Ontiyali kAakorinto
13 Shika osho oshikando oshititatu tandi popi kutya otandi ya kune. Opo uushili woshinima kehe wu kolekwe, opu na okukala oombangi* mbali, nenge ndatu. 2 Nonando ngashingeyi kandi li pamwe nane, onda fa owala ndi li pamwe nane oshikando oshitiyali, notandi mu londodha amuhe, mwa kwatelwa mboka ya yona, kutya ngele onde ke ya kune, otandi ke ya pa egeeloputudho. 3 Kungawo, otandi ke mú ulukila kutya Kristus ota popi okupitila mungame. Kristus ina holola kutya ke na oonkondo mokati keni, ihe okwa holola oonkondo dhe oonene. 4 Oshoka odhoshili kutya okwa li a alelwa komuti a fa omuntu kee na oonkondo, ihe ngashingeyi oku na omwenyo omolwoonkondo dhaKalunga. Odhoshili kutya nonando natse otwa fa kaatu na oonkondo, ngaashi ye a li a fa kee na oonkondo, otatu ka kala pamwe naye omolwoonkondo dhaKalunga, ndhoka mwa ulukilwa.
5 Kaleni tamu ikonakona, mu tale ngele omu li tuu meitaalo; kaleni tamu shilipaleke mu tale kutya ne aantu ya tya ngiini. Nenge mbela kamu shi shi kutya Jesus Kristus oku li muukumwe nane? Shila ongele inaamu hokiwa kuKalunga. 6 Onda inekela shili kutya omu shi shi kutya otwa hokiwa kuKalunga.
7 Onkee ano otatu galikana kuKalunga, opo mwaa longe nando osha oshiwinayi, ihe hamolwaashoka twa hala yamwe ye tu tale ko twa fa twa hokiwa kuKalunga, ihe omu longe shoka oshiwanawa, nokuli nonando otatu monika twa fa inaatu hokiwa kuKalunga. 8 Oshoka itatu vulu okukondjitha oshili, ihe otatu vulu owala oku yi popila. 9 Ohatu kala twa nyanyukwa aluhe, uuna mu na oonkondo, nokuli nonando pethimbo opo tuu mpoka, tse katu na oonkondo; nomolwaashono tatu galikana mu ninge omalunduluko. 10 Onkee ano otandi mú nyolele iinima mbika, manga kaandi li pune, opo ngele nde ke ya kune, kaandi longithe nayi oonkondopangelo, ndhoka nda pewa kOmuwa, ndi mú tunge, ihe haku mú teya omukumo.
11 Hugunina, aamwatate, tsikileni okukala mwa nyanyukwa, okuninga omalunduluko, okuhekelekwa, okukala hamu uvathana nokukala nombili; opo nduno Kalunga kohole nokombili ota ka kala pamwe nane. 12 Ikundeni mokwiihupita pahole. 13 Aayapuki ayehe otaye mú kundile po.
14 Uuwanawahenda wOmuwa gwetu Jesus Kristus, nohole yaKalunga nosho wo omalalekonuuyamba gombepo ondjapuki naga kale pamwe nane amuhe.