PaMateus

21 Sho ye ya popepi naJerusalem, noya thiki muBetfage, pOndundu yOoholivi, Jesus okwa tumu aalongwa ye yaali 2 e ta ti kuyo: “Indeni komukunda, ngoka gu li komeho geni, notamu adha ko okasino ka mangwa nokasinogona kako. Wu mangululeni e tamu wu eta kungame. 3 Ngele opu na ngoka te mu pula, tyeni, ‘Omuwa okwe wu pumbwa.’ Opo nduno ote wu mu pe nziya.”

4 Shika osha gwanitha shoka sha popilwe okupitila momuhunganeki, ngoka a tile: 5 “Lombwela omwanakadhona gwaSion, to ti: ‘Tala! Omukwaniilwa gwoye ote ya, e na omwenyo omwaanawa nokwa kayila okasino, eeno, a kayila okasinogona.’”

6 Aalongwa oya yi e taya ningi naanaa ngaashi Jesus e ya lombwele. 7 Oya e ta okasino nokasinogona kako, noya yala ko oonguwo dhawo dhokombanda e ta kuutumba kudho. 8 Aantu oyendji oya yala oonguwo dhawo dhokombanda mondjila, omanga yalwe ya li taya tete iitayi komiti e taye yi yala mondjila. 9 Shimwe ishewe, ongundu yaantu, ndjoka ya li ye mu tetekela komeho, naamboka ya li taye mu landula, oya kala taya igidha taya ti: “Otatu galikana, Omuna gwaDavid a hupithwe! Na lalekwe nuuyamba, ngoka te ya medhina lyaJehova! Ngoye ngoka wu li pombandambanda, otatu ku indile wu mu hupithe!”

10 Sho Jesus a thiki muJerusalem, moshilando ashihe omwa li mu na epiyagano, naantu oya li taya pula taya ti: “Olye nguka?” 11 Aantu oya kala taya ti: “Nguka oJesus, omuhunganeki gwokuNasaret shaGalilea.”

12 Jesus okwa yi motempeli e ta tidha mo ayehe mboka ya li taya landitha notaya landa, nokwa undula po iitaafula yaapingakanithi yiimaliwa niipundi yaamboka ya li taya landitha oonguti. 13 Okwa ti kuyo: “Okwa nyolwa, ‘Egumbo lyandje otali ka ithanwa egumbo lyokugalikanena,’ ihe ne omwe li ninga ekololo lyaayugi.” 14 Shimwe ishewe, aaposi niilema oye ya kuye motempeli, nokwe ya aludha.

15 Sho aayambi aakuluntu naalongimpango ya mono iikumithalonga mbyoka a longo, nuumatyona tawu igidha motempeli tawu ti: “Otatu galikana, Omuna gwaDavid a hupithwe!” oya geye noonkondo. 16 Oya ti kuye: “Owu uvite ko ngaa shoka aanona mbaka taya ti?” Jesus okwa ti kuyo: “Eeno, inamu lesha nani oohapu ndhoka tadhi ti kutya, ‘Aanona nuuhanona otawu ku hambelele’?” 17 Sho a zi po puyo, okwa zi mo moshilando e ta yi kuBetania, hoka a ka lala uusiku mboka.

18 Omanga Jesus a li ta shuna koshilando ongula onene, okwa li e uvite ondjala. 19 Sho a mono omukwiyu gu li popepi nondjila, okwa yi kugwo, ihe ina adha ko sha, kakele owala komafo, nokwa ti kugwo: “Ku na we siku wu ime iiyimati.” Nziya, omukwiyu ogwa si. 20 Sho aalongwa ye shi mono, oya li ya kumwa, noya ti: “Omukwiyu ogwa si ngiini nziya ngawo?” 21 Jesus okwe ya yamukula a ti: “Oshili tandi mu lombwele, ngele omu na eitaalo, nokamu na omalimbililo, itamu ka ninga owala ngaashi nda ningile omukwiyu, ihe nokuli ngele omwa lombwele ondundu ndjika, ‘Itumba po e to iyumbile mefuta,’ otayi shi ningi, 22 niinima ayihe mbyoka tamu pula megalikano, mu na eitaalo, otamu yi pewa.”

23 Konima sho a yi motempeli, aayambi aakuluntu naakuluntu yoshigwana, oye ya kuye, manga a li ta longo aantu, noya ti kuye: “Okoonkondo dhalye ho longo iinima mbika? Nolye e ku pe uuthemba mboka?” 24 Jesus okwe ya yamukula a ti: “Nangame onda hala wo oku mu pula. Ngele omwa lombwele ndje, opo owala nangame tandi ke mu lombwela kutya okoonkondo dhalye handi longo iinima mbika. 25 Eninginitho ndyoka lya ningwa kuJohannes olya zi peni? OkuKalunga,* nenge okaantu?” Ihe oya tameke okutompathana taya ti: “Ngele otwa ti, ‘OkuKalunga,’ nena ota ti ‘omolwashike nduno inaamu mu itaala?’ 26 Ihe ngele otwa ti, ‘Okaantu,’ nena ongundu ndjika yaantu otayi tu pilukile po, oshoka oya tala ko Johannes e li omuhunganeki.” 27 Onkee ano oya yamukula Jesus ya ti: “Katu shi wo.” Opo ihe Jesus okwa ti kuyo: “Nangame itandi mu lombwele kutya okoonkondo dhalye handi longo iinima mbika.

28 “Ne otamu ti ngiini? Omulumentu gumwe okwa li e na oyanamati yaali. Okwa yi kungoka gwotango e ta ti: ‘Mumati gwandje, inda wu ka longe nena moshikunino shomandjembele.’ 29 Okwe mu yamukula ta ti: ‘Itandi yi ko,’ ihe konima sho a iyele ombedhi, okwa yi ko. 30 Okwa yi komwanamati omukwawo e te mu lombwele sha faathana. Omwanamati ngoka okwa yamukula a ti: ‘Otandi yi, tate,’ ihe ina ya ko. 31 Olye gwomuyo a vulika kuhe?” Oya ti: “Ogwotango.” Jesus okwa ti kuyo: “Oshili tandi mu lombwele, aafendelithi noombwanda otaye mu tetekele okuya mUukwaniilwa waKalunga. 32 Oshoka Johannes okwa li e ya kune e mu ulukile ondjila yuuyuuki, ihe inamu mu itaala. Ihe aafendelithi noombwanda oye mu itaale, naasho nokuli mwe shi mono, inamu iyela ombedhi, opo mu mu itaale.

33 “Ethaneko limwe olyo ndika: Okwa li ku na omulumentu gumwe, e na oshikunino, moka a tsike omandjembele. Oshikunino shoka okwe shi ningile enkolo e ta fulile mo oshilambo shokukolela mo omaviinu, nokwa tungu oshungo. Opo nduno okwa kongele mo aaniilonga* e ta yi kondje yoshilongo. 34 Ihe sho omandjembele ga tiligana, okwa tumu ko aapiya ye kaaniilonga yomoshikunino she, ya ka tale ko iiyimati ye. 35 Ihe aaniilonga yomoshikunino she, oya kwata aapiya ye, gumwe oye mu dhenge, gulwe e taye mu dhipaga, nomukwawo oye mu dhenge nomamanya, sigo a si. 36 Natango okwa tumu ko ishewe aapiya ye yalwe, ye vulithe po pwaambeyaka yotango, ihe nayo oye ya ningile sha faathana. 37 Hugunina, kuyo okwa tumu ko omwanamati, ta ti: ‘Otaya ka pulakena komumwandje.’ 38 Sho aaniilonga yomoshikunino ya mono omwanamati, oya lombwelathana taya ti: ‘Nguka oye omuthigululi. Natu mu dhipageni, opo uuthiga we wu ninge wetu!’ 39 Onkee oye mu kwata e taye mu umbu mo moshikunino, noye mu dhipaga. 40 Onkee ano uuna mwene gwoshikunino shomandjembele a galuka, oshike ta ka ningila aaniilonga mboka?” 41 Oya ti kuye: “Molwaashoka yo aakolokoshi, ote ke ya hanagula po, noshikunino shoka ote ke shi kongela aaniilonga* yalwe, mboka taye ke mu pa iiyimati, uuna omandjembele ga tiligana.”

42 Jesus okwa ti kuyo: “Nani inamu lesha mOmanyolo kutya: ‘Emanya ndyoka aatungi ya tindi, olyo lya ningi emanya lyomohuke lya simanenena kwaagehe?* Emanya ndyoka olya za kuJehova, nekumithi okutala.’ 43 Omolwoshinima shoka, otandi mu lombwele kutya Uukwaniilwa waKalunga otamu wu kuthwa e tawu pewa oshigwana shoka tashi imike iiyimati. 44 Shimwe ishewe, kehe ngoka ta gwile kemanya ndika ota ka tekauka, nakehe ngoka ta gwilwa kulyo, otali mu nyanyagula.”

45 Sho aayambi nAafarisayi ya uvu omathaneko ge, oya li ye shi kutya oyo ta popi. 46 Nonando oya li ya hala okukwata po Jesus, oya li ya tila ongundu yaantu, oshoka oya li ye mu tala ko e li omuhunganeki.