwe natse, sho tatu fala iikwatha, mbyoka tayi simanekitha Omuwa, notayi ulike kutya otwa ilongekidha okukwathela ooyakwetu. 20 Kungawo, kapu na ngoka te ke tu popila muuwinayi, sho tatu topolele aamwatate iikwatha, mbyoka ya gandjwa nehalo ewanawa. 21 Oshoka ohatu ‘ningi iinima ayihe paushili, hamontaneho owala yaJehova, ihe nomontaneho wo yaantu.’
22 Kakele kaashono, otatu ya tumu pamwe nomumwatate, ngoka twa longitha lwiikando, notwa mona kutya omudhiginini miinima oyindji, unene tuu sho ngashingeyi e mú inekela thiluthilu, noku na ehalo lyoku mú kwathela. 23 Ihe ngele opu na epulo kombinga yaTitus, oku li omweendi nomulongi pamwe nangame omolwuuwanawa weni; nenge ngele opu na omapulo kombinga yaamwatate, oye li aayapostoli momagongalo, nohaya simanekitha Kristus. 24 Onkee ano ya ulukileni kutya omu ya hole, nokuulukila omagongalo kutya omolwashike hatu mú itangele.