KAafilippi
1 Ontumwafo ndjika oya za kuPaulus naTimoteus, aapiya yaKristus Jesus, ya nyolelwa aayapuki yomuFilippi, mboka ye li aalongwa yaKristus Jesus, mwa kwatelwa aakuluntugongalo naayakuligongalo:
2 Uuwanawahenda nombili ndjoka hayi zi kuKalunga, Tate yetu, nosho wo kOmuwa gwetu Jesus Kristus, nayi kale pamwe nane.
3 Ohandi pandula aluhe Kalunga kandje, uuna tandi mú dhiladhila. 4 Kehe ethimbo tandi galikana kombinga yeni, ohandi shi ningi nenyanyu, 5 oshoka omwa kala nokuyambidhidha onkundana ombwanawa, okuza kesiku lyotango sigo ongashingeyi. 6 Ngame onda inekela shili kutya ngoka a tameke oshilonga shika oshiwanawa okupitila mune, ote ke shi manitha ye mwene, sigo omesiku lyaKristus Jesus. 7 Ondi wete shi li mondjila kungame okudhiladhila ngeyi kombinga yeni, oshoka ondi mú hole nomutima aguhe notwa ulukilwa atuheni uuwanawahenda waKalunga, ne mboka mwa kala nokuyambidhidha ndje, sho ndi li mondholongo naasho tandi gamene nokupopila paveta onkundana ombwanawa.
8 Kalunga oku shi shi kutya onde mú yuulukwa amuhe noonkondo nondi mú hole, ngaashi Kristus Jesus e mu hole. 9 Otandi kala nokugalikana mu tsikile okukala mu holathane shi vulithe nale nomu kale mu na ontseyo yashili noondunge dhokuyoolola, 10 opo mu kale mu shi okuyoolola iinima mbyoka ya simanenena, kaamu kale mu na okantongo kasha, nokaamu pundukithe yalwe sigo omesiku lyaKristus. 11 Kungawo, otamu ka imika iiyimati iiwanawa okupitila muJesus Kristus, opo Kalunga a simanekwe noku hambelelwe.
12 Aamwatate, onda hala mu kale mu shi kutya onkalo moka ndi li oye shi ningitha tashi wapa, opo onkundana ombwanawa yi taandele. 13 Sho nda tulwa mondholongo ndi li omulanduli gwaKristus, osha tseyika kaalangeli ayehe yomukwaniilwa gwaRoma nokuyalwe oyendji. 14 Osha tsu wo aamwatate oyendji omukumo ya inekele Omuwa noya uvithe oohapu dhaKalunga nuulaadhi, kaaye na uumbanda.
15 Odhoshili kutya yamwe yomuyo otaya uvitha kombinga yaKristus omolwefupa nomolwondumbo, ihe yalwe otaye shi ningi nehalo ewanawa. 16 Mboka taya uvitha nehalo ewanawa otaye shi ningi omolwohole yawo yokuhola Kristus, oshoka oye shi kutya onda pewa oshinakugwanithwa shokupopila onkundana ombwanawa. 17 Ihe mbeyaka yalwe ihaya uvitha kombinga yaKristus nehalo ewanawa, ihe ohaye shi ningi omolwombepo yokwiihola mwene, opo ando ya gwedhe ko kuudhigu wandje sho ndi li mondholongo. 18 Mbela shoka osha etitha iizemo yini? Kashi na nduno mbudhi kutya aantu otaya uvitha nehalo ewanawa nenge hasho, onkundana ombwanawa kombinga yaKristus otayi tsikile okuuvithwa, naashoka ohashi nyanyudha ndje aluhe, 19 oshoka ondi shi kutya shika otashi ka etitha ehupitho lyandje, okupitila momagalikano geni nokekwatho wo lyombepo ondjapuki yaJesus Kristus. 20 Shoka oshi li metsokumwe naashoka nda kala nda tegelela, nonda inekela kutya itandi ka sithwa nando ohoni, ihe omolwemanguluko lyandje lyokupopya, otandi simanekitha Kristus ngashingeyi, ngaashi nda kala handi shi ningi shito. Kristus ota ka simanekithwa okupitila mungame kutya nduno oosho ndi li momwenyo nenge uuna nda si.
21 Kombinga yandje sho ndi li momwenyo, kehe shoka tandi ningi, otandi shi ningile Kristus, nongele nda si, otandi ka mona ondjambi. 22 Ihe ngele onda tsikile okukala nomwenyo kombanda yevi,* nena shoka otashi ti kutya otandi ka tsikila noshilonga shandje tashi ti sha, ihe nonando ongawo, kandi shi kutya nandi hogolole po shike. 23 Iinima mbika iyali oya limbilika ndje, oshoka onda hala okumanguluka noku ka kala pamwe naKristus, molwaashoka shika osho sha dhenga mbanda. 24 Ihe ondi wete wo sha pumbiwa okutsikila okukala nomwenyo kombanda yevi, omolweni. 25 Ihe ondi na einekelo ndino kutya otandi ka tsikila okukala pamwe nane amuhe, mu ninge ehumokomeho nomu kale mwa nyanyukwa meitaalo, 26 opo sho tandi ka galukila kune, einekelo lyeni muKristus Jesus otali ka kala lya kola omolwandje.
27 Ashike kaleni tamu ihumbata* metsokumwe nonkundana ombwanawa kombinga yaKristus, opo ngele onde ke ya oku mu talela po, nenge nda ka kala inaandi thika, ndi uve kutya omwa kola, omwa hangana,* omu na elalakano limwe* notamu longele kumwe mu humithe komeho eitaalo monkundana ombwanawa, 28 nopwaa na okutilithwa kaapataneki yeni. Okwaanuumbanda kweni oku li uumbangi kutya otaya ka hanagulwa po notaku ulike wo kutya otamu ka hupithwa, naashika osha za kuKalunga. 29 Inamu pewa owala uuthembahenda wokwiitaala muKristus, ihe omu na wo okuhepekwa omolwe, 30 oshoka nane omwa taalela omaupyakadhi ngoka nda li mugo, ngoka ngashingeyi mwa uvu kutya ogo natango nda taalela.